पार्टी अनुशासनलाई उच्च प्राथमिकतामा राखेर संगठन मजबुत बनाउनेछु:वीरेन्द्र शाह

राजनीति

गृहपृष्ठ
राजनीति
पार्टी अनुशासनलाई उच्च प्राथमिकतामा राखेर संगठन मजबुत बनाउनेछु:वीरेन्द्र शाह

पार्टी अनुशासनलाई उच्च प्राथमिकतामा राखेर संगठन मजबुत बनाउनेछु:वीरेन्द्र शाह

बुधबार, मंसिर ८, २०७८ बागेश्वरी पोस्ट

बिरेन्द्र बहादुर शाह

नेपालगन्ज ।वीरेन्द्रबहादुर शाह नेपाली कांग्रेस बाँकेका जिल्ला सदस्य एवं नेपाल तरुण दलका बाँके जिल्ला अध्यक्ष हुन् । उनी २०४२ सालमा नेपालगंजको मंगलप्रसाद माध्यमिक विद्यालयबाट प्रवेशिका परीक्षा प्रथम श्रेणीमा उत्तीर्ण गरेपछि उच्च शिक्षा अध्ययन गर्न भारतको लखनउ गए । लखनउस्थित जयनारायण इन्टर कलेजबाट आइएस्सी उत्तीर्ण गरे ।

२०४६ सालको जनआन्दोलनमा काठमाडौंमा सक्रिय रहेसँगै उनी राजनीतिमा लागे । नेपालगंजको महेन्द्र बहुमुखी क्याम्पसबाट इतिहास र राजनीतिशास्त्रमा स्नातकसम्मको अध्ययन गरेका छन् ।

२५ चैत २०२६ मा जन्मिएका उनी करिब २ दशकदेखि नेपाली कांग्रेसका विभिन्न संगठनमा सक्रिय छन् । निरन्तर बाँके तरुण दलको संगठन र नेतृत्वमा रहेर काम गरिरहेका छन् उनले । नेपाली कांग्रेस बाँके क्षेत्र नं. २ को क्षेत्रीय सभापतिमा उनको उम्मेदवारी छ । आसन्न महाधिवेशन, जिल्ला अधिवेशन र त्यसको सेरोफेरोमा रहेर नेपाली कांग्रेस बाँकेका जिल्ला सदस्य एवं नेपाल तरुण दलका बाँके जिल्ला अध्यक्ष क्षेत्रीय सभापतिका उम्मेदवार वीरेन्द्रबहादुर शाहसँग कुराकानी:

तपाईंको राजनीतिमा झुकाव कसरी भयो ?
निकै महत्त्वपूर्ण सवालबाट कुराकानी सुरु गर्नुभयो। म भारतको लखनऊबाट आइएस्सीको अध्ययन सकेर घर फर्किएको थिएँ । त्यति नै बेला थप अध्ययनका लागि काठमाडौं पुगेँ, जतिखेर २०४६ सालको आन्दोलन चर्किएको थियो । म त्रिचन्द्रमा भर्ना भएको थिएँ । त्रिचन्द्र कलेजमा कांग्रेस निकट नेपाल विद्यार्थी संघको अगुवाईमा आन्दोलनहरू भइरहन्थे । म पनि त्यही आन्दोलनमा सहभागी भएँ ।
मेरो राजनीतिको सुरुवात त्रिचन्द्र कलेको विद्यार्थी आन्दोलनबाट नै भएको हो । त्यसयता मैले अन्तर्राष्ट्रिय 'सोसलिष्ट' आन्दोलनका दस्ताबेज अनि नेपालमा भइरहेको राजनीतिक गतिविधिलाई नजिकबाट बुझ्न थालेको हुँ । खासगरी शीतयुद्धको अन्त्यपछिको विश्व समुदायको अवस्थाका बारेमा पुस्तकहरू अध्ययन पनि गर्न थालेँ । सरसर्ती भन्नुपर्दा मेराे राजनीति यसरी सुरु भएको हो ।

नेपाली कांग्रेस बाँकेमा तिव्र ध्रुविकरण छ, कसरी नियाली रहनुभएको छ नि ?

हो, संगठनभित्रका केही विवादसँगै कोभिड महामारीका कारण पनि अधिवेशन पर धकेलियो। तर, संगठन चलायमान नै छ । हामी हाम्रा गतिविधिलाई नियमित रूपमा अघि बढाइरहेका पनि छौँ । कतिपय अवस्थामा बनेका समीकरणले समस्या पैदा भएका छन् । समुह जुनसुकै होस् हामी चुनावको प्रक्रियाबाट नेतृत्व स्थापित होस भन्ने चाहन्छौं ।
तपाईं त स्व. सुशील कोइरालाको गृह जिल्लामा कांग्रेस विभाजन हुँदा पनि नेपाली कांग्रेस प्रजातान्त्रिकको धार पक्रेर बस्नुभयो । यतिबेला धार वा प्यानलको लडाइँमा कता हुनुहुन्छ नि ?
निकै गम्भीर सवाल राख्नुभयो । वास्तवमा म विधि र प्रक्रियाबाट पार्टी चल्नुपर्छ भन्ने मान्यता राख्छु । आदरणीय स्व. सुशील कोइरालासँग मेरो सधैँ राजनीतिक सम्बन्ध रह्यो । उतिबेला शेरबहादुर देउवाजीले विधि र प्रक्रियाका लागि जुन अडान लिनुभयो, म त्यो कुरामा सहमत थिएँ। पार्टी विभाजन हुँदा पनि म शेरबहादुर दाइकै लाइनमा थिएँ र निरन्तर अहिलेसम्म पनि छु । संगठन पार्टीको विधान र कार्यकर्ताको भावना अनुसार चल्नुपर्छ भन्ने नै मेरो आधिकारिक लाइन हुन्छ ।

तपाईंको उम्मेदवारी किन नि, अर्को पक्षलाई समर्थन गर्ने सम्भावना के छ ?
अधिवेशनको प्रक्रियामा छौं । जिल्ला सदस्य भइसकेकाले अब यो पटक क्षेत्रीय सभापतिमा लड्नुपर्छ भन्ने साथीभाइहरूले अनुरोध गरेका हुन्। म पनि कुनै एक कार्यकारी पदमा चुनाव लड्ने सोंचमा थिएँ । पार्टीको उपल्लो नेतृत्वसँग पनि छलफल गरेर यो चुनाव लड्दैछु । अर्को पक्षसँग सम्झौताको कुनै गुन्जायस नै छैन । तर न्युनतम् सहमतिका आधारमा समीकरण बनाएर चुनावमा जान्छौं ।

संगठनमा युवा नेतृत्वबाट कार्यकर्ताहरूले निकै ठूलो अपेक्षा गरेका छन् । तपाईं यो विषयलाई कसरी सम्बोधन गर्न सक्नुहुन्छ ?
अत्यन्तै सान्दर्भिक विषय उठाउनुभयो । वास्तवमा अग्रजको अनुभवलाई सँगालेर युवाको ऊर्जालाई भरपूर प्रयोग गर्नुपर्छ । त्यसका लागि सेरेमोनियल पदमा सिनियर नेताहरूलाई सम्मानका साथ राख्दै कार्यकारी पदमा युवालाई समेट्नुपर्छ भन्ने मेरो मान्यता हो । त्यसैगरी पब्लिक चुनावमा सिनियर र युवाहरूको सम्मिश्रण गरेर लैजानुपर्छ।

संगठनको चुनाव हो, गुट र उपगुटको प्रभाव त रहला । केन्द्रको जस्तै समूह बन्ने हो त बाँकेमा पनि ?
वास्तवमा राजनीति संभावनाको खेल हो, त्यसैले स्वार्थ आबश्यकता अनुसार समूह बनाएर स्वस्थ प्रतिष्पर्धा हुनु स्वाभाविक हो । केन्द्रको पूरै प्रभाव त होईन तर संगठन चलायमान हुन केही हदसम्म 'पोलोराइजेसन' भएको छ ।

तपाईंसँग बाँके कांग्रेसको सांगठनिक अवस्थालाई सुधार गर्ने योजना के छन् ?
पार्टीका विभिन्न पदमा बसेकाहरूदेखि सक्रिय सदस्यहरूलाई प्रशिक्षणको व्यवस्था मिलाउनेछु । कार्यकारी पद र सेरेमोनियल पदमा भएकाहरूलाई पार्टीको विधानले व्यवस्था गरे अनुसार गतिशील बनाउन व्यावहारिक रूपमा सबल बनाउने मेरो ध्येय रहनेछ । यसका अलावा म संगठनमा अनुशासनलाई उच्च प्राथमिकतामा राखेर काम गर्नेछु ।

तपाईं त जनप्रतिनिधि पनि हुनुहुन्छ, जनताको अपेक्षा कसरी सम्बोधन गर्नुभएको छ ?
२०७४ सालयता एउटा जिम्मेवार वडा अध्यक्षको भूमिकामा वडाबासीहरूको सहज जीवनयापन र राज्यले दिने सेवा, सुविधा सहज रूपमा मिलोस् भन्ने हेतुले काम गरिरहेको छु । कामका दौरान केही त्रुटी भएका छन् भने तत्काल मलाई 'करेक्सन' गर्ने मौका दिनुहोस् भनेर सार्वजनिक रूपमा वडाबासीलाई अपिल पनि गरेको छु । कांग्रेससँग जनअपेक्षा अपार छन्, ऐन, कानुन र स्रोत-साधनको उपलब्धता अनुसार सक्दो सेवा गरिरहेको छु ।