गगन र विश्वप्रकाश कांग्रेस महामन्त्रीमा निर्वाचित

राजनीति

गृहपृष्ठ
राजनीति
गगन र विश्वप्रकाश कांग्रेस महामन्त्रीमा निर्वाचित

गगन र विश्वप्रकाश कांग्रेस महामन्त्रीमा निर्वाचित

गगनलाई अपार मत

बिहीबार, पुस १, २०७८ बागेश्वरी पोस्ट

काठमाण्डौ । नेपाली कांग्रेसको महामन्त्रीमा दुई युवा नेता निर्वाचित भएका छन् । १४औं महाधिवेशन अन्तर्गत् सोमबार भएको मतदानको आज सम्पन्न मतगणनाबाट महामन्त्रीमा गगनकुमार थापा र विश्वप्रकाश शर्मा निर्वाचित भएका हुन् ।

गगन अपार लोकप्रिय मतका साथ शीर्ष स्थानमा रहँदै महामन्त्रीको दौडमा अब्बल सावित हुँदै उत्तीर्ण भएका छन् । विश्वप्रकाश पनि दोस्रो बढी मत ल्याई महामन्त्री निर्वाचित भएका हुन् । गगनले ३०२३ मत पाएका छन् भने विश्वप्रकाशको १९८४ मत आएको छ ।

नेपाल विद्यार्थी संघको राजनीतिबाट उदाएका थापा र शर्मा समकालीन नेपाली राजनीतिमा आशा र भरोसा गरिएका दुई होनाहार युवा नेता हुन् । दुबै जना केन्द्रिय कार्यसमितिमा केन्द्रिय सदस्यको भूमिकामा थिए । अघिल्लो महाधिवेशनमा महामन्त्रीमा पराजित थापा र पार्टी प्रबक्ता बनेका शर्मा २०५७ सालको नेपाल विद्यार्थी संघको केन्द्रिय कार्यसमितिमा संगै थिए । शर्मा त्यो बेला सभापति हुँदा थापा उपाध्यक्ष थिए । थापा २०५९ मा नेविसंघको महामन्त्री भएका थिए ।

थापा डा.शेखर कोइरालाको टिमबाट महामन्त्री लडेका हुन् भने शर्मा प्रकाशमान सिंहको प्यानलबाट चुनाव लडेका थिए । सभापति शेरबहादुर देउबा प्यानलको सशक्त महामन्त्री उम्मेदवार ठानिएका शर्माले अन्तिममा टिममा ठाउँ नपाएपछि प्रकाशमानको प्यानलमा गएका थिए । नेविसंघका पूर्व अध्यक्ष प्रदिप पौडेललाई कृष्ण सिटौलाको दबाबमा देउबाले महामन्त्री उम्मेदवार बनाएका थिए । तर, मतदाताले विश्वप्रकाशलाई रोजे ।

महामन्त्रीका अन्य उम्मेदवार देउबा प्यानलका डा.प्रकाशशरण महतले १५५६ मत, पौडेलले १३९३ मत, कोइराला प्यानलका डा.मिनेन्द्र रिजालले ८०९ मत र विमलेन्द्र निधि प्यानलका डा.राजाराम कार्कीले १०६ मत पाएका छन् । महामन्त्रीमा जम्मा खसेको ४६८२ मत मध्ये ४३ मत बदर भएको थियो । ।