बाँके कांग्रेसको सभापति उम्मेदवार नारायण गौडेल 'कन्फर्म', देउबा समूहमा सकस

राजनीति

गृहपृष्ठ
राजनीति
बाँके कांग्रेसको सभापति उम्मेदवार नारायण गौडेल 'कन्फर्म', देउबा समूहमा सकस

बाँके कांग्रेसको सभापति उम्मेदवार नारायण गौडेल 'कन्फर्म', देउबा समूहमा सकस

आइतबार, मंसिर १२, २०७८ बागेश्वरी पोस्ट

नेपालगञ्ज । बाँके कांग्रेसको नेतृत्व चुन्न मंसिर १४ गते निर्वाचन हुँदैछ । त्यसअघि १३ गते मनोनयन दर्ताको समय तोकिएको छ । अधिवेशन संघारमै आउँदा अब नेताहरुलाई उम्मेदवार टुंग्याउन दबाब छ । आज दिनभरिमा उम्मेवार टुंग्याउनुपर्ने दबाबमा नेताहरु छन् । संस्थापन इतर समूहको सभापतिको उम्मेदवार 'कन्फर्म' भइसकेपनि संस्थापन (देउबा समूह) मा आकांक्षी धेरै भएका कारण मिलाउन सकस देखिएको छ ।

संस्थापन समूह आकांक्षीको व्यवस्थापनमा जुटेको छ । संस्थापन इतरबाट नारायणप्रसाद गौडेल सभापति लड्दैछन् । एक नेताका अनुसार संस्थापनबाट सुरेन्द्र हमाल, बादशाह कुर्मी, राजकुमार बर्मा, निरन्जनसिंह सिजापति र लक्ष्मीनारायण शाह दाबेदार छन् । यद्यपि बर्माले संघीय निर्वाचन क्षेत्रीय अधिवेशनमा संस्थापन इतर समूहसंग मिलेर संस्थापनकै विरेन्द्र शाहलाई 'सपोर्ट' गरेकाले उनको भूमिका के हुन्छ अझै प्रष्ट छैन । कुर्मीले पत्रकार सम्मेलन नै गरेर सभापतिमा उम्मेदवारी दिने बताइसकेका छन् । संस्थापनबाट एक भन्दा बढी उम्मेदवार हुने सम्भावना बढी छ ।

संस्थापन इतर समूहका सभापतिका उम्मेदवार गौडेलका अनुसार उपसभापतिमा राजकुमार मौर्य, सचिव सुधांशु कोइराला र सहसचिवमा रेणु सिंहको उम्मेदवारी पक्का भएपनि अरु एक एक जना उपसभापति, सचिव र सहसचिव टुंगिन बाँकी छ । आज दिनभरिमा सबै टुंगिने उनले बताए । उपसभापतिमा गोपालप्रसाद अधिकारीको पनि चर्चा छ । सचिवमा पूर्ण प्रसाद आचार्यको पनि उम्मेदवारी हुन सक्ने बताइएको छ । संस्थापन समूहमा भने सभापतिकै टुंगो नलागेकाले पदाधिकारीको चर्चा सुनिएको छैन । यद्यपि उपसभापतिमा मेघराज ओली र सचिवमा रुद्रबहादुर ओलीको चर्चा छ ।

जिल्ला कार्यसमितिमा एक जना सभापति, दुई जना उपसभापति, २ जना सचिव र २ जना सहसचिव रहन्छन् । सदस्यमा भने प्रत्येक पालिकाबाट प्रतिनिधित्व हुनेछ । उपमहानगरापालिकामा कम्तीमा २ महिलासहित ५ जना, नगरपालिकाबाट १ महिलासहित ३ जना र गाउँपालिकाबाट १ महिलासहित दुई जना तथा क्लष्टर अनुसार सदस्य चुनिनेछन् ।

प्रकाशित मिति: आइतबार, मंसिर १२, २०७८ ०८:१८

प्रतिक्रिया दिनुहोस्