नरैनापुरमा सशस्त्र प्रहरीको सीमा सुरक्षा तथा लागू औषध सम्वन्धि सचेतना

समाचार

गृहपृष्ठ
समाचार
नरैनापुरमा सशस्त्र प्रहरीको सीमा सुरक्षा तथा लागू औषध सम्वन्धि सचेतना

नरैनापुरमा सशस्त्र प्रहरीको सीमा सुरक्षा तथा लागू औषध सम्वन्धि सचेतना

बुधबार, मंसिर १८, २०७६ बागेश्वरी पोस्ट

(नरैनापुर) बाँके । बाँकेको नरैनापुरमा सीमा सुरक्षा र लागू औषध सेवन विरुद्धको सचेतना कार्यक्रम गरिएको छ । नरैनापुर गाउँपालिका वडा नम्बर २ लक्ष्मणपुरमा स्थानीयका लागि सीमा सम्वन्धि जानकारीका साथै लागू औषध विरुद्धको सचेतना कार्यक्रम गरिएको हो ।

सशस्त्र प्रहरी बल नेपाल नम्बर ३० गण हेडक्वाटर बागेश्वरीको आयोजना तथा नरैनापुर गाउँपालिकाको सहयोगमा आयोजित कार्यक्रमका सहभागीहरुलाई सशस्त्र प्रहरी उपरिक्षक दीपक अधिकारीले सीमा सुरक्षाका लागि स्थानीयले ध्यान दिनुपर्ने विषयमा जानकारी गराउनुभएको थियो । उहाँले खुला सीमाका कारण हुन सक्ने लागू औषध ओसारपसार तथा सेवनलाई निरुत्साहित गर्न स्थानीय नै सचेत र जागरुक हुनुपर्ने बताउनुभयो । सशस्त्र प्रहरी उपरिक्षक अधिकारीले सीमा स्तम्भ सुरक्षामा स्थानीयको विशेष दायित्व हुने भन्दै दशगजा क्षेत्रमा कुनै खालको अतिक्रमण हुन नहुने बताउनुभयो । सशस्त्र प्रहरी बल सीमा सुरक्षा बल कट्कुइँयाका प्रहरी निरिक्षक गणेश भण्डारी तथा शसस्त्र प्रहरी बल गंगापुरका प्रहरी नायब निरिक्षक खगेन्द्र विकले अन्तर्राष्ट्रिय सीमा, सीमा स्तम्भ र दशगजाका बारेमा स्थानीयलाई जानकारी गराउनुभएको थियो ।

नरैनापुर गाउँपालिकाका अध्यक्ष इस्तियाक अहमद शाहले पछिल्लो एक बर्षमा लागूऔषध दुब्र्यसनीहरुले धमाधम कुलत छाड्दै सत्मार्गमा हिंड्ने प्रण गरिरहेको बताउँदै खुला सीमाका कारण बढेको जोखिम न्यूनीकरणका लागि गाउँपालिका गम्भीर रहेको बताउनुभयो । उहाँले डुडुवादेखि नरैनापुरको हुलासपुर्वासम्मका केही सीमा स्तम्भ हराएकाले सीमा स्तम्भ पुनःस्थापनाका लागि भूमिका खेल्न सशस्त्र प्रहरी बललाई आग्रह गर्नुभयो । नरैनापुरका सीमावर्ती स्थानीयहरु सीमाका असली रक्षक भएको बताउँदै अध्यक्ष शाहले आफ्नो जमिनको रक्षाका लागि सबै गम्भीर हुनुपर्ने बताउनुभयो ।

त्यस्तै नरैनापुर गाउँपालिकामा स्वास्थ्य सम्बन्धी जनचेतना मूलका कार्यक्रम समेत सम्पन्न भएको छ। गाउँपालिकाको सहयोगमा उक्त कार्यक्रम वडा नम्बर ३ मा सम्पन्न भएको छ। कार्यक्रममा ५० बढीको सहभागिता रहेको थियो भने कार्यक्रमको प्रमुख आथित्यता अध्यक्ष राजकुमार मौर्यले गर्नुभएको थियो भने कार्यक्रमको सहजीकरण सबिना सोडारीले गर्नु भएको थियो।

लागु औषध कार्यक्रममा दुई सय बढी स्थानीय सहभागी कार्यक्रममा जिल्ला प्रशासन कार्यालयका सहायक प्रमुख जिल्ला अधिकारी कृष्ण कान्त उपाध्याय, नरैनापुर गाउँपालिकाका प्रमुख प्रशासकीय अधिकृत दल बहादुर बस्नेत, वडा नम्बर १ का अध्यक्ष मोल्हे बेहना शेख, ३ नम्बर वडाका अध्यक्ष राजकुमार मौर्य लगायत सहभागी हुनुहुन्थ्यो ।

प्रकाशित मिति: बुधबार, मंसिर १८, २०७६ १८:५८

प्रतिक्रिया दिनुहोस्