डीआईजी थापा एआईजी बढुवाका लागि सिफारिस

राजनीति

गृहपृष्ठ
राजनीति
डीआईजी थापा एआईजी बढुवाका लागि सिफारिस

डीआईजी थापा एआईजी बढुवाका लागि सिफारिस

मंगलबार, असार १५, २०७८ बागेश्वरी पोस्ट

नेपालगन्ज ।नेपाल प्रहरीका डीआईजी सहकुलबहादुर थापालाई प्रहरी अतिरिक्त महानिरीक्षक (एआईजी) मा बढुवा गर्न सिफारिस गरिएको छ । गृह मन्त्रालयले नेपाल प्रहरीका डीआइजी थापालाई एआइजीमा बढुवा गर्न सिफारिस गरेको हो ।

गृह सचिव महेश्वर न्यौपानेको अध्यक्षतामा रहेको बढुवा सिफारिस समितिले सोमबार डीआइजी थापालाई एआइजीमा बढुवा गर्न सिफारिस गरेको गृह मन्त्रालयले जनाएको छ । सिफारिसबारे थप निर्णय मन्त्रिपरिषद् बैठकले गर्ने छ ।

केही दिनअघि बसेको मन्त्रीपरिषद् बैठकले नेपाल प्रहरीतर्फ एक जना एआइजीको दरबन्दी थप गरेको थियो । एआइजीमा सिफारिसमा परेका थापाको नाम मन्त्रिपरिषद्ले स्वीकृत गरेमा थापा नेपाल प्रहरीको एआइजी बन्ने छन् भने आगामी प्रहरी महानिरिक्षकको दौडमासमेत उभिने छन् ।

यसअघि गत वर्षको २७ कार्तिकको मन्त्रीपरिषद् बैठकले विश्वराज पोखरेललाई एआइजी बनाएको थियो । त्यसयता उनी आगामी प्रहरी नेतृत्वका लागि एक्ला दाबेदार रहेका थिए ।

अब भने एआइजी पोखरेल र थापाबीच आगामी प्रहरी नेतृत्वका लागि प्रतिस्पर्धा हुने पक्का भएको छ । नेपाल प्रहरीका हालका प्रमुख आईजीपी शैलेश थापा क्षेत्रीले १९ वैशाख २०७९ मा अवकाश पाउनेछन् ।

प्रकाशित मिति: मंगलबार, असार १५, २०७८ ०७:४३

प्रतिक्रिया दिनुहोस्