कलमको तागतसँगै राजनितिमा उदाय अजयबाबु शिवाकोटी

राजनीति

गृहपृष्ठ
राजनीति
कलमको तागतसँगै राजनितिमा उदाय अजयबाबु शिवाकोटी

कलमको तागतसँगै राजनितिमा उदाय अजयबाबु शिवाकोटी

पहिलो पटकमै शिवाकोटीले केन्द्रीय सदस्यमा बाजी मारे

सोमबार, पुस ५, २०७८ बागेश्वरी पोस्ट

नेपालगन्ज । नेपालको पत्रकारीता जगतमा अजयबाबु शिवाकोटी एक चिरपरिचित नाम हो। अन्ततः नेपाली कांग्रेसको राजनीतिमा कलमको तागतले जितेको छ । नेपाली कांग्रेसका युवा नेता अजयबाबु शिवाकोटी १४ औं महाधिवेशनबाट खुला केन्द्रीय सदस्यमा निर्वाचित भएका छन् । उनी पहिलो पाइलामै सफलता हासिल गर्न सफल भएका हुन् । नेपाली कांग्रेसको शुभेच्छुक संस्था नेपाल प्रेस युनियनका महासचिव शिवाकोटी पहिलो पटकको उम्मेदवारीमै केन्द्रीय सदस्यजस्तो गरिमामय पदमा निर्वाचित हुन सफल भएका हुन् । यो जित उनको मात्र नभएर प्रेस युनियनको पनि हो । किनकि उनले अब नीतिगत रुपमै प्रेसको महत्व पार्टीलाई बुझाउन सक्नेछन् र प्रेस स्वतन्त्रताका लागि थप सशक्त भूमिका खेल्न सक्नेछन्। उनले कांग्रेसको राजनीतिमा हात हाल्नुपूर्व पूर्णरुपले सम्हालेको पेशा पत्रकारिता हो । पत्रकारिता क्षेत्रमा चर्चित र सनसनीपूर्ण अनुहारमा उनी पर्छन् ।

उनले गरेका रिपोर्टिङबाट समाजमा ब्याप्त विकृति र विसंगति रोक्न गरेको प्रयास अतुलनीय छ। ठूलाठालुले गरेका गल्ती ढाकछोप गर्ने तीतो यथार्थ समाजमा ब्याप्त भइरहँदा उनले गरेको रिपोर्टिङबाट तत्कालीन सभामुख कृष्णबहादुर महराको पद गुमेको थियो । त्यस्तै एमालेका नेता गोकुल बास्कोटा संचार मन्त्री रहेका बेलामा शिवाकोटीले ७० करोड भ्रष्टाचारको काण्ड सार्वजनिक गरेपछि बास्कोटाले पनि पद छाड्नु परेको थियो । उनी चुनौतीपूर्ण पत्रकारिता निडरपूर्वक गर्ने पत्रकारमा पर्छन् । उनै शिवाकोटी हाम्राकुरा डटकमका संस्थापक प्रधानसम्पादक हुन् । उनी पूर्णकालीन राजनीतिमा आएपछि पत्रकारिताको रिपोर्टिङबाट विश्राम लिने बताइसकेका छन् । हुन पनि पत्रकारले राजनीति गर्नुहुन्न भन्नेमा उनी सचेत छन् ।

त्यसैले पनि राजनीतिक कार्यकर्ता भइसकेपछि उनी पत्रकारिताको रिपोर्टिङमा देखिने छैनन् । उनी दोलखा जिल्लाबाट महाधिवेशन प्रतिनिधि भएर १४ औं महाधिवेशनमा सहभागी भएका थिए । उनले पत्रकारिताको रिपोर्टिङ्गबाट विश्राम लिए पनि नीतिगत रुपमा भने झन् सशक्त भएर लाग्ने प्रेरणा मिलेको छ । किनकि उनीसँग भएको क्षमता भनेकै पत्रकारिता हो र पत्रकारिताकै माध्यमबाट उनी कांग्रेसको नीतिनिर्माण तहमा पुगेका छन् । उनी प्रेस स्वतन्त्रताका लागि सडकमा धेरै पटक लडे । पक्राउ परे । प्रेस स्वतन्त्रता र कलमको महत्व उनले अब थप सशक्त भएर पार्टीभित्र फैलाउनु पर्नेछ ।

उनले मतदानको दिन गत मंसिर २७ गते महाधिवेशन प्रतिनिधिहरुलाई आफ्नो पत्रकारिताको सबैभन्दा सशक्त कलम उपहारका रुपमा दिँदै कलमको सही उपयोग गर्न आग्रह गरेका थिए ।जसरी कलम पत्रकारको हतियार हो त्यसरी नै कलमले निष्पक्ष र निडर भएर मतदान गर्न पनि उर्जा दिने उनको जिकिर थियो । शिवाकोटीले मतदातासँग कलमको तागत सम्झाउँदै मत दिएर माया गर्न आग्रह गरेका थिए ।

Open photo
नभन्दै मतदाताको माया उनले पाएका छन् । अब उनले पाएको मायालाई शक्तिमा बदलेर युवा सोचलाई पार्टी रुपान्तरणमा लगाउनु पर्नेछ । त्यसो त जित लगत्तै धन्यवाद सन्देश जारी गर्दै उनले भनेका छन्, ‘परिवर्तित समयाकुकूल परिवर्तनका लागि नेपाली कांग्रेसले लिएको रूपान्तरणको लक्ष्य पूरा गर्न तपाईले दिनुभएको अमूल्य मतप्रति हार्दिक आभार प्रकट गर्दछु । अग्रजहरूको सम्मान, नयाँ पुस्तालाई प्रोत्साहनसहित कांग्रेसलाई अझ सुदृढ, गतिशील र समावेशी बनाउन तत्पर रहने छु ।’दुई दशक बढी समय सक्रिय पत्रकारितामा बिताएका उनी २०६२–०६३ को जनआन्दोलनका क्रममा आन्दोलनको दृश्य सबैभन्दा पहिले कैद गर्न पुग्ने पत्रकारका रुपमा चिनिन्थे । त्यतिमात्र हैन लोकतन्त्रका लागि र प्रेस स्वतन्त्रताका लागि घन्किने नाराहरुमा उनको स्वर चर्को बनेर दरबारसम्म पुग्न खोज्थ्यो।

तिनै सशक्त आवाजका धनी शिवाकोटी पछिल्लो समय कृष्णबहादुर महरा र गोकुल बाँस्कोटाको विषयको समाचार ब्रेक गरेपछि चर्चामा रहँदै आएका छन् । जुनसुकै माध्यमबाट भए पनि देश विकासका लागि समाजसेवामा अग्रसर भइरहने प्रण गरेका शिवाकोटीले पत्रकारिताको सक्रिय जीवनबाट अलग भएर राजनीतिमा होमिए पनि आफू संचार उद्यमीका रुपमा भने रहिरहने बताएका छन् ।

शिवाकोटीले महाधिवेशन प्रतिनिधिहरुलाई विवेक प्रयोग गरेर नेतृत्व चुन्नसमेत आग्रह गर्दै आफू महाधिवेशनपछि प्रेस युनियनसहित पत्रकारिताको राजनीतिमा नफर्कने पनि स्पष्ट पारेका छन् । उनी पत्रकारिताको राजनीतिमा नफर्किए पनि नेपाली पत्रकारितालाई सशक्त बनाउन राजनीतिक तहबाट भने धेरै सोच्न सकुन् ।

जसरी पत्रकारिता गर्दा थुप्रै सम्मानसहित पुरस्कार थापे, जसरी सशक्त पत्रकारिताकै माध्यमबाट प्रवल जनसेवाश्री पुरस्कार पाउने भएका छन् त्यसरी नै पार्टी राजनीतिमा पनि अब्बल नेता बनेर जनसेवामा जुट्न सकुन् । देश निर्माणमा उनको अहम् भूमिका रहोस् । हार्दिक शुभकामना ।

अन्ततः कलमको तागतले जितेको छ ।

प्रकाशित मिति: सोमबार, पुस ५, २०७८ १३:०७

प्रतिक्रिया दिनुहोस्