बाँके कांग्रेसमा क्षेत्रीय सभापतिका लागि 'रस्साकस्सी'

राजनीति

गृहपृष्ठ
राजनीति
बाँके कांग्रेसमा क्षेत्रीय सभापतिका लागि 'रस्साकस्सी'

बाँके कांग्रेसमा क्षेत्रीय सभापतिका लागि 'रस्साकस्सी'

शनिबार, असार २६, २०७८ बागेश्वरी पोस्ट

नेपालगञ्ज । नेपाली कांग्रेसको १४औं महाधिवेशन नजिकिँदै गर्दा वडादेखि केन्द्रसम्म सरगर्मी बढेको छ । वडा अधिवेशन साउन १२ गते हुँदैछ । त्यस्तै पालिका स्तरीय अधिवेशन १६ गते, प्रदेशसभा क्षेत्रीय अधिवेशन २० गते, प्रतिनिधि सभा निर्वाचन क्षेत्र अधिवेशन साउन २३ गते, जिल्ला अधिवेशन २६ गते र प्रदेश अधिवेशन भदौ १ र २ गते सम्पन्न भई भदौ १६ देखि १९ सम्म केन्द्रिय महाविधेशन काठमाण्डौमा हुने कार्यतालिका छ । अधिवेशन संघारमै आइपुग्दा बुथ सभापतिदेखि केन्द्रिय सभापतिसम्मका उम्मेदवारहरुले आकांक्षा प्रकट गरिरहेका छन् । कतिपय त 'ब्याक' नहुने गरी तीब्र तयारीमा जुटेका समेत छन् ।

बाँकेमा पनि उम्मेदवारहरुको चर्चाले बजार तात्न थालेको छ । वडा वडामा बुथ सभापतिदेखि जिल्ला सभापतिसम्म क-कसले उम्मेदवारी दिँदैछन् भन्ने चर्चा परिचर्चाले माहोल गर्माएको छ । तीन वटा प्रतिनिधिसभा निर्वाचन क्षेत्र रहेको बाँकेमा झण्डै एक दर्जन आकांक्षी देखिएका छन् । क्षेत्र नम्बर १ मा ५ जनाको चर्चा छ । क्षेत्र नम्बर २ मा ३ जना र क्षेत्र नम्बर ३ मा २ जनाको नामले चर्चा पाएको छ । यी मध्ये अधिकांशले 'मुख' खोलिसकेका छन् भने केही 'पर्ख र हेर'को रणनीतिमा छन् ।

कोहलपुर नगरपालिका, राप्तीसोनारी गाउँपालिका र नरैनापुर गाउँपालिका क्षेत्र समेटेको प्रतिनिधिसभा निर्वाचन क्षेत्र नम्बर १ मा लामो समय पत्रकारिता गरेर पार्टीको सक्रिय राजनीतिमा होमिएका पोषण केसीदेखि विद्यार्थी नेता पूर्ण आचार्यसम्मको चर्चा छ । केसी नेपाल पत्रकार महासंघका पूर्व महासचिव हुन् भने आचार्य नेपाल विद्यार्थी संघ बाँकेका अध्यक्ष हुन् । केसी र आचार्यसंगै अहिलेका क्षेत्रीय सभापति माधवराम खत्री पनि दोहोरिने दौडमा छन् । गत क्षेत्रीय अधिवेशनमा खत्रीसंग पराजित भएका युवराज पौडेलको पनि क्षेत्रीय सभापतिमा चर्चा छ । बर्तमान क्षेत्रीय सचिव डिल्ली गिरीले पनि क्षेत्रीय सभापतिमा लड्ने 'मुड' बनाएका छन् । केसी, आचार्य, पौडेल र गिरी संस्थापन इतरका हुन् भने खत्री संस्थापन पक्षका हुन् ।

सदरमुकाम नेपालगञ्ज उपमहानगरपालिकासहित जानकी र डुडुवा गाउँपालिका समेटिएको प्रतिनिधिसभा निर्वाचन क्षेत्र नम्बर २ मा वर्तमान क्षेत्रीय सभापति रमेश कुमार गुप्ता पुनः सभापति बन्ने दाउमा छन् । तरुण दलका बाँके जिल्ला अध्यक्ष तथा नेपालगञ्ज उपमहानगरपालिका वडा नम्बर १३ का वडा अध्यक्ष विरेन्द्र बहादुर शाहले पनि क्षेत्रीय सभापतिमा आफ्नो उम्मेदवारी हुने बताइसकेका छन् । नेपालगञ्ज नगर सभापति प्रशान्त विष्टलाई पनि क्षेत्रीय सभापतिको सम्भावित उम्मेदवारका रुपमा हेरिएको छ । यद्यपि उनले नगर सभापतिमै चुनाव लड्ने 'इच्छा' देखाएका छन् । तर, क्षेत्रीय सभापतिमै उनको उम्मेदवारीलाई नकार्न नसकिने कांग्रेस बृत्तमा चर्चा छ । कांग्रेसको समूहगत राजनीतिमा गुप्ता र शाह संस्थापन निकटका मानिन्छन् भने विष्ट संस्थापन इतरका हुन् ।

खजुरा र बैजनाथ गाउँपालिका समेटेर बनेको प्रतिनिधिसभा क्षेत्र नम्बर ३ मा भने अहिलेसम्म दुई जनाको मात्र चर्चा छ । अहिलेका सभापति नक्की खाँ र खाँसंगै गत अधिवेशनमा पराजित भएका प्रकाश शाहीको उम्मेदवारी रहने प्रबल सम्भावना छ । खाँ संस्थापन पक्षका हुन् भने शाही संस्थापन इतरका नेता हुन् ।

प्रतिनिधिसभा निर्वाचन क्षेत्रको सभापतिमा धेरै जनाले दाबी गरेपनि तीन वटै निर्वाचन क्षेत्रमा अन्त्यमा पार्टीको समूहगत 'लाइन' पाउने संस्थापनका एक र संस्थापन इतरका एक जना गरी दुई जना बीच मात्रै प्रतिष्पर्धा हुने सम्भावना बढी रहने कांग्रेसका नेता कार्यकर्ता बताउँछन् ।

एउटा क्षेत्रको कमाण्डर भएर आफ्नो प्रभाव बढाउन सकिने, स्थानीय तह तथा प्रदेश र संघको संसदीय निर्वाचनमा टिकट वितरणमा अहम् भूमिका हुने, क्रियाशील सदस्यता वितरणमा 'लाभ' पुग्ने भएका कारण पनि कांग्रेसमा क्षेत्रीय सभापतिमा 'आकर्षण' हुने गर्दछ ।

प्रकाशित मिति: शनिबार, असार २६, २०७८ १८:२८

प्रतिक्रिया दिनुहोस्