बागेश्वरीपोष्टको ६ बर्षः गर्विलो कार्यानुभव

समाचार

गृहपृष्ठ
समाचार
बागेश्वरीपोष्टको ६ बर्षः गर्विलो कार्यानुभव

बागेश्वरीपोष्टको ६ बर्षः गर्विलो कार्यानुभव

शुक्रबार, साउन २९, २०७८ बागेश्वरी पोस्ट

२०७२ साल साउन २९ गते अर्थात् आजैका दिनदेखि बागेश्वरीपोष्ट डटकम पाठकमाझ पस्किएका हौं । अविछिन्न समाचार पस्केको आज ६ बर्ष पूरा भएको छ । पत्रकारिताको धर्म र मर्मलाई आत्मसाथ गर्दै निरन्तर समाचार कर्ममा समर्पित बागेश्वरीपोष्ट विश्वासिलो अनलाइन न्यूज पोर्टलका रुपमा स्थापित भएको हाम्रो विश्वास छ । सत्य, तथ्य र विश्वसनीय कन्टेन्ट पस्कन कुनै कसर बाँकि नराखेको हाम्रो ६ बर्षको 'गर्विलो कार्यानुभव' छ । सेतोलाई सेतो-कालोलाई कालो भन्ने धर्मबाट हामी डग्मगाएका छैनौं ।

बाँकेको नेपालगञ्ज बेलासपुरमा केन्द्रिय कार्यालय रहेको बागेश्वरीपोष्ट मूलतः बाँकेसहित लुम्बिनी प्रदेशमा बढी केन्द्रित छ । त्यसो त आमचासोका राजनीतिक, सामाजिक, आर्थिक लगायत समसामयिक विषयलाई पनि हामीले भरपुर समेट्ने पर्यत्न गरेका छौं । समाचार रेखा कुनै भूगोल र स्थान विशेषको मात्रै हुँदैन भन्ने तथ्यलाई हृदयंगम गरी हामी 'ओपन' छौं । जनरुचीका कन्टेन्ट हाम्रो प्राथमिकता हो । पछिल्लो समय आमपाठकको भरपर्दो खोजीको प्लेटफर्म बनेको 'डिजिटल पत्रिका' अनलाइन पोर्टलले आफ्नो विश्वास कायमै राख्न तमाम चुनौती छन् । ती चुनौतिका बाबजुद् हामीप्रतिको विश्वास खण्डहर हुन नदिन पर्यत्नशील छौं ।

औपचारिक कार्यक्रमदेखि खोजमूलक समाचारसंगै भिडियो सामग्री समेत पस्कने हाम्रो हरसम्भव प्रयास छ । आमपाठकले बागेश्वरीपोष्ट डटकम 'मेरो अनलाइन न्यूज पोर्टल हो' भन्ने आभाष दिलाउन सक्नुपर्दछ भन्ने हाम्रो मूल ध्येय हो । 'कसैलाई बनाइदिने' वा 'कसैलाई सिध्याइदिने' कुत्सित मनसाय हाम्रो दिमागमा छैन । 'जे हुन्छ त्यही समचार बन्छ' भन्ने मूल मन्त्र हामी अंगाल्छौं । पेशागत मर्यादाको 'लक्ष्मणरेखा' कुल्चने धृष्टता हामी गर्दैनौं । आचारसंहिताको बन्धनभित्र हाम्रो समाचार कर्म निरन्तर चलिरहनेछ । हामी बागेश्वरीपोष्टलाई जुग जुग बाँच्ने अनलाइन पोर्टल बनाउन चाहन्छौं । हामी जुन भूमीमा कर्म गरिरहेका छौं, त्यस भूमीप्रति हाम्रो अझ बढी दायित्व हुने यथार्थलाई मनन गर्दै स्थानीय कन्टेन्टमा हाम्रो केही बढी 'दिलचश्पी' रहने कुरा अतिशयोक्ति हुँदन होला भन्ने हामीलाई लागेको छ ।

हालसम्म पाठक बर्गले गर्नुभएको अपार मायालाई हृदयंगम गर्दै हामी अझ परिष्कृत ढंगले समयसापेक्ष हुने कोशिस निरन्तर गर्छौं । सबै पाठकले खोजी खोजी पढ्ने अनलाइन पोर्टल बनाउने 'अर्जुनदृष्टि' हाम्रो हुनेछ । निकट भविष्यमा अनलाइन टिभीको उत्कृष्ट अभ्यास गर्ने गरी अघि बढ्ने हाम्रो योजना छ ।

अन्त्यमा, हामीलाई यो स्थानसम्म आइपुग्न सहयोग गर्नुहुने पाठक बर्ग, विज्ञापनदाता र समस्त सुभचिन्तकहरुप्रति अनुग्रही रहँदै धन्यवाद ज्ञापन गर्दछौं ।

प्रकाशित मिति: शुक्रबार, साउन २९, २०७८ ०९:०४

प्रतिक्रिया दिनुहोस्