फेरि निराश बाँकेका कांग्रेसजन !

राजनीति

गृहपृष्ठ
राजनीति
फेरि निराश बाँकेका कांग्रेसजन !

फेरि निराश बाँकेका कांग्रेसजन !

शनिबार, असोज २, २०७८ बागेश्वरी पोस्ट

नेपालगन्ज । बाँकेको क्रियाशील सदस्यता विवाद सुल्झिने कुरो 'माछो माछो भ्यागुतो' जस्तो भएको छ । सुखद् खबरको पर्खाइमा रहेका बाँकेका कांग्रेसजन आज पनि निराश बनेका छन् ।

आज बाँकेसहित बाँकी जिल्लाको सदस्यता टुंगिने भनिएपनि थप केही जिल्लाको विवाद समाधान हुँदा बाँकेको अन्तिम नामावली भने आउन सकेन । क्षेत्र नम्बर १ को विवाद पेचिलो बनेका कारण समस्या सुल्झिन बिलम्ब भइरहेको नेताहरु बताउँछन् । बाँकेको विवादलाई अनावश्यक गिजोलेर प्रतिष्ठाको विषय बनाइएकाले समस्या बढेको नेताहरुको दाबी छ । नेतृत्वमा बस्नेहरुले विधान र प्रकियाको हुर्मत लिँदै आफूखुसी आफ्नो अनूकुल काम गर्दा अधिवेशन नै बन्धक बनेको स्थानीय नेता कार्यकर्ताहरु बताउँछन् ।

आज जसरी पनि बाँकी सबै जिल्लाको छिनोफानो गरेर अन्तिम नामावली निर्वाचन समितिलाई बुझाउने भनिएपनि खास प्रगति हुन सकेन । यो समाचार तयार पार्दासम्म बाँकेको विवाद मिल्न सकेको छैन । अहिले पनि सहमतिको प्रयास भइरहेको काठमाण्डौमा रहेका बाँके कांग्रेसका युवा नेता पोषण केसीले बताए ।

अब बाँकेमा असोज ५ गते वडा अधिवेशन हुने सम्भावना कम छ । भोलिसम्म टुंगिएमा पनि निर्वाचनको तयारीका लागि समय नपुग्ने भएकाले बाँकेमा संभवत: असोज ७ गते वडा अधिवेशन हुने कांग्रेस नेताहरु बताउँछन् । यसले गर्दा जिल्लामा सबै तहका अधिवेशन २/३ दिन पछाडि धकेलिने सम्भावना रहेको नेपाली कांग्रेस नेपालगन्ज नगर सभापति प्रशान्त विष्ट बताउँछन् ।

क्रियाशील नामावली आएपछि ३/४ दिनको तयारी समय राखेर केन्द्रिय निर्वाचन समितिले तोकेकै मितिको सेरोफेरोमा पार्टी पंक्तिसंग छलफल गरेर निर्वाचन कार्यक्रम तय गर्ने प्रमुख निर्वाचन अधिकृत वरिष्ठ अधिबक्ता रेवतीरमण भट्टराईले बताए । "तयारीका लागि कम्तीमा ३/४ दिनको समय चाहिन्छ, आज भोलिमा नामावली टुंगियो भने ७ गतेसम्म वडा अधिवेशन गर्न सकिन्छ," उनले भने-"हरेक तहका अधिवेशन २/३ दिन पछाडि सारेर २० गतेसम्म जिल्ला अधिवेशन गर्न सकिन्छ ।" दाङ निवासी भट्टराईले नामावली नटुंगिँदा आफू अझै बाँके आउन नसकेको बताए । टुंगिने बित्तिकै म नेपालगन्ज आउँछु र निर्वाचन कार्यक्रम अघि बढाउँछु," उनले भने ।

प्रकाशित मिति: शनिबार, असोज २, २०७८ २१:०४

प्रतिक्रिया दिनुहोस्