कांग्रेस वडा अधिबेशन सार्ने सहमति

राजनीति

गृहपृष्ठ
राजनीति
कांग्रेस वडा अधिबेशन सार्ने सहमति

कांग्रेस वडा अधिबेशन सार्ने सहमति

शुक्रबार, साउन ८, २०७८ बागेश्वरी पोस्ट

नेपालगन्ज । महाधिवेशनका विषयमा छलफल गर्न भन्दै १० बजे शुरु भएको नेपाली कांग्रेसको पदाधिकारी बैठक वडा तहको अधिवेशन सार्ने सहमतिपछि सकिएको छ ।

प्रधानमन्त्री एवम् पार्टी सभापति शेरबहादुर देउवाको निजी निवास बुढानीलकण्ठमा भएको बैठकमा नेताहरुबीच वडा तहको अधिवेशनको मिति संशोधन गर्ने तर केन्द्रीय महाधिवेशनको मितिलाई नचलाउने विषयमा सहमति बनेको हो।

वडा तहको अधिवेशन कहिले गर्ने भन्ने विषयमा भोलि (शनिवार) बस्ने पदाधिकारी बैठकले टुंगो लगाउने कांग्रेस नेता अर्जुननरसिंह केसीले जानकारी दिए ।

‘बैठक सकियो, वडा तहको अधिवेशनलाई सार्ने तर केन्द्रीय महाधिवेशनको मितिलाई नचलाउने विषयमा छलफल र सहमति भयो, थप निर्णय भोलि हुन्छ ।’ नेता केसीले हाम्राकुरासँग भने ।

बैठकमा वरिष्ठ नेता रामचन्द्र पौडेलले क्रियाशील सदस्यतामा देखिएको विवाद समाधान तर्फ नेतृत्वले ध्यान नदिएको प्रति गुनासो गरेका थिए । उनले नयाँ सदस्यता दिने नाममा पुरानालाई पाखा लगाइएको भन्दै आपत्ति जनाएका छन् ।

यस्तै समायोजनका नाममा विधि र प्रक्रिया मिचिएको र क्रियाशील सदस्यतामा देशभरि गडबडी गरिएको भन्दै पौडेलले सभापतिको ध्यानाकर्षण गराए ।

यसैगरी पूर्व महामन्त्री कृष्णप्रसाद सिटौलाले पार्टी कार्यालयमा जारी धर्ना तथा अनसनको अन्त्य गर्नेतर्फ ध्यान दिन सभापति देउवालाई आग्रह गरेका छन् ।

बैठकमा महामन्त्री पुर्णबहादुर खड्काले राजनीतिक अवस्थाका विषयमा धारणा राखे भने क्रियाशील सदस्यता छानबिन समितिका संयोजक नेता रमेश लेखकले सदस्यता छानबिनमा भएका प्रगति र देखिएको समस्याका बारेमा नेतृत्वलाई जानकारी दिए ।

बैठकमा सदस्यताको विवाद जिम्मेवारी तोक्ने विषयमा पनि नेताहरू सहमत भएका छन् । सकेसम्म आज नै अनसनमा बसेका जिल्ला तहका नेताहरूसँग वार्ता र सहमतिको प्रयास गर्ने नेताहरुबीच सहमति बनेको छ ।

प्रकाशित मिति: शुक्रबार, साउन ८, २०७८ १३:१४

प्रतिक्रिया दिनुहोस्