पतिको हत्या भएको दाबी गर्दै पत्नीद्वारा अनुसन्धान गर्न माग

समाचार

गृहपृष्ठ
समाचार
पतिको हत्या भएको दाबी गर्दै पत्नीद्वारा अनुसन्धान गर्न माग

पतिको हत्या भएको दाबी गर्दै पत्नीद्वारा अनुसन्धान गर्न माग

मंगलबार, मंसिर १७, २०७६ बागेश्वरी पोस्ट

नेपालगन्ज । नेपालगन्ज खजुरा सडक खण्डमा मृत भेटिएका सुर्खेतका सतेन्द्र विसीको हत्या नै भएको परिवारले दाबी गरेको छ । गत कार्तिक २० गते मृत अवस्थामा भेटिनुभएका सुर्खेत घर भई हाल नेपालगञ्ज उपमहानगरपालिका वडा नम्बर १२ बेलासपुर बस्दै आउनुभएका विसीको हत्या नै भएको परिवारले दाबी गरेको हो ।

जानकी गाउँपालिकाको वडा नम्बर ३ को सडक छेउँमा विसीको शव कार्तिक २० गते विहान भेटिएको थियो । बाँके प्रहरीले सवारी साधनको ठक्करबाट विसीको मृत्यु भएको बताएपनि घटना रहस्यमय भएको परिवारको दावी छ । घटनाको करिब एक महिनापछि मृतक विसीकी पत्नी जानकी विसीले आज नेपालगन्जमा सञ्चारकर्मीहरुसँग कुरा गर्दै घटनामा प्रहरीले प्रभावकारी अनुसन्धान नगरेको दुखेसो पोख्नुभयो । घटनाको सुक्ष्म अनुसन्धान गर्न उहाँले माग गर्नुभयो । मृत्यु हुनु भन्दा अघिल्लो दिनसम्म परिवारकै सम्पर्कमा रहेको व्यक्ति भोलिपल्ट त्यस्तो अवस्थामा भेटिनु रहस्यमय भएको पत्नी जानकीको भनाई छ ।

जग्गाको कारोवार गर्ने विसी १९ गते सुर्खेत जान्छु भनेर घरबाट हिँडेको जानकीले बताउनुभयो। गाडीले ठक्कर दिएको भए शरीरका अन्य भागमा पनि चोट लाग्नुपर्नेमा त्यस्तो नदेखिएको तर टाउकोमा पछाडिबाट हानेको जस्तो चोट भएको भन्दै उहाँले हत्या नै भएको दावी गर्नुभयो । प्रहरीले पोष्टमार्टम रिपोर्टमा टाउकोमा चोट लागेको देखाएको जनाएको छ ।

बाँकेका प्रहरी प्रमुख प्रहरी उपरिक्षक बीरबहादुर ओलीले घटनालाई आफूहरुले गम्भीरताका साथ लिएको बताउँदै अनुसन्धान भइरहेको जानकारी दिनुभयो । परिवारजनले भने प्रहरीको अनुसन्धान प्रभावकारी नभएको गुनासो गरेका छन् ।

घटना भएको महिना दिन वित्नै लाग्दा समेत प्रहरीले कुनै चासो नदिएको विसीकी पत्नी जानकीको गुनासो छ ।

प्रकाशित मिति: मंगलबार, मंसिर १७, २०७६ १७:१२

प्रतिक्रिया दिनुहोस्