दाङका तीन गाउँपालिकामा सर्वसम्मत सभापति चयन

राजनीति

गृहपृष्ठ
राजनीति
दाङका तीन गाउँपालिकामा सर्वसम्मत सभापति चयन

दाङका तीन गाउँपालिकामा सर्वसम्मत सभापति चयन

७ वटा पालिकामा भोली निर्वाचन

शुक्रबार, असोज ८, २०७८ बागेश्वरी पोस्ट

नेपालगन्ज । दाङका तीन वटा पालिकामा कांग्रेसले सर्वसम्मत नयाँ नेतृत्व चयन गरेको छ । १४ औं महाधिवेशन अन्तर्गत् पालिका अधिवेशनमा शान्तिनगर, बंगलाचुली र राप्ती गाउँपालिकामा सर्वसम्मत नेतृत्व चयन गरिएको हो । आज मनोनयन दर्ता गर्दा यी तीन पालिकामा निर्विरोध नेतृत्व चयन भएको हो ।

दाङका १० वटा पालिकामा भोली नयाँ नेतृत्व चयनका लागि निर्वाचन हुँदैछ । १० मध्ये ३ वटामा निर्विरोध भएपछि अब ७ वटामा मात्र भोली निर्वाचन हुनेछ । शान्तिनगरमा भने सचिवमा सर्वसम्मत हुन सकेको छैन । पश्चिम दाङको शान्तिनगर गाउँपालिका सभापतिमा झलक केसी निर्विरोध निर्वाचित भएका छन् । त्यस्तै उपसभापतिमा लाल बहादुर बुढाथोकी र द्रोण बहादुर खत्री निर्वाचित भएका छन् । सहसचिबमा भागीराम रावत निर्विरोध भएका छन् ।

शान्तिनगरका नवनिर्वाचित सभापति केसी कांग्रेस केन्द्रिय सदस्य एवं पूर्व मन्त्री दीपक गिरीसंग निकट छन् । गिरीको निर्वाचन क्षेत्रमा पर्ने यो गाउँपालिका जिल्ला सचिव शंकर डाँगीको गाउँपालिका हो । कांग्रेसको आधार बलियो मानिने यो क्षेत्रमा पालिका अध्यक्ष र उपाध्यक्ष दुबै कांग्रेसले नै जितेको छ ।

त्यस्तै उत्तर पूर्वी पहाडी भूभागमा पर्ने बंगलाचुलीको सभापतिमा जागेश्वर अधिकारी निर्विरोध निर्वाचित भएका छन् । उपसभापतिमा इन्द्रमणि वली र द्रोर्ण खत्री, सचिव वलदेव मल्ल र चेतबहादुर डाँगी, सहसचिवमा गणेश बिक र केयरसिंह गाहा मगर सर्वसम्मत भएका छन् ।

लुम्बिनी प्रदेशको राजधानीको केन्द्र तोकिएको देउखुरी उपत्यकास्थित राप्ती गाउँपालिकामा विद्याशरण चौधरी सभापति चुनिएका छन् । उपसभापतिमा श्यामा रावत र प्रशान्त भुषाल, सचिवमा तीर्थराज ज्ञवाली र चैन कुमार चौधरी तथा सहसचिवमा लक्ष्मण आचार्य र शिरबहादुर कार्की सर्वसम्मत चयन छन् ।

दुई उपमहानगरपालिका तुलसीपुर र घोराहीमा भने दुई प्यानलका वीचमा प्रतिष्पर्धा हुँदैछ । तुलसीपुरमा नगर सभापतिका लागि सुरेश हमाल र अनिल कार्कीले उम्मेदवारी दिएका छन् भने घोराहीमा निरज गिरी र तिलक रावतको उम्मेदवारी परेको छ । केन्द्रिय सदस्य गिरीको गृहपालिका दंगीशरण गाउँपालिकामा शम्भु गिरी र हर्क बहादुर बुढाथोकीको गाउँ सभापतिमा उम्मेदवारी परेको छ । लमही नगरपालिकाको सभापतिमा शिव प्रसाद चौधरी र सन्तोष बुढाथोकीको उम्मेदवारी परेको छ ।

बबई गाउँपालिकाको सभापतिमा प्रकाश बस्नेत र पर्साराम भुषाल, गढवा गाउँपालिकामा कृष्णराज पाण्डे र किरण पौडेलको उम्मेदवारी परेको छ । राजपुर गाउँपालिकामा पनि भोली निर्वाचन हुँदैछ ।

प्रकाशित मिति: शुक्रबार, असोज ८, २०७८ २०:०५

प्रतिक्रिया दिनुहोस्