बाँके कांग्रेसको अधिवेशन तयारी कसरी हुँदैछ ? (भिडियो)

राजनीति

गृहपृष्ठ
राजनीति
बाँके कांग्रेसको अधिवेशन तयारी कसरी हुँदैछ ? (भिडियो)

बाँके कांग्रेसको अधिवेशन तयारी कसरी हुँदैछ ? (भिडियो)

बुधबार, कात्तिक २४, २०७८ बागेश्वरी पोस्ट

प्रमुख निर्वाचन अधिकृत रेवतीरमण भट्टराई

नेपालगञ्ज । नेपाली कांग्रेस बाँकेको अधिवेशनका लागि तयारी तीब्र पारिएको छ । बाँकेमा हुने अधिवेशनका लागि केन्द्रिय निर्वाचन समितिले प्रमुख निर्वाचन अधिकृत तोकेका बरिष्ठ अधिबक्ता रेवतीरमण भट्टराई बाँके आएपछि निर्वाचन तयारीले तीब्रता पाएको हो । कार्तिक २७ गते ८१ वटै वडामा वडा अधिवेशन हुँदैछ । त्यसपछि क्रमशः कार्तिक ३०, मंसिर ३, मंसिर ६ र मंसिर १० मा पालिका, प्रदेशसभा, प्रतिनिधिसभा र जिल्ला अधिवेशन सम्पन्न हुनेछन् ।

मंगलबार बाँके आइसकेपछि अधिवेशन सफलतापूर्वक सम्पन्न गर्नका लागि पार्टीका नेता कार्यकर्तासंग छलफल गरेका प्रमुख निर्वाचन अधिकृत भट्टराईले मंगलबार नै पार्टीका शुभेच्छुक संगठनका प्रतिनिधिहरुसंग बैठक बसेर निर्वाचन परिचालन समिति गठन गरेका छन् । उनले अधिवक्ता चित्र बहादुर शाहीलाई सहायक निर्वाचन अधिकृतमा मनोनयन गरेका छन् । निर्वाचन परिचालन समितिमा शुभेच्छुक संगठनका अध्यक्ष एवम् प्रतिनिधि सदस्य रहेका छन् । डिएलए, नेपाल शिक्षक संघ, नेपाल प्राध्यापक संघ, नेपाल प्रेस युनियनका अध्यक्ष एवम् प्रतिनिधि समितिमा रहेको भट्टराईले बताए ।

भट्टराईको संयोजकत्वमा रहेको समितिको सह-संयोजकमा सहायक निर्वाचन अधिकृत शाही तथा सदस्यहरुमा वरिष्ठ अधिवक्ता भोलासिंह हमाल, डिएलए बाँकेका अध्यक्ष ईश्वरीप्रसाद ज्ञवाली, नेपाल शिक्षक संघ बाँकेका अध्यक्ष बीरेन्द्र यादव, नेपाल प्रेस युनियन बाँकेका अध्यक्ष अर्जुन ओली रहनुभएको छ । यस्तै सदस्यहरुमा शिक्षक संघ बाँकेका उपाध्यक्ष पुष्पा ज्ञवाली, संघका सचिव ऋषिराज शर्मा, अधिवक्ता प्रभाकर भट्टराई र अधिवक्ता मेहरसिंह खत्री छन् ।

बागेश्वरी पोष्टसंग कुराकानी गर्दै प्रमुख निर्वाचन अधिकृत भट्टराईले हरेक तहका अधिवेशनको एक दिन अगावै उम्मेदवारी मनोनयन दर्ताको समय तोकिने बताएका छन् । कार्तिक २७ गते हुने वडा अधिवेशनका लागि २६ गते नै मनोनयन दर्ताको लागि समय राखिने उनले जानकारी दिए । कात्तिक २५ गते भोली ८१ वटै वडाका मतदान अधिकृत र सहायक मतदान अधिकृतका लागि एक दिने अभिमुखीकरण कार्यक्रम गरिनेछ । त्यसपछि मतदान अधिकृत नेतृत्वको टोली २६ गते विहान वडा वडामा पुग्ने उनले बताए । वडा अधिवेशनका लागि ८१ वटै वडामा नेपाल शिक्षक संघ सम्बद्ध शिक्षकहरु मतदात अधिकृत र सहयोगीका रुपमा खटाइनेछन् । निर्विरोध भएको वडामा २६ गते नै अधिवेशन सम्पन्न हुने र निर्वाचन गर्नुपर्ने वडामा २७ गते निर्वाचन हुनेछ । मतदानस्थल सबै मतदातालाई पायक पर्ने गरी करिब करिब वडाको बीच भागमा राखिने भट्टराईले बताए ।

उनले नेपाली कांग्रेस बाँकेका नेता कार्यकर्ता, भ्रातृ संगठन तथा शुभेच्छुक संगठन सबैलाई सकारात्मक सोचका साथ प्रस्तुत भइदिनको लागि आह्वान गरेका छन् । अधिवेशनमा सक्रिय सहभागिता जनाई सहयोग गरिदिन उनले आह्वान गरे । सानातिना झिनामसिना कुरालाई विर्सिंदै अघि बढ्नुपर्ने उनको धारणा छ ।

हेर्नुस् प्रमुख निर्वाचन अधिकृत भट्टराईसंग गरिएको कुराकानी