'चाचाजी' को जन्मजयन्ती मनाइयो

समाचार

गृहपृष्ठ
समाचार
'चाचाजी' को जन्मजयन्ती मनाइयो

'चाचाजी' को जन्मजयन्ती मनाइयो

आइतबार, भदौ २७, २०७८ बागेश्वरी पोस्ट

नेपालगन्ज । प्रेस स्वतन्त्रता सेनानी स्व. पन्नालाल गुप्त प्रतिष्ठान नेपालगन्जले प्रेस स्वतन्त्रता सेनानी स्व. पन्नालाल गुप्त 'चाचाजी' को ९३औं जन्मजयन्ती मनाएको छ । प्रेस स्वतन्त्रता सेनानी स्व. पन्नालाल गुप्त प्रतिष्ठानका अध्यक्ष विजय कुमार गुप्ताको अध्यक्षता एवं नेपालगन्ज उपमहानगरपालिकाका उपमेयर उमा थापा मगरको प्रमुख आतिथ्यतामा जन्मजयन्ती मनाइएको हो ।

त्यस अवसरमा बोल्ने बक्ताहरुले 'चाचाजी' पत्रकारिता जगतका लागि अनुकरणीय ब्यक्तित्व भएको बताउँदै उहाँको पदचाप पछ्याउन सके उहाँप्रति सच्चा सम्मान हुने बताए । सादगी जीवन शैली, कर्तव्यनिष्ठ कर्म र निरन्तरको साधना 'चाचाजी' का गहना भएकाले यसको अनुशरणमा अबको पुस्ताले ध्यान दिनुपर्नेमा सबैको जोड थियो ।

प्रमुख अतिथि उपमेयर थापा मगरले 'चाचाजी' को योगदानको कदर गर्दै नेपालगन्ज त्रिभुवन चोक पूर्वको सडकको नामाकरण उहाँको नामबाट गर्न खोजे पनि अनावश्यक विवाद सिर्जना गरिएको बताउनुभयो । उहाँले 'चाचाजी'को सम्मानका खातिर उपमहानगरपालिका सधैं प्रतिवद्ध रहेको बताउनुभयो ।

प्रेस काउन्सिलका सदस्य शरद अधिकारीले पन्नालाल गुप्त नेपाली पत्रकारिताको मूर्धन्य ब्यक्तित्व भएकाले उहाँले देखाएको बाटोलाई पछ्याउन सके उहाँप्रति सच्चा सम्मान हुने बताउनुभयो । नेपाल पत्रकार महासंघ बाँकेका अध्यक्ष दामोदर भण्डारीले पत्रकारिताका धरोहर 'चाचाजी' ले प्रकाशित गर्दै आएको किरण साप्ताहिकको प्रकाशन बन्द भएकाले अब महासंघले प्रकाशन गर्ने घोषणा गर्नुभयो । प्रतिष्ठानका अध्यक्ष गुप्ताले पत्रकारिता पढ्ने विद्यार्थीलाई स्वर्गीय गुप्तको नामबाट छात्रवृत्ति दिने घोषणा गर्नुभयो ।

प्रतिष्ठानका सदस्य सुनिल कुमार गुप्ताले स्वागत मन्तव्य ब्यक्त गर्नुभएको कार्यक्रममा वरिष्ठ साहित्यकार सनत रेग्मी, वरिष्ठ कलाकार श्यामानन्द सिंह ठकुरी, नेपाल पत्रकार महासंघ बाँकेका पूर्व अध्यक्षद्वय झलक गैरे, रुद्र सुवेदी, जिल्ला प्रहरी कार्यालय बाँकेका प्रवक्ता प्रहरी नायब उपरीक्षक मधुसुदन न्यौपाने, नेपाल पत्रकार महासंघका लुम्बिनी प्रदेश सदस्य मो.आरिफ अन्सारी, अवधि पत्रकार संघका केन्द्रिय अध्यक्ष राकेश कुमार मिश्र, नेपाल प्रेस युनियन बाँकेका अध्यक्ष अर्जुन वलीले स्वर्गीय 'चाचाजी' को व्यक्तित्वमाथि चर्चा गर्नुभएको थियो । कार्यक्रमको संचालन प्रतिष्ठानका महासचिव शुक्रऋषि चौलागाईले गर्नुभएको थियो ।

प्रकाशित मिति: आइतबार, भदौ २७, २०७८ २०:३६

प्रतिक्रिया दिनुहोस्