किशोरकिशोरीलाई पब्लिक स्पिकिङ तालिम

समाचार

गृहपृष्ठ
समाचार
किशोरकिशोरीलाई पब्लिक स्पिकिङ तालिम

किशोरकिशोरीलाई पब्लिक स्पिकिङ तालिम

बुधबार, कात्तिक १०, २०७८ बागेश्वरी पोस्ट

नेपालगञ्ज । परम्परागत हानीकारक अभ्यास न्यूनीकरणका लागि यौन तथा प्रजनन स्वास्थ्य अधिकार र पब्लिक स्पिकिङ सम्बन्धि तालिम नेपालगञ्जमा सम्पन्न भएको छ । नेपालगञ्ज उपमहानगरपालिका र जानकी गाउँपालिकाका किशोरकिशोरीहरुका लागि आयोजित तीन दिने तालिम बुधबार सम्पन्न भएको हो । नेपालगञ्जका दुई छुट्टाछुट्टै स्थानमा आयोजित छुट्टाछुट्टै तालिममा नेपालगञ्ज र जानकी दुबै पालिकाका ३०/३० जना किशोरकिशोरीहरुको सहभागिता थियो ।

प्लान इन्टरनेशनल नेपालको सहयोग तथा सामाजिक सचेतन सरोकार मञ्च (स्याक) नेपालको आयोजनामा सञ्चालित तालिममा परम्परागत हानीकारक अभ्यासको परिचय, यसका कारण, असर, न्यूनीकरणका उपाय र किशोरकिशोरीको भूमिका, पब्लिक स्पिकिङ के हो, यसका फाइदा र महत्व, पब्लिक स्पिकिङ गर्दा ध्यान दिनुपर्ने कुरा, गर्न नहुने काम, राम्रो पब्लिक स्पिकर बन्ने तरिकाका बारेमा पत्रकार नवीन गिरी र यौन तथा प्रजनन स्वास्थ्य अधिकारका विषयमा स्वास्थ्यकर्मी बसुन्धरा ज्ञवालीले सहजीकरण गरेका थिए ।

यौन तथा प्रजनन स्वास्थ्य अधिकारका विषयमा किशोरकिशोरीलाई सुसूचित गर्दै जागरुक बनाउने, जनमानसका बीचमा आफ्ना कुरा प्रष्टसंग राख्न सक्षम गराउने तथा बालविवाह जस्ता हानीकरक परम्परागत अभ्यास विरुद्धका मुद्दाहरुमा सशक्त ढंगले प्रस्तुत हुन सक्ने बनाउन तालिमको आयोजना गरिएको स्याकका बालविवाह रोकथाम परियोजना प्रमुख जगदिश थापाले बताए । तालिम समापन कार्यक्रमा स्याकका अध्यक्ष शिवलाल पाण्डेले तालिममा सिकेका कुराहरुलाई व्यवहारमा उतार्न सके त्यसको सार्थकता रहने भन्दै बालविवाह जस्ता कुरितीका विरुद्ध सशक्त आवाज बुलन्द गर्न आग्रह गरे । उनले बालविवाह अन्त्यका लागि किशोरकिशोरीको भूमिका अहम् रहने भन्दै आफ्नो यौन तथा प्रजनन स्वास्थ्य अधिकारको सुरक्षाका लागि गम्भीर बन्न आग्रह गरे ।

नेपालगञ्ज उपमहानगरपालिकाका किशोरीहरुको लागि आयोजित तालिमको व्यवस्थान स्याक नेपालका फिल्ड सुपरभाइजर अक्लिम खान र जानकीका किशोरकिशोरीहरुका लागि आयोजित तालिमको व्यवस्थापन अर्मिला रोकायले गर्नुभएको थियो ।

तालिमको झलक(फोटोफिचर)

No description available.