लुम्बिनीमा खाँणमाथि गिरी हाबी, बढाए आफ्नो प्रभाव

राजनीति

गृहपृष्ठ
राजनीति
लुम्बिनीमा खाँणमाथि गिरी हाबी, बढाए आफ्नो प्रभाव

लुम्बिनीमा खाँणमाथि गिरी हाबी, बढाए आफ्नो प्रभाव

सोमबार, मंसिर २०, २०७८ बागेश्वरी पोस्ट

नेपालगञ्ज । नेपाली कांग्रेस लुम्बिनी प्रदेश कमिटीमा पहिलोपटक नेतृत्व चुन्न चुनावी रस्साकस्सी हुँदै गर्दा दुई नेताहरु रुपन्देहीका बालकृष्ण खाँण र दाङका दिपक गिरीको प्रतिष्ठासंग जोडिएर हेरिँदै थियो । लुम्बिनी प्रदेशका यी दुई केन्द्रिय नेता आफू पक्षधर नेताहरुलाई जिताउन कम्मर कसेरै लागेका थिए ।

केन्द्रमा सभापति शेरबहादुर देउबा पक्षधर (संस्थापन) ले गृहमन्त्री एवम् केन्द्रिय सदस्य खाँणलाई प्रदेश अधिवेशन सम्पन्न गर्ने जिम्मेवारीसहित उम्मेदवार छनौटको अधिकार दिएर पठाएको थियो । रामचन्द्र पौडेल र सशांक कोइराला पक्षधर (संस्थापनइतर) ले भने केन्द्रिय सदस्य एवम् पूर्व मन्त्री गिरीलाई चुनावी कमाण्डर बनाएर पठाएको थियो । संस्थापन इतरबाट केन्द्रिय सदस्य चन्द्र भण्डारी पनि खटिएका थिए । प्रदेशका दुई 'हेबीवेट' नेताको प्रतिष्ठासंग जोडिएको अधिवेशनमा अन्ततः गिरी खाँडमाथि हाबी भए । गिरीले करिब प्यानल नै जिताउन सफल भएका छन् ।

सभापतिमा 'नेक टु नेक' प्रतिष्पर्धा रहेको भनिएको लुम्बिनीका जिल्ला अधिवेशन सकिएका ११ जिल्ला मध्ये ९ जिल्ला सभापति इतर पक्षधरले जितेको थियो । प्रतिनिधिमा पनि इतर पक्षकै बढी थिए । तथापि गृहमन्त्री खाँणले पनि प्रतिष्ठासंग जोडेको यो अधिवेशनमा तीब्र प्रतिष्पर्धा हुने आंकलन पहिले नै थियो ।

रोल्पाबाट उदाएका युवा नेता अमरसिंह पुन नेतृत्वको प्यानल (एक उपसभापति बाहेक) जिताएर गिरीले लुम्बिनीमा आफ्नो प्रभाव र बर्चश्व बढाएका छन् । केन्द्रमा सह-महामन्त्रीका उम्मेदवार गिरीले प्रदेशमा लगभग क्लिन स्विप गराएर आफूलाई लुम्बिनी प्रदेशको प्रभावशाली नेताका रुपमा स्थापित गराएका छन् ।

महामन्त्रीका उम्मेदवार गृहमन्त्री खाँणले भने आफू पक्षधर उम्मेदवारहरुलाई जिताउन नसक्दा आफ्नो 'साख' कमजोर बनाएका छन् । अन्य प्रदेशमा संस्थापन इतर कमजोर देखिँदा लुम्बिनीमा भने जबर्जस्त उपस्थितिले गिरीको 'मोरल हाई' भएको छ ।

प्रकाशित मिति: सोमबार, मंसिर २०, २०७८ १०:४०

प्रतिक्रिया दिनुहोस्