मतदान केन्द्र विवादले राप्तीसोनारीमा अझै मतदान सुरु हुन सकेन

राजनीति

गृहपृष्ठ
राजनीति
मतदान केन्द्र विवादले राप्तीसोनारीमा अझै मतदान सुरु हुन सकेन

मतदान केन्द्र विवादले राप्तीसोनारीमा अझै मतदान सुरु हुन सकेन

बिहीबार, मंसिर २, २०७८ बागेश्वरी पोस्ट

नेपालगन्ज । बाँकेको राप्तीसोनारी गाउँपालिकामा अझै मतदान सुरु हुन सकेको छैन । नेपाली कांग्रेसको १४औं महाधिवेशन अन्तर्गत् आजलाई तय भएको निर्वाचन मतदान केन्द्र विवादका कारण अझै सुरु हुन सकेको छैन ।

विहान ९ बजेदेखि हुने तय भएको मतदान अझै सुरु नहुँदा मतदाता अन्योलमा छन् । सभापतिका एक जना प्रत्यासी तुलाराम खत्रीले गाउँपालिकाका अध्यक्ष लाहुराम थारुको चाहना अनुसार मतदातालाई प्रभावित गर्ने गरी उनकै घरको नजिक मनोनयन भएको स्थान साइपुरमा मतदान केन्द्र बनाउन खोज्दा विवाद बढेको बताए।

"मनोनयन हिजो त्यहाँ गरिएपनि सबैलाई पायक पर्ने स्थानमा मतदान केन्द्र राख्ने कुरो भएको हो तर आज जवर्जस्त त्यही ठाँउमा राख्न खोज्दा समस्या भएको हो," उनले भने- मतदातालाई कब्जामा लिने नियत देखिन्छ, अध्यक्षकै घरमा भण्डारा लागेको छ, मतदाताका मोबाइल खोसेर राखिएको छ, यसले निष्पक्ष निर्वाचन हुने अवस्था हुँदैन ।"

उनले स्रोत साधनको हिसाबले गाउँपालिका भवनमा चुनाव गर्न आफूहरुले प्रस्ताव गरेपनि गाउँपालिका अध्यक्ष थारुले नमानेको बताए । आफ्नो घरछेउँमा सरकारी स्रोत साधनको दुरुपयोग गरेर निर्वाचन आफ्नो कब्जामा पार्ने कोसिस गरेको खत्रीले आरोप लगाए ।