प्रधानमन्त्रीको शपथ बदर गर्न माग गर्दै सर्वोच्चमा रिट

राजनीति

गृहपृष्ठ
राजनीति
प्रधानमन्त्रीको शपथ बदर गर्न माग गर्दै सर्वोच्चमा रिट

प्रधानमन्त्रीको शपथ बदर गर्न माग गर्दै सर्वोच्चमा रिट

आइतबार, जेठ २, २०७८ बागेश्वरी पोस्ट

नेपालगन्ज । सर्वोच्च अदालतमा प्रधानमन्त्री केपी शर्मा ओलीले पुनःनियुक्तपछि लिएको सपथ बदर गर्न माग गर्दै रिट लिएर कानुन व्यवसायीहरु सर्वोच्च अदालत पुगेका छन् ।

प्रधानमन्त्रीले लिएको सपथ बदर गर्न माग गर्दै आइतबार (आज) वरिष्ठ अधिवक्ता चन्द्रकान्त ज्ञवाली, अधिवक्ताद्वय लोकेन्द्रबहादुर ओली र केशरजंग केसी रिट लिएर सर्वोच्च पुगेका हुन्। यद्यपि समयअभावका कारण रिटहरु आज दर्ता हुन नसकेको सर्वोच्च अदालत प्रशासनले जनाएको छ ।

गत वैशाख ३१ गते प्रधानमन्त्रीले पद तथा गोपनीयताको शपथ लिँदा राष्ट्रपति विद्यादेवी भण्डारीले दुईपटक उच्चारण गर्दासमेत ‘प्रतिज्ञा गर्दछुु भन्ने वाक्यांश प्रधानमन्त्रीले त्यो पर्दैन भनी उच्चारण गरेनन्। उनीहरुले शपथमा राष्ट्रपतिले दुई–दुई पटक उच्चारण गरेको शब्द उच्चारण गर्न पर्दैन भनी प्रधानमन्त्रीले राष्ट्रपति, राष्ट्रपति संस्था, संविधान, जनताप्रतिको सार्वभौमसत्ता र राष्ट्रप्रतिको निष्ठामाथि नै मानमर्दन गरेको भनी बदर गर्न माग गरेका छन् ।

सर्वोच्चमा पेश गरिएको रिटमा भनिएको छ, ‘राष्ट्रपतिले सपथको ढाँचाबमोजिम सपथ वाक्यांश जे जस्तो पढ्नु हुन्छ सोही बमोजिम नै प्रधानमन्त्रीले सपथग्रहण गर्नुपर्ने हुन्छ । सपथको ढाँचालाई तलमाथि फेरबदल गर्न पाइँदैन। यदि यसो भयो भने संविधान, संविधानवाद, जनताप्रतिको सार्वभौमसत्ता र राष्ट्रप्रतिको निष्ठामाथि नै मानमर्दन हुन पुग्दछ।’ संघीय संसद सदस्य नरहेकालाई पुनः नियुक्त गर्नु संविधान विपरीत हुने समेत रिटमा उल्लेख गरिएको छ ।

वरिष्ठ अधिवक्ता ज्ञवालीले शपथको शब्द उच्चारण नगरेर प्रधानमन्त्रीले विधिको शासनप्रतिको प्रतिज्ञा र जवाफदेहिता नमानेकाले त्यसलाई बदर गरिपाउँ र अर्को शपथ नलिएसम्म प्रधानमन्त्री पद यथास्थितिमा राख्न पनि माग गरिएको बताए। रिटमा अहिले भइरहेको शपथ कुन कानुन र अभ्यास अन्तर्गत भएको हो भन्ने प्रश्न समेत उठाइएको छ। साथै, शपथको ढाँचासम्बन्धी संघीय कानुन बनाउन परमादेश पनि माग गरिएको छ ।

प्रकाशित मिति: आइतबार, जेठ २, २०७८ १९:०३

प्रतिक्रिया दिनुहोस्