बाँकेका चार पालिकामा सर्वसम्मत, चार वटामा भोली निर्वाचन

राजनीति

गृहपृष्ठ
राजनीति
बाँकेका चार पालिकामा सर्वसम्मत, चार वटामा भोली निर्वाचन

बाँकेका चार पालिकामा सर्वसम्मत, चार वटामा भोली निर्वाचन

बुधबार, मंसिर १, २०७८ बागेश्वरी पोस्ट

नेपालगन्ज । बाँकेका चार वटा पालिकामा नेपाली कांग्रेसले सर्वसम्मत नयाँ नेतृत्व चयन गरेको छ । नरैनापुर, खजुरा, डुडुवा र जानकीमा सर्वसम्मत नयाँ नेतृत्व चयन गरिएको हो । यी चार पालिकाको पूरै कार्यसमिति निर्विरोध भएको छ ।

नरैनापुर सभापतिमा मेराज अहमद खाँ, खजुरा सभापतिमा रमेश सिजाली, जानकीको सभापतिमा जयराम यादव र डुडुवामा विजय कुमार यादव सर्वसम्मत भएका छन् । नरैनापुरका खाँ र डुडुवाका यादव पार्टीभित्र संस्थापन इतर पक्षका हुन् भने खजुराका सिजाली र जानकीका यादव संस्थापनका हुन् ।

नेपालगन्ज उपमहानगरपालिका, कोहलपुर नगरपालिका, राप्तीसोनारी गाउँपालिका र बैजनाथ गाउँपालिकामा भने कतै त्रिपक्षीय त कति द्विपक्षीय प्रतिष्पर्धा हुने भएको छ । नेपालगन्जमा त्रिपक्षीय भिडन्त हुने भएको छ । प्रशान्त विष्ट, उमा थापा मगर र विनोद रिजाल सभापतिको प्रतिष्पर्धामा छन् । तीनै जनाले प्यानलसहित उम्मेदवारी दर्ता गराएका छन् । थापा मगर संस्थापन इतरकी हुन् भने विष्ट र रिजाल संस्थापनका हुन् । कोहलपुर नगरपालिकामा पनि संस्थापन र संस्थापन इतरको लडाइँ छ । विरेन्द्र शाहले संस्थापन र राजेन्द्र श्रेष्ठले संस्थापन समूहको नेतृत्व गरेका छन् । दुबैले प्यानलसहित उम्मेदवारी दर्ता गराएका छन् ।

राप्तीसोनारीमा पनि दुई पक्षवीच प्रतिष्पर्धा छ । भिम बहादुर राना क्षेत्री र तुलाराम खत्री नेतृत्वका दुई प्यानल प्रतिष्पर्धामा छन् । राना संस्थापन र खत्री इतर समूहका हुन् । राना अहिलेका पालिका सभापति र खत्री सचिव हुन् । बैजनाथमा त्रिपक्षीय भिडन्त छ । त्यहाँ तीनै संस्थापन समूहका उम्मेदवार छन् । देव बहादुर खत्री, रामबहादुर विष्ट र केशर खड्का सभापतिका उम्मेदवार छन् ।