कांग्रेसले वडा अधिबेशन भदौमा गर्ने तयारी गर्दै

राजनीति

गृहपृष्ठ
राजनीति
कांग्रेसले वडा अधिबेशन भदौमा गर्ने तयारी गर्दै

कांग्रेसले वडा अधिबेशन भदौमा गर्ने तयारी गर्दै

आइतबार, साउन १०, २०७८ बागेश्वरी पोस्ट

नेपालगन्ज। क्रियाशील सदस्यताको विवादका कारण नेपाली कांग्रेसको १४औं महाधिवेशनको लागि पूर्व निर्धारित कार्यतालिका स्थगित भएको छ । केन्द्रको महाधिवेशनको मितिलाई नचलाइ अन्य तहका अधिवेशन स्थगित गरिएको बताइए पनि अब केन्द्रीय महाधिवेशन पनि प्रभावित हुने निश्चित देखिएको छ ।

शनिबार बसेको कांग्रेस पदाधिकारी बैठकले क्रियाशील सदस्यताको विवाद बढ्दै जाँदा १२ साउनबाट शुरु गर्ने भनेको वडा अधिवेशनदेखि केन्द्रीय महाधिवेशन तलका सबै अधिवेशन अर्को निणर्य नहुँदासम्मका लागि स्थगित गरिसकेको छ ।

कांग्रेस उच्च स्रोतका अनुसार अब भदौको पहिलो वा दोस्रो हप्ताबाट वडा तहको अधिवेशन शुरु गर्ने र भदौ र असोज भित्र सबै तहका अधिवेशन सकेर कार्तिकमा केन्द्रीय तहको महाधिवेशन गर्ने गरी कार्यतालिका बनाउने विषयमा छलफल भइरहेको छ ।

भदौ भित्र जसरी पनि अधिवेशनको प्रक्रिया शुरु गर्नै पर्छ, यो दबाब हामीमाथि छ, यो नैतिकताको पनि कुरा हो, भदौबाट अधिवेशन शुरु गर्ने र असोजमा सबै तहका अधिवेशन सकेर कार्तिकमा केन्द्रको महाधिवेशन गर्ने गरी छलफल भइरहेको छ,’ कांग्रेस उच्च स्रोतले भन्यो । सो प्रस्तावमाथि संस्थापन पक्ष भित्र छलफल भइसकेको छ ।

कांग्रेस सहमहामन्त्री डा प्रकाशसरण महतले क्रियाशिल सदस्यताको विवादबारे टुंगो लगाएपछि केही दिन भित्रमा नै सबै तहका अधिवेशनका लागि अर्को मिति तोकिने बताए । ‘पहिले सदस्यताको विवाद टुंगाउँछौं, त्यसपछि अधिवेशनको मिति सार्वजनिक हुन्छ,‘ महतले भने ।

कांग्रेसले यसअघी घोषणा गरेको कार्यतालिका अनुसार १२ साउनबाट वडा अधिवेशन शुरु भइसक्नु पर्ने थियो । यसैगरी गाउँ र नगरको अधिवेशन १६ साउन, प्रदेशसभा क्षेत्रीय अधिवेशन २० साउन, प्रतिनिधिसभा क्षेत्रीय अधिवेशन र एक मात्र प्रतिनिधिसभा निर्वाचन क्षेत्र भएको जिल्ला अधिवेशन २३ साउनका लागि तय गरिएको थियो । यस्तै एक भन्दा बढी प्रतिनिधिसभा निर्वाचन क्षेत्र भएको जिल्ला अधिवेशन २६ साउन र प्रदेश अधिवेशन १ र २ भदौ र केन्द्रीय महाधिवेशन १६ देखि १९ भदौसम्म काठमाडौंमा गर्ने भनिएको थियो ।

क्रियाशील सदस्यताका विषयमा विवाद बढ्दै जाँदा बारा, सर्लाही र धनुषाका जिल्ला तहका नेता कार्यकर्ता कांग्रेस पार्टी केन्द्रीय कार्यालयमा आमरण अनसन तथा धर्नामा छन्। उनीहरुले जिल्ला तहका पुराना नेता कार्यकर्तालाई नै छुटाएर क्रियाशिल सदस्यताको विवरण केन्द्रमा मनोमानी ढंगबाट पठाइएको भन्दै आपत्ति जनाउँदै आइरहेका छन् ।

सदस्यताका विषयमा विवाद हुँदा नेता रमेश लेखकको नेतृत्वमा कांग्रेसले बनाएको क्रियाशिल सदस्यता छानविन समितिले सदस्यताको विवरणलाई अन्तिम रुप दिन सकेको छैन । सो समितिले आगामी मंगलबार सदस्यताको सूचीलाई अन्तिम रुप दिएर सभापति शेरबहादुर देउवालाई बुझाउने तयारी गरिरहेको छ । समितिले सभापतिलाई सदस्यताको सूची नबुझाउँदासम्म वडातहका अधिवेशन शुरु हुने अवस्था छैन । त्यसै कारण कांग्रेसले तल्ला तहका अधिवेशन स्थगित गरेको हो ।

सदस्यताको विवादका कारण जारी धर्ना र अनसनरत पक्षसँग वार्ता र सहमतीको प्रयास गर्न कांग्रेसले सहमहामन्त्री डा। प्रकासरण महत र पूर्व सहमहामन्त्री डा रामशरण महतलाई जिम्मेवारी दिएको थियो । तर विवाद समाधनतर्फ ठोस प्रगति भएको छैन ।

हालसम्म देशभरका १६५ निर्वाचन क्षेत्र मध्ये कांग्रेसले १४३ निर्वाचन क्षेत्रको सदस्यता मात्रै टुंगाएको छ । २२ क्षेत्रमा भने विवाद देखिएको छ । विवाद देखिएकामा धेरै प्रदेश २ का जिल्ला छन् । यसैगरी ७० वटा भन्दा बढी वडाको विवादका कारण सदस्यता नै स्थगित गरिएको छ । सप्तरी र बारामा भने बढी विवाद देखिएको छ ।

प्रदेश १ मा सोलुखुम्बु र सुनसरी निर्वाचन क्षेत्र नं ४ मा विवाद कायमै छ । लुम्बिनीमा बाँके १, कपिलवस्तु ३ र प्यूठानमा विवाद कायमै छ भने सुदूरपश्चिमको डडेल्धुरा र कैलालीमा विवाद देखिएको छ । बागमतीको काभ्रे र सिन्धुपाल्चोकमा पनि विवाद देखिएको छ ।

कांग्रेस केन्द्रीय कार्यालयका अनुसार नयाँ र पुराना गरी विदेशबाट बाहेक आठ लाख ५० हजार २ सय ३२ जनाले क्रियाशील सदस्यता सम्वन्धि फाराम भरेका छन् । त्यसमध्ये चार लाख ४४ हजार १ सय ४१ नयाँ छन् । बाँकी पुराना सदस्यतामा भने विवाद छैन ।

विवादित स्थानका सदस्यता नटुंगिए १३ औं महाधिवेशनकै सदस्यतालाई आधार मानेर महाधिवेशन गर्न सिफारिस गर्ने छानविन समितिको तयारी छ ।

प्रकाशित मिति: आइतबार, साउन १०, २०७८ १४:४४

प्रतिक्रिया दिनुहोस्