पौडेल पक्षका जिल्ला सभापतिहरुको ठमेलका छलफल हुँदै

राजनीति

गृहपृष्ठ
राजनीति
पौडेल पक्षका जिल्ला सभापतिहरुको ठमेलका छलफल हुँदै

पौडेल पक्षका जिल्ला सभापतिहरुको ठमेलका छलफल हुँदै

सोमबार, साउन २५, २०७८ बागेश्वरी पोस्ट

नेपालगन्ज ।नेपाली काँग्रेसको १४औँ महाधिवेशन तोकिएको समयमा नहुने भएपछि काँग्रेस भित्रको संस्थापन इतर समूह आक्रामक बनेको छ । सोमबार बिहानै इतर समूहका वरिष्ठ नेता रामचन्द्र पौडेलले सभापति शेरबहादुर देउवामाथि चोटिलो प्रहार गर्दै असफल व्यक्ति सधैँ सत्तामा पुग्ने गरेको सामाजिक सञ्जालमार्फत लेखेका थिए । ‘यो देशकै विडम्बना हो, सर्वत्र असफल व्यक्तिहरू बारम्बार सत्ता सम्हाल्न पुग्छन्,’ पौडेलले सामाजिक सञ्जाल फेसबुकमा लेखेका छन् ।

सो समूहले महाधिवेशन तोकिएको समयमा नगर्ने पक्का भएपछि पार्टी सभापतिमाथि दबाब बढाउन आज र भोलिका लागि काठमाडौँमा आफू निकट जिल्ला सभापतिहरूलाई छलफलका लागि बोलाएको छ भने आज नै आफू निकट केन्द्रीय सदस्यहरूलाई महामन्त्री डा.शशाङ्क कोइरालाको निवासमा डाकिएको छ ।

जिल्ला सभापति रणनीति बनाउँदै

पार्टीको पूर्व घोषित समयमा महाधिवेशन नहुने भएपछि वरिष्ठ नेता पौडेल समूहका जिल्ला सभापतिहरू काठमाडौँ आएका छन् । उनीहरू क्रियाशील सदस्यताको विवादका कारण महाधिवेशन धकेल्ने खेल सुरु भएको भन्दै सभापति देउवामाथि दबाब बढाउन काठमाडौँ आएका हुन् । जिल्ला सभापति बैठक ठमेलस्थित होटेल यात्रीमा सुरु भएको छ ।

भेलामा ३५ जिल्ला भन्दा बढीबाट सभापतिहरू सहभागी भएको नुवाकोट काँग्रेस सभापति जगदिशनरसिंह केसीले जानकारी दिए । उनका अनुसार अरू केही जिल्ला सभापतिहरूसमेत बैठकमा सहभागी हुन आउँदै छन् । क्रियाशील सदस्यताको विवादका कारण महाधिवेशन हुन नदिने अवस्थालाई रोक्न र समयमा नै महाधिवेशन हुने वातावरण बनाउनेतर्फ छलफल गर्न उपलब्ध जिल्ला सभापतिहरू एक ठाउँ छलफलमा बसेको उनले जानकारी दिए ।

छलफलमार्फत तत्काल महाधिवेशनको मिति तोक्न, सदस्यताको विषयमा देखिएको विवाद समाधान गर्न, पार्टी समायोजनका नाममा भएका मनपरी रोक्न नेतृत्वसँग माग गरिने अर्का एक जिल्ला सभापतिले जानकारी दिए । भेलाले वडा तहदेखि केन्द्रीय तहसम्मको महाधिवेशनको नयाँ कार्य तालिका ल्याउँदा पहिले तोकिएका मितिको अन्तर घटाएर सम्भव भएसम्मका तहका अधिवेशनलाई एकै दिन गर्ने गरी कार्य तालिका ल्याउनसमेत माग गर्ने बताइएको छ ।

३ बजे केन्द्रीय सदस्यको बैठक

पौडेल समूहले आज नै पार्टीको महाधिवेशन र हाल देखिएका क्रियाशील सदस्यताको विवादबारे छलफल गर्न आफू निकट केन्द्रीय सदस्यहरूलाई बोलाएको छ ।
दिउसो ३ बजे महामन्त्री डा. शशाङ्क कोइरालाको निवासमा बस्ने बैठकमा महाधिवेशनमा भइरहेको ढिलाइका विषयमा छलफल हुने बताइएको छ भने सदस्यताको विवादका बारेमा समेत आफू निकट नेताहरूलाई जानकारी गराइने छ ।

प्रकाशित मिति: सोमबार, साउन २५, २०७८ १४:१६

प्रतिक्रिया दिनुहोस्