एक बेला माओवादी ‘जनसेना’ थिए उनी; अहिले वडा हाँक्दैछन्

समाचार

गृहपृष्ठ
समाचार
एक बेला माओवादी ‘जनसेना’ थिए उनी; अहिले वडा हाँक्दैछन्

एक बेला माओवादी ‘जनसेना’ थिए उनी; अहिले वडा हाँक्दैछन्

बुधबार, असार ९, २०७८ बागेश्वरी पोस्ट

नेपालगञ्ज । उनी अहिले जनताको सेवामा तल्लीन छन् । जनताका समस्या सुन्दै समाधानका बाटाहरु पहिल्याउँदै विकासलाई गति दिन उनलाई भ्याई नभ्याई छ । विभिन्न कार्यक्रमहरुबाट आउने निमन्त्रणालाई स्विकार्दै गर्दा उनको व्यस्तता अझ चर्को देखिन्छ ।

एक बेला हातमा हतियार बोकेर परिवर्तनको विगुल फुक्दै युद्ध मैदानमा होमिने उनी अहिले कलम समाएर दस्तखत गर्न अग्रसर छन् । त्यो बेला लुकी लुकी हिँड्ने उनी, अहिले जनतासंग साक्षात्कार गरेर रत्तिभर थाक्दैनन् । माओवादीले चलाएको सशस्त्र जनयुद्ध ताका सहायक सैन्य कमाण्डर बनेका उनी अहिले जनताले चुनेका जनप्रतिनिधि हुन् ।

२०७४ असार १४ गते भएको स्थानीय तहको निर्वाचनमा नेपालगञ्जको पुरानो बस्ती एक्लैनी क्षेत्रबाट उदाएका जनप्रतिनिधि हुन्, एक बेलाका माओवादी सेनाका सहायक कमाण्डर मो.अयुब सिद्धिकी । साविकको वडा नम्बर ४ र ९ जहाँ कांग्रेस र अन्य पार्टीको दबदबा थियो, त्यही क्षेत्रबाट खासै संगठन नभएको माओवादीबाट उम्मेदवार बनेर उदाए सिद्धिकी । उनी भन्छन्—‘वडाबासीले मलाई अगाध माया गर्नुभयो, मेरो पार्टीको यहाँ खासै संगठन नै नभएको अवस्थामा मलाई ठूलो विश्वास गरेर जिताउनुभयो, उहाँहरुको ऋणको भारी तिर्न म अहोरात्र खटिएको छु ।’

मुस्लिम परिवारका ४२ बर्षीय सिद्धिकी २०५६ देखि २०६२ सम्म भूमिगत थिए । कैलालीलाई मुख्य क्षेत्र बनाएर उनको सैन्य यात्रा अघि बढेको थियो । बाउबाजे कांग्रेस भएपनि उनी त्यतै डोरिए । कांग्रेस पृष्ठभूमिका सिद्धिकी कस्मेटिकका सामान लिएर पहाड जान्थे । उतै जाँदा जाँदै, उनीहरुसंग संगत गर्दागर्दै माओवादीको प्रतिबद्ध क्याडर बनेर सैन्य परेड खेल्न थाले । ‘जनसेना’ उनी खुलेआम व्यापार गर्ने मान्छे, कसैले देख्ला कि भनेर लुकेर हिंड्न थाले । शुरुमा उनी सञ्चारमा थिए, पछि ‘जनसेना’ बने ।

मधेशी मुस्लिम समुदायको एउटा युवालाई पार्टीले विश्वास गरेर अघि बढाएकोमा उनी औधि खुसी देखिन्छन् । भन्छन्—‘यहाँसम्म आइपुग्न पार्टीले गरेको विश्वासलाई म कहिल्यै घात गर्दिन, जनताले दिएको साथलाई कहिल्यै भूल्दिन ।’ पछिल्लो चार बर्षदेखि वडाको विकासमा तन, मन र बचनले लागेको बताउने सिद्धिकी आफूले वडामा थुप्रै काम गरेको दाबी गर्छन् । ‘म प्रचार रुचाउँदैन, यो गरें त्यो गरें भनेर भनिरहनु पर्दैन, वडाबासीको मुहारमा खुसी देख्न पाए मलाई पुग्छ’, उनी थप्छन्—‘मेरो कामलाई जनताले रुचाएका छन्, म यसमै खुसी छु ।’

निर्वाचित भएर आए लगत्तै बाटो चौडा गर्ने क्रममा उनले कुटाई पनि खाए । तर, यसलाई उनले अन्यथा सम्झेका छैनन् । ‘जनताले कुरा बुझेका छन् । मैले गर्न खोजेको उनीहरुकै लागि हो भन्ने बुझेका छन्, त्यसमा मलाई रत्तिभर गुनासो छैन’, उनी भन्छन् । नेपालगञ्ज उपमहानगरबाट वडाका लागि मोटरसाइकल खरिद गर्ने पैसा आएपनि आफूले त्यसो नगरी विकासमै उक्त रकम खर्चेको बताउने सिद्धिकी वडाका सबै जनप्रतिनिधिलाई साथमा लिएर अघि बढेकाले राम्रो काम भइरहेको दाबी गर्छन् ।

(सिद्धिकीसंग प्रधान सम्पादक नवीन गिरीले गर्नुभएको कुराकानीमा आधारित)

प्रकाशित मिति: बुधबार, असार ९, २०७८ १६:२९

प्रतिक्रिया दिनुहोस्