लुम्बिनी प्रदेशको कांग्रेस सभापतिमा पुनको उम्मेदवारी घोषणा

राजनीति

गृहपृष्ठ
राजनीति
लुम्बिनी प्रदेशको कांग्रेस सभापतिमा पुनको उम्मेदवारी घोषणा

लुम्बिनी प्रदेशको कांग्रेस सभापतिमा पुनको उम्मेदवारी घोषणा

सोमबार, कात्तिक २२, २०७८ बागेश्वरी पोस्ट

अमरसिंह पुन

नेपालगञ्ज । नेपाली कांग्रेस बाँकेले आइतबार एक सूचना जारी ग¥यो । सूचनामा झण्डै आधा दर्जन कांग्रेस नेताहरु सोमबार नेपालगञ्ज आउन लागेकाले पार्टी कार्यालयमा कार्यकर्ता भेटघाट कार्यक्रम राखिएको खबर थियो । सबै नेता कार्यकर्ता तथा शुभेच्छुकलाई विहान ११ बजे पार्टी कार्यालयमा उपस्थितिका लागि आग्रह गरिएको थियो । नेताहरु आउन ढिला हुँदा कार्यक्रम झण्डै पौने १ बजे सुरु भयो ।

लुम्बिनी प्रदेशको कांग्रेस राजनीतिमा प्रभाव राख्ने नेताहरुको आगमनलाई सबैले कांग्रेसको चलिरहेको १४औं महाधिवेशनको सन्दर्भसंग जोडेर बुझ्नु अन्यथा थिएन । सबैले नेताहरुको जिल्ला दौडाहालाई त्यही रुपमा बुझे । पुरानादेखि नयाँ पुस्ताका नेता कार्यकर्ता पनि त्यही लयमा पार्टी कार्यालयमा जम्मा भए । बाहिरबाट आएका नेताहरुको टोलीमा लुम्बिनी प्रदेश सरकारका उर्जा, जलस्रोत तथा सिंचाई मन्त्री बीर बहादुर राना, पर्यटन, ग्रामीण तथा सहरी विकास राज्यमन्त्री रिना नेपाल, रोल्पा जिल्ला सभापति तथा पूर्व सिंचाई राज्यमन्त्री अमरसिंह पुन, कपिलबस्तु सभापति तथा पूर्व सिंचाई राज्यमन्त्री सुरेन्द्र आचार्य, राष्ट्रिय योजना आयोगका पूर्व उपाध्यक्ष डा.गोविन्द पोखेरल सहभागी थिए ।

उनीहरु सबैले बाँकेका कार्यकर्तालाई सम्बोधन गरे । जारी अधिवेशनमा सके सर्वसम्मत नभए स्वस्थ प्रतिष्पर्धाबाट नेतृत्व चुन्न सुझाए । सुदृढ कांग्रेस बनाउने अभियानलाई सबैले एकताबद्ध भएर सफल पार्न आह्वान गरे । त्यसैक्रममा बोल्ने बक्ताहरु मध्ये एक जनाले उपस्थित नेता कार्यकर्ताको अनुमानलाई पुष्टि गर्दै नेपाली कांग्रेस लुम्बिनी प्रदेशको सभापति पदमा उम्मेदवारी घोषणा गरे । नेपाली कांग्रेस रोल्पाका सभापति अमरसिंह पुनले लुम्बिनीमा सुदृढ कांग्रेस बनाउने आफ्नो अठोटलाई पूरा गर्न आफूलाई सभापति पदमा सघाउन अपिल गरे । "लुम्बिनीमा कांग्रेसको संगठन बलियो बनाउन मैले सभापति पदमा उम्मेदवारी दिँदैछु, तपाईंहरुको सहयोग, समर्थन र आशिर्वाद चाहियो," पुनले कार्यकर्ता भेटघाटमा भने ।

उनले यसअघि नै सभापतिमा इच्छा ब्यक्त गरेपनि औपचारिक घोषणा गरेका थिएनन् । पुन कांग्रेसभित्र संस्थापन इतर (रामचन्द्र पौडेल) समूहका नेता हुन् । उनीहरु सोमबार नै बर्दिया पुगेका छन् । मंगलबार दाङ जाँदैछन् । उनी बाहेक संस्थापन इतर समूहबाट बर्दिया सभापति तथा पूर्व सिंचाई मन्त्री सञ्जय गौतमलाई पनि सम्भावित उम्मेदवारका रुपमा हेरिएको छ । संस्थापन (शेरबहादुर देउबा) समूहबाट भने दाङका राजु खनाल र नवलपरासीका देवेन्द्रराज कँडेलेको चर्चा छ ।

प्रकाशित मिति: सोमबार, कात्तिक २२, २०७८ १५:५३

प्रतिक्रिया दिनुहोस्