दाङमा अक्सिजन ब्यवस्थापनको पहलमा प्रदेश सांसदहरु

राजनीति

गृहपृष्ठ
राजनीति
दाङमा अक्सिजन ब्यवस्थापनको पहलमा प्रदेश सांसदहरु

दाङमा अक्सिजन ब्यवस्थापनको पहलमा प्रदेश सांसदहरु

बिहीबार, वैशाख ३०, २०७८ बागेश्वरी पोस्ट

नेपालगन्ज । दाङमा संचालित सिमेन्ट उद्योगहरुले अक्सिजन सिलिन्डर र अक्सिजन भर्ने रकम उपलब्ध गराउने भएका छन् ।

कोभिडका कारण जनजीवन नराम्ररी प्रभावित हुन थालेपछि जनताको ज्यान जोगाउन निजी क्षेत्रको सहयोग लिने विषयमा दाङका लुम्बिनी प्रदेशका सांसदहरुको पहलमा प्रमुख जिल्ला अधिकारीको अध्यक्षतामा आज जिल्ला प्रशासन कार्यालय दाङमा बसेको बैठकमा सोनापुर सिमेन्टले प्रति दिन २० वटा सिलिन्डर उपलब्ध गराउने घोषणा गरेको छ । त्यस्तै सगरमाथा सिमेन्टले दैनिक ५० वटा सिलिन्डर भर्ने बराबरको रकम दिने प्रतिबद्धता जनाएको छ । सम्राट सिमेन्टले दैनिक २० वटा सिलिन्डर भर्ने रकम उपलब्ध गराउने भएको छ ।

लुम्बिनी प्रदेशका सांसद, सिमेन्ट उद्योगका प्रतिनिधि, राजनीतिक दल, संचारकर्मी लगायत उपस्थित बैठकमा अक्सिजनको सहज र यथेष्ट उपलब्धताका लागि प्रशासन र सांसदहरुले पहल गर्नुपर्नेमा जोड दिइएको छ । वैठकमा सहभागी लुम्बिनी प्रदेशका सांसद शंकर गिरीका अनुसार अक्सिजनको दीर्घकालीन समाधानका लागि अक्सिजन प्लान्ट स्थापना गर्ने कार्यलाई अघि बढाउन सोनापुर सिमेन्टका प्रवन्धक हरि पाठकलाई व्यवस्थापनको जिम्मा दिइएको छ । सरकारी स्तरबाट प्लान्ट स्थापना गर्न ढिला हुने निष्कर्ष निकाल्दै निजी क्षेत्रलाई जिम्मा दिइएको हो । यस कार्यमा आउने बाधा व्यवधान हटाउन प्रमुख जिल्ला अधिकारी र सांसदहरुले पहल गर्ने सहमति बनेको गिरीले बताउनुभयो ।

भारतबाट लिक्विड अक्सिजन ढुवानीको जटिलतालाई मध्यनजर गर्दै सोनापुर सिमेन्टका प्रवन्धक पाठकलाई नै जिम्मेवार दिइएको छ । सरकारबाट डकुमेन्टेसनका लागि प्रजिअ र सांसदहरुले जिम्मा लिने निर्णय भएको छ । बैठकमा सिलिन्डर भर्न विद्युतको समस्या हुने भएकाले लुम्बिनी प्रदेशका सार्वजनिक लेखा समितिका सभापति डिल्ली बहादुर चौधरीले नेपाल विद्युत प्राधिकरणका महानिर्देशकसंग कुरा गरेर समस्या समाधान गर्ने प्रतिबद्धता जनाउनुभयो ।

होम आइसोलेसनमा बसेकाहरुलाई स्थानीय स्वास्थ्यकर्मी परिचालन गरी स्वास्थ्य स्थितिबारे जानकारी लिने र टोल टोलमा अनुगमन समिति बनाएर संक्रमित बसेका घरबाट बाहिर कोभिड फैलिनबाट रोक्ने निर्णय गरिएको छ । बैठकमा सार्वजनिक लेखा समिति संयोजक डिल्ली चौधरी, प्रदेश मामिला तथा कानुन समिति सभापति दामा शर्मा, सांसदहरु शंकर गिरी, अर्जुन श्रेष्ठ, रेवतीरमण शर्मा, सरस्वती गौतम र धमकली चौधरी सहभागी हुनुहुन्थ्यो ।

प्रकाशित मिति: बिहीबार, वैशाख ३०, २०७८ १७:०१

प्रतिक्रिया दिनुहोस्