एमालेको दशौं महाधिवेशन आजदेखि चितवनमा शुरु हुँदै

राजनीति

गृहपृष्ठ
राजनीति
एमालेको दशौं महाधिवेशन आजदेखि चितवनमा शुरु हुँदै

एमालेको दशौं महाधिवेशन आजदेखि चितवनमा शुरु हुँदै

शुक्रबार, मंसिर १०, २०७८ बागेश्वरी पोस्ट

नेपालगञ्ज । नेकपा एमालेको दशौं राष्ट्रिय महाधिवेशन आजदेखि चितवनमा शुरु हुँदैछ । महाधिवेशनको उद्घाटन समारोह नारायणगढस्थित नारायणी नदी किनारमा र बन्दसत्र सौराहमा हुँदैछ । ललितपुरको गोदावरीमा विधान महाधिवेशन गरिसकेको एमालेले अब चितवन महाधिवेशनबाट आगामी पाँच वर्षका लागि पार्टीको नयाँ नेतृत्व चयन गर्नेछ ।

महाधिवेशनको उद्घाटन मध्याह्नपछि हुने नेकपा एमालेले जनाएको छ । उद्घाटन अघि विभिन्न स्थानबाट जुलुस निस्किने छन् । ती जुलुस नारायणी नदी किनारमा पुगेर उद्घाटन सभामा परिणत हुनेछ । उद्घाटन समारोहमा पाँच लाख मानिस उतार्ने एमालेले दाबी गरेको छ । भीड व्यवस्थापनका लागि भन्दै स्थानीय प्रशासनले पूर्व पश्चिम राजमार्ग अन्तर्गत् नारायणगढ खण्ड र नारायणगढको मुख्य बजार क्षेत्रभित्र आज बिहान ९ बजेदेखि अत्यावश्यक सेवाका बाहेक अन्य सबै सवारी साधन प्रवेशमा रोक लगाएको छ ।

उद्घाटन समारोहलाई अध्यक्ष केपी शर्मा ओली लगायतका नेताहरुले सम्बोधन गर्नेछन् । उद्घाटन समारोहमा सहभागी भएर एमालेलाई शुभकामना दिन कांग्रेस सभापति एवम् प्रधानमन्त्री शेरबहादुर देउवा पनि चितवन जाँदैछन् । विभिन्न राजनीतिक दलका नेताहरु र विदेशी पाहुनाहरुलाई पनि एमालेले महाधिवेशनमा निम्तो दिएको छ ।

उद्घाटन समारोह सकिएपछि भोलीपल्टदेखि सौराहाको होटल सेभेन स्टारमा बन्दसत्र आयोजना हुनेछ । बन्दसत्रमा २ हजार १७५ र पर्यवेक्षक १३० जना गरी कुल २ हजार ३०५ जना सहभागी हुने एमालेले जनाएको छ । महाधिवेशनका लागि देशभरबाट एमालेका प्रतिनिधिहरु चितवनमा भेला भएका छन् । यिनै प्रतिनिधिहरुले एमालेको नयाँ नेतृत्व चयन गर्नेछन् ।

हालसम्म अध्यक्ष पदमा केपी शर्मा ओली स्वभाविक दाबेदार छन् । यद्यपि एमाले नेता भीम रावलले पनि अध्यक्षमा उम्मेदवारी दिने घोषणा गरेका छन् । एमालेका कतिपय नेताहरु भने सर्वसहमतिबाट अध्यक्ष र पदाधिकारीहरु चयन गर्नुपर्ने पक्षमा छन् । कतिपय भने निर्वाचनमा जानुपर्ने पक्षमा छन् । एमालेको नयाँ नेतृत्व चुन्न सहमतिमा जाने कि निर्वाचन गर्ने भन्ने यकिन हुनसकेको छैन ।

प्रकाशित मिति: शुक्रबार, मंसिर १०, २०७८ ०८:२८

प्रतिक्रिया दिनुहोस्