बिनाभिसा अमेरिका जाँदै गरेका दाङका ३ जना समुद्रमा बेपत्ता,दाङबाट एक पक्राउ

समाचार

गृहपृष्ठ
समाचार
बिनाभिसा अमेरिका जाँदै गरेका दाङका ३ जना समुद्रमा बेपत्ता,दाङबाट एक पक्राउ

बिनाभिसा अमेरिका जाँदै गरेका दाङका ३ जना समुद्रमा बेपत्ता,दाङबाट एक पक्राउ

बिहीबार, असार ३१, २०७८ बागेश्वरी पोस्ट

नेपालगन्ज । गैरकानुनी रूपमा अमेरिका जान खोजेका दाङका ३ सहित १८ जना समुद्रमा बेपत्ता भएका छन् । गैरकानुनी तरिकाले बिनाभिसा अमेरिका पठाउदा डुंगा दुर्घटनामा बेपत्ता भएपछि प्रहरीले उनीहरूलाई पठाउने एजेन्टको खोजी अभियानलाई तीव्र पारेको छ।
प्रहरीले आज बिहान घोराही उपमहानगरपालिका-१४ मिलन चोक बस्ने गोमा जिसीलाई पक्राउ गरिएको उच्च प्रहरी श्रोतले बताएको छ।

‘गोमाको नाममा केन्द्रबाटै वारेन्ट जारी गरी दाङमा पठाइएको हुँदा प्रहरीले पक्राउ गरेर काठमाडौं पठाइसकेको,’ एक प्रहरी अधिकारीले जानकारी दिएका छन् ।

असार ७ गते बिहान नेपालका ८ जना र १० बंगलादेशी नागरिक सवार डुँगा कोलम्बियाको समुद्रमा दुर्घटनामा परेको थियो। त्यसमध्ये एक नेपाली र पाँच बंगाली नागरिक पौडी खेलेर ज्यान जोगाउन सफल भएका थिए। पौडी खेलिरहेका उनीहरूको सशुकल उद्धार गरिएको थियो।

डुंगा दुर्घटनामा परी तुलसीपुर उपमहानगरपालिका १२ का २८ वर्षीय हेमराज अधिकारी, बबई गाउँपालिका ५ का २७ वर्षीय रेशम बैंगा मगर र घोराही उपमहानगरपालिका १२ का २१ वर्षीय एन्जल बुढा मगर बेपत्ता रहेको भनेर आफन्तले प्रहरीमा जाहेरी दिएको दाङका प्रहरी प्रमुख एसपी सुरेश काफ्लेले जानकारी दिएका छन्।

जसमध्ये घोराहीका बुढाको परिवारले उनको मृत्यु कर्मसमेत गरिसकेको छ। आफन्त गुमाएका अन्य परिवार भने अन्यौलमा छन्। उनीहरूले अमेरिका पठाउने एजेन्टलाई हालसम्म २७ देखि ३५ लाखसम्म रकम बुझाएको बताएका छन्।दुर्घटनामा परी पर्वत कुश्माका दिनेश गौतम, पर्वतको ग्यादीका राजु गुरुङसहित सात नेपाली युवा अझै बेपत्ता छन्।

प्रकाशित मिति: बिहीबार, असार ३१, २०७८ १५:३२

प्रतिक्रिया दिनुहोस्