कांग्रेस महाधिवेशनमा आज उम्मेदवारी मनोनयन दर्ता

राजनीति

गृहपृष्ठ
राजनीति
कांग्रेस महाधिवेशनमा आज उम्मेदवारी मनोनयन दर्ता

कांग्रेस महाधिवेशनमा आज उम्मेदवारी मनोनयन दर्ता

शनिबार, मंसिर २५, २०७८ बागेश्वरी पोस्ट

काठमाण्डौ । नेपाली कांग्रेसको १४औँ महाधिवेशन अन्तर्गत् आजदेखि नयाँ नेतृत्व चयनका लागि निर्वाचन प्रक्रिया सुरु हुँदैछ ।

उम्मेदवार मनोनयन दर्ता बिहान १० बजेदेखि साँझ ५ बजेसम्म राष्ट्रिय सभागृहमा हुनेछ । उम्मेदवारी मनोनयन दर्ता उपर दाबी विरोध र जाँचबुझ साँझ ५ देखि ७ बजेसम्म र दाबी विरोध उपर निर्णय साँझ ७ देखि ९ बजेसम्म हुने निर्वाचन समितिले जनाएको छ ।

उम्मेदवारको पहिलो नामावली प्रकाशन राति ९ देखि १२ बजेसम्म, मनोनयनपत्र फिर्ता लिइसक्नुपर्ने समय भोली बिहान ११ बजेसम्म, उम्मेदवारको अन्तिम नामावली प्रकाशन दिउँसो १२ः१५ बजे र मतदान सोमबार बिहान ८ बजेदेखि हुने समितिका संयोजक गोपालकृष्ण घिमिरेले जानकारी दिए ।

मतदान भने भृकुटीमण्डप र राष्ट्रियसभा गृहमा हुनेछ । मतदानमा २९ किसिमका मतपत्र हुनेछन् भने उम्मेदवारको सङ्ख्या र पद अनुसारका आकार र रङका मतपत्रको व्यवस्था गरिनेछ । नयाँ नेतृत्वका लागि ४ हजार ७ सय ४३ महाधिवेशन प्रतिनिधिले मत हाल्नेछन् ।

कांग्रेस केन्द्रीय कार्यसमितिका पदाधिकारीमध्ये एक सभापति, दुई उपसभापति, दुई महामन्त्री, आठ सहमहामन्त्रीको निर्वाचन हुने व्यवस्था छ । कोषाध्यक्ष भने निर्वाचित केन्द्रीय सदस्यमध्येबाट निर्वाचित हुने व्यवस्था छ। यसैगरी ३५ खुला केन्द्रीय सदस्य, महिला नौ, प्रत्येक प्रदेशबाट तीन जनाका दरले २१, दलित नौ, आदिवासी/जनजाति १५, खस/आर्य १३, मधेसी नौ, थारु चार, मुस्लिम तीन, पिछडिएको क्षेत्रबाट एक, अल्पसङ्ख्यकबाट एक, अपाङ्गबाट एक सदस्य गरी कूल १३४ पदाधिकारी तथा सदस्यको निर्वाचन हुने विधानमा व्यवस्था छ । यस बाहेक केन्द्रीय सभापतिले ३३ जना केन्द्रीय सदस्य मनोनित गर्ने विधानमा उल्लेख छ ।

प्रकाशित मिति: शनिबार, मंसिर २५, २०७८ ०७:४१

प्रतिक्रिया दिनुहोस्