कांग्रेस नेता गिरी र पाण्डेद्वारा बाँकेका नेता कार्यकर्तासंग भेटघाट

राजनीति

गृहपृष्ठ
राजनीति
कांग्रेस नेता गिरी र पाण्डेद्वारा बाँकेका नेता कार्यकर्तासंग भेटघाट

कांग्रेस नेता गिरी र पाण्डेद्वारा बाँकेका नेता कार्यकर्तासंग भेटघाट

शनिबार, असार १२, २०७८ बागेश्वरी पोस्ट

नेपालगन्ज । नेपाली कांग्रेसका दुई जना केन्द्रिय सदस्यले आज बाँकेमा नेता कार्यकर्ताहरुसंग भेटघाट गर्नुभएको छ । पार्टी कार्यालयमा केन्द्रिय सदस्य तथा पूर्व मन्त्री दीपक गिरी र केन्द्रिय सदस्य सुरेन्द्र पाण्डेले कार्यकर्ताहरुसंग भेटघाट गर्नुभएको हो ।

जिल्लामा देखिएको क्रियाशील सदस्यता विवाद र आगामी १४औं महाधिवेशनका विषयमा नेताद्वयले जिल्लाका नेता कार्यकर्तासंग छलफल गर्नुभएको थियो । बाँके जिल्ला सभापति किरण कोइराला र उपस्थित अन्य नेता कार्यकर्ताले जिल्लामा उत्पन्न क्रियाशील सदस्यता विवाद, विवाद समाधानका लागि जिल्ला तहमा भएका प्रयास, क्षेत्र नम्बर १ मा झण्डै ४/५ सय नयाँ सदस्यता इन्ट्री नगरिएको विषयमा गुनासो गरेका थिए । क्षेत्र नम्बर १ मा क्षेत्रीय सभापतिले पूर्वाग्रही बनेर वडाबाट सिफारिस भएर गएका नामहरु पनि इन्ट्री नगरेको भन्दै उनीहरुले आक्रोश समेत पोखेका थिए ।

नेताद्वयले निर्धारित मितिमा जसरी पनि महाधिवेशन गर्नुपर्ने बाध्यात्मक अवस्था रहेकाले समयमै विवाद समाधान गरेरै पार्टी महाधिवेशनमा होमिने बताउनुभएको थियो । बर्दियाको नयाँ क्रियाशील सदस्यता र नवीकरणमा देखिएको शुल्क विवाद समाधानका लागि गुलरिया पुग्नुभएका गिरी र पाण्डेले काठमाण्डौ फर्कने क्रममा बाँकेका नेता कार्यकर्तासंग छलफल गर्नुभएको हो ।

यसअघि आज नेपाली काङ्ग्रेस बर्दियाको पार्टी कार्यालयमा केन्द्रिय सदस्यद्वय गिरी र पाण्डे एवम् जिल्ला सभापति सञ्जय गौतम , जिल्ला सदस्य, पदाधिकारी तथा विभिन्न सरोकारवाला नेता-कार्यकर्ताको बीचमा व्यापक छलफल भई क्रियाशिल सदस्यताको शुल्कको विषयमा जिल्ला कार्यसमितिको पूर्ववत् निर्णय बमोजिम नै शुल्क लिएर क्रियाशील सदस्यता नविकरण एवम् वितरण गर्ने सर्वसम्मत निर्णय भएको छ ।

प्रकाशित मिति: शनिबार, असार १२, २०७८ १९:२३

प्रतिक्रिया दिनुहोस्