कांग्रेसको बाँकी पाँच सहमहामन्त्री पदको मतगणना आज हुँदै

राजनीति

गृहपृष्ठ
राजनीति
कांग्रेसको बाँकी पाँच सहमहामन्त्री पदको मतगणना आज हुँदै

कांग्रेसको बाँकी पाँच सहमहामन्त्री पदको मतगणना आज हुँदै

शुक्रबार, पुस २, २०७८ बागेश्वरी पोस्ट

काठमाडौं । नेपाली कांग्रेसको बाँकी पाँच सहमहामन्त्री पदको मतगणना आज हुने भएको छ । १४औं महाधिवेशन अन्तर्गत् भएको आठ सहमहामन्त्री पदको निर्वाचनमध्ये पाँच पदको मतगणना आज हुने भएको छ । महिला, दलित र आदिवासी जनजाती तर्फको सहमहामन्त्री पदको मतपरिणाम गएराती सार्वजनिक भइसकेको छ ।

मधेसी, खसआर्य, थारु, मुस्लिम र पिछडिएको क्षेत्र तर्फका सहमहामन्त्रीको मतगणना आज हुने कांग्रेस केन्द्रीय निर्वाचन समितिले जनाएको छ । मधेसी समूहको सहमहामन्त्रीमा सभापति शेरबहादुर देउवा समूहबाट महेन्द्र यादव र शेखर कोइराला समूहबाट रामकृष्ण यादव प्रतिस्पर्धामा छन्।

खसआर्य समूहको सहमहामन्त्रीमा देउवा समूहबाट किशोरसिंह राठौर, कोइराला समूहबाट देवराज चालिसे उम्मेदवार छन् भने थारु कलस्टरमा देउवा समूहबाट उमाकान्त चौधरी र कोइराला समूहबाट तेजुलाल चौधरी उम्मेदवार छन्। मुस्लिम कलस्टरको सहमहामन्त्रीमा देउवा पक्षबाट फरमुल्लाह मन्सुर र कोइराला पक्षबाट शेख वकिल उम्मेदवार छन् । पिछडिएको क्षेत्र कलस्टरको सहमहामन्त्रीमा देउवा समूहबाट जीवनबहादुर शाही, कोइराला समूहबाट बद्री पाण्डे र निधि समूहबाट चेतराज बराल उम्मेदवार छन् ।

सभापति, उपसभापति, महामन्त्री तथा सहमहामन्त्री तीन जनाको मतपरिणाम भने आइसकेको छ । जसमा शेरबहादुर देउवा सभापति, पूर्णबहादुर खड्का र धनराज गुरुङ उपसभापति तथा गगन थापा र विश्वप्रकाश शर्मा महामन्त्री पदमा निर्वाचित भएका छन् । त्यस्तै दलित सहमहामन्त्रीमा जीवन परियार, महिलामा डिना उपाध्याय र जनजातीतर्फ भीष्मराज आंगदम्बे निर्वाचित भएका छन् ।

प्रकाशित मिति: शुक्रबार, पुस २, २०७८ ०८:१२

प्रतिक्रिया दिनुहोस्