लुम्बिनी प्रदेश सभा सदस्य विमला वली सम्पर्कविहिन

राजनीति

गृहपृष्ठ
राजनीति
लुम्बिनी प्रदेश सभा सदस्य विमला वली सम्पर्कविहिन

लुम्बिनी प्रदेश सभा सदस्य विमला वली सम्पर्कविहिन

शनिबार, साउन १६, २०७८ बागेश्वरी पोस्ट

नेपालगन्ज । लुम्बिनी प्रदेश सभा सदस्य विमला खत्री वली सम्पर्कविहिन भएकी छिन् ।

माओवादी केन्द्रको आज हुने भनिएको संसदीय दलको वैठकमा सहभागी हुन उनलाई तीन दिन अघिदेखि सम्पर्क गर्दै आएपनी वली सम्पर्कमा नभएको माओवादी केन्द्रले जानकारी दिएको छ।

मुख्यमन्त्री शंकर पोखरेलले विश्वासको मत लिने भनीरहेकै अवस्थामा सांसद वलीले माओवादी केन्द्र छाडेर एमाले रोजेको आशंका गर्न समेत थालिएको छ । सरकार अल्पमतमा परेकाले सरकार टिकाउने उपायस्वरुप विमलालाई सरकारकै मान्छेले दबाब र प्रलोभनमा पारेर एमालेमै फर्काएको हुनसक्ने माओवादी पार्टीले आशंका गरेको छ ।

दाङमा भएको उपनिर्वाचनमा तत्कालीन नेपाल कम्युनिष्ट पार्टी (नेकपा)बाट चुनाव जितेकी वलीले सर्वोच्चको फैसलाले नेकपा खारेज भएपछि माओवादी केन्द्र रोजेकी थिइन् ।

संसदीय दलको वैठकमा उपस्थित हुन सबै सांसदहरुलाई फोन गरेर सूचना दिने क्रममा वलीसँग सम्पर्क हुन नसकेको माओवादी केन्द्रले जानकारी दिएको छ। उनको घरमा जाँदा र निर्वाचन क्षेत्रभर खोज्दा पनि नभेटिएको माओवादी केन्द्रले जानकारी दिएको छ। ८३ सदस्यीय लुम्बिनी प्रदेशसभामा जसपाबाट मन्त्री बनेका तीन जना सांसद शुक्रबार पदमुक्त भएपछि मुख्यमन्त्री शंकर पोखरेल पुनः अल्पमतमा परेका छन् । मुख्यमन्त्रीको पक्षमा एमालेका ३८ सांसद मात्र छन् भने विपक्षी गठबन्धनमा ४१ मत छ । विमला एमालेमा फर्केपनि सरकारलाई बहुमत पुग्ने अवस्था छैन ।

प्रदेशमा नयाँ प्रदेश प्रमुख आएसँगै विपक्षी गठबन्धन विशेष अधिवेशनको समावेदन गरी मुख्यमन्त्रीविरुद्ध अविश्वास प्रस्ताव दर्ता गर्ने तयारीमा छ ।

प्रकाशित मिति: शनिबार, साउन १६, २०७८ ०८:४८

प्रतिक्रिया दिनुहोस्