काँग्रेस प्रदेश २ को नयाँ नेतृत्वका लागि आज मतदान हुँदै

राजनीति

गृहपृष्ठ
राजनीति
काँग्रेस प्रदेश २ को नयाँ नेतृत्वका लागि आज मतदान हुँदै

काँग्रेस प्रदेश २ को नयाँ नेतृत्वका लागि आज मतदान हुँदै

बिहीबार, पुस ८, २०७८ बागेश्वरी पोस्ट

जनकपुर । नेपाली काँग्रेस प्रदेश नं २ को नयाँ नेतृत्वका लागि आज मतदान हुँदैछ । बुधवार नै मतदान हुने कार्य तालिका रहेपनि मतपत्र छपाइमा ढिलाइ भएको भन्दै निर्वाचन समितिले बुधवार साँझ मतदान प्रक्रिया स्थगित गरी आज बिहानदेखि मतदान गर्न लागेको हो ।

जनकपुरधामस्थित गोपाल धर्मशालामा मतदान हुने कार्यक्रम तय भएको निर्वाचन समितिका संयोजक प्रह्लाद गौतमले जानकारी दिए । सहमतिमा नेतृत्व टुङ्गो लगाउने प्रयास असफल भएपछि दुई समूह छुट्टाछुट्टै प्यानल बनाएर चुनावी मैदानमा उत्रिएका हुन् ।

संस्थापन पक्षले काँग्रेस रौतहटका सभापति कृष्ण यादवको नेतृत्वमा प्यानलसहित उम्मेदवारी दर्ता गराएको छ भने अर्को पक्षले काँग्रेस प्रदेश नं २ संसदीय दलका नेता रामसरोज यादवको नेतृत्वमा प्यानलसहित उम्मेदवारी दर्ता गराएको छ । कृष्णलाई सभापति शेरबहादुर देउबा तथा रामसरोजलाई नेता डा.शेखर कोइराला र विमलेन्द्र निधिको समर्थन छ ।

कूल ७२ पदका लागि १७४ ले विभिन्न पदमा उम्मेदवारी दिएका छन् । त्यसमध्ये पाँच सदस्य निर्विरोध निर्वाचित भइसकेका छन् भने छ उम्मेदवारले उम्मेदवारी फिर्ता लिइसकेका छन् । प्रदेशका आठ जिल्लाका ६४ प्रदेश निर्वाचन क्षेत्रबाट २५ गरी दुई हजार मतदाता रहेको जनाइएको छ ।

प्रकाशित मिति: बिहीबार, पुस ८, २०७८ ०९:०८

प्रतिक्रिया दिनुहोस्