बन्लान् त बाँकेका गजेन्द्र हमाल मन्त्री ?

राजनीति

गृहपृष्ठ
राजनीति
बन्लान् त बाँकेका गजेन्द्र हमाल मन्त्री ?

बन्लान् त बाँकेका गजेन्द्र हमाल मन्त्री ?

शुक्रबार, असोज २२, २०७८ बागेश्वरी पोस्ट

गजेन्द्र हमाल

नेपालगन्ज । बाँकेका पुराना कांग्रेस नेता गजेन्द्र हमाल पनि मन्त्री बन्ने चर्चा चलेको छ । प्रधानमन्त्री शेरबहादुर देउवाले आज बिस्तार गर्न लागेको मन्त्रीपरिषदमा हमाल पनि अटाउने चर्चा चलेको हो । केही दिनदेखि उनी मन्त्री बन्ने लाइनमा रहेको चर्चा चलिरहेको थियो ।

कांग्रेस सभापति तथा प्रधानमन्त्री शेर बहादुर देउवा निकट हमाललाई प्रधानन्यायाधीश चोलेन्द्र शमशेरले राणाले पनि मन्त्री बनाउन आग्रह गरेको बताइन्छ । हमाल प्रधानन्यायाधीश राणाका जेठान हुन् । प्रधानमन्त्री निकट स्रोतका अनुसार हमाललाई पनि मन्त्री बनाइँदैछ । उनी उद्योग बाणिज्य तथा आपूर्ति मन्त्री बन्ने सम्भावना रहेको बताइएको छ ।

हमालको पारिवारिक स्रोतले पनि उनी मन्त्री बन्ने सम्भावनालाई नकारेको छैन । "आफ्नो राजनीतिक जीवनको सुरुवातदेखि नै उहाँले शेरबहादुर दाईलाई सहयोग गर्नुभएको छ, उहाँलाई नै साथ दिनुभएको छ, उहाँकै पछाडि हुनुहुन्छ, त्यसकारण उहाँ (हमाल) मन्त्री बन्न सक्नुहुन्छ," पारिवारिक स्रोतले भन्यो । हमाल अहिले काठमाण्डौमा छन् । हमाल अहिले सांसद छैनन् तर संविधान अनुसार गैरसांसद ब्यक्ति ६ महिनासम्म मन्त्री बन्न पाउने ब्यवस्था छ ।

को हुन् गजेन्द्र हमाल ?
नेपालगन्ज निवासी हमाल २०२८ सालमा शेरबहादुर देउवा नेपाल विद्यार्थी संघको केन्द्रिय अध्यक्ष हुँदा नेविसंघको बाँके जिल्ला अध्यक्ष थिए । २०३९ र २०४४ मा वडा अध्यक्ष बनेका हमाल २०५३ सालमा नेपाली कांग्रेस बाँकेका सभापति बनेका थिए । पार्टी विभाजन हुँदा उनले शेरबहादुर देउवालाई साथ दिएका थिए । त्यसपछि उनी नेपाली कांग्रेस प्रजातान्त्रिकको बाँके जिल्ला सभापति भए । २०६४ सालको पहिलो संविधानसभा निर्वाचनमा हमाल बाँके क्षेत्र नम्बर १ मा उम्मेदवार बनेका थिए । तर, उनी पराजित भए । उनी लुम्बिनी प्रदेश सांसद सुरेन्द्र हमालका दाई हुन् ।

प्रकाशित मिति: शुक्रबार, असोज २२, २०७८ ०७:२१

प्रतिक्रिया दिनुहोस्