प्रधानमन्त्रीमा दावी गर्न केवल २१ घण्टा समय

राजनीति

गृहपृष्ठ
राजनीति
प्रधानमन्त्रीमा दावी गर्न केवल २१ घण्टा समय

प्रधानमन्त्रीमा दावी गर्न केवल २१ घण्टा समय

बिहीबार, जेठ ६, २०७८ बागेश्वरी पोस्ट

नेपालगन्ज । राष्ट्रपति विद्यादेवी भण्डारीले संविधानको धारा ७६ को उपधारा ५ बमोजिम नयाँ सरकार गठनको लागि केवल २१ घण्टा समय प्रदान गरेकी छिन् ।

प्रधानमन्त्री केपी शर्मा ओलीले उपधारा ४ बमोजिम संसदबाट विश्वासको मत नलिई नयाँ सरकार गठनको मार्ग प्रशस्त गरेपछि राष्ट्रपतिले उपधारा ५ बमोजिम प्रक्रिया अघि बढाउँदै केवल २१ घण्टा समय दिएकी हुन् । राष्ट्रपति कार्यालयले बिहीबार राति ८ बजे आसपास विज्ञप्ति जारी गर्दै भोलि शुक्रबार जेठ ७ गते साँझ ५ बजेसम्म विश्वासको मत प्राप्त गर्न सक्ने आधार प्रस्तुत गर्न समय दिएको जनाएको छ।

शुक्रबार साँझसम्म वैकल्पिक प्रधानमन्त्रीले बहुमत सदस्यको विश्वास प्राप्त गर्ने आधार पेश गर्नुपर्नेछ । यो धारा प्रतिनिधिसभामा कुनै पनि दलको स्पष्ट बहुमत नरहेको अवस्थामा आकर्षित हुन्छ ।

दुई वा दुई भन्दा बढी दलहरुको समर्थनमा बहुमत पाप्त गर्न सक्ने कुनै सदस्यले प्रतिनिधिसभामा विश्वासको मत प्राप्त गर्न सक्ने आधार प्रस्तुत गरेमा राष्ट्रपतिले त्यस्तो सदस्यलाई प्रधानमन्त्री नियुक्त गर्ने व्यवस्था उपधारा ५ मा छ ।

राष्ट्रपति कार्यालयले विपक्षी दलहरुलाई गृहकार्यको अवसर पनि नदिएर प्रतिनिधिसभा संवैधानिकरुपमै भंग गर्न आधार प्रस्तुत गरेको विपक्षी दलका नेताहरुले आरोप लगाएका छन् ।