सत्ता गठबन्धन आगामी निर्वाचनसम्म कायमै रहन्छः माधव नेपाल

राजनीति

गृहपृष्ठ
राजनीति
सत्ता गठबन्धन आगामी निर्वाचनसम्म कायमै रहन्छः माधव नेपाल

सत्ता गठबन्धन आगामी निर्वाचनसम्म कायमै रहन्छः माधव नेपाल

बिहीबार, पुस ८, २०७८ बागेश्वरी पोस्ट

नेपालगञ्ज । नेकपा एकीकृत समाजवादीका अध्यक्ष माधवकुमार नेपालले पाँच दलीय गठबन्धन आगामी निर्वाचनसम्म कायमै रहने दाबी गरेका छन् । समाजवादी प्रेस संगठन नेपाल बाँके शाखाले आज बाँकेको कोहलपुरमा आयोजना गरेको पत्रकार सम्मेलनमा अध्यक्ष नेपालले आगामी निर्वाचनमा लोकतान्त्रिक वामपन्थी शक्तिलाई एकतावद्ध बनाएर लैजाने पक्षमा आफू रहेको बताए ।

उनले एमसीसीको बारेमा कार्यदलले विस्तृत छलफल गरेपछि सत्ता गठबन्धनले थप निर्णय लिने स्पष्ट पारे । अध्यक्ष नेपालले नेपाली जनताको विश्वास जित्ने गरी आफूहरु अघि बढ्ने उल्लेख गरे । प्रतिगमन आफ्नो पार्टीलाई कुनै हालतमा स्वीकार्य नहुने भन्दै उनले त्यसका विरुद्ध निरन्तर संघर्ष भइरहने बताए । "नेतालाई मन परेको तर जनतालाई मन नपर्ने रजनतालाई मन परेको तर नेतालाइ मन नपर्ने कुरामा छलफल आवश्यक छ," उनले भने ।

नेता नेपालले देशको रक्षा गर्न एकीकृत समाजवादी पार्टी चिन्तशील रहेको बताउँदै स्वास्थ्य, शिक्षा, रोजागारी र जनताको हितका विषयमा पार्टीले गम्भीरता देखाउने बताए । पार्टीका विभिन्न कामहरु व्यवस्थित गर्दै पालिका, जिल्लाहरुमा कमिटी गठन गर्ने कार्य भइरहेको अध्यक्ष नेपालले बताए । पत्रकार सम्मेलन समाजबादी प्रेस संगठन बाँकेका अध्यक्ष लोकनाथ शर्माको अध्यक्षतामा सम्पन्न भएको थियो ।

प्रकाशित मिति: बिहीबार, पुस ८, २०७८ १३:४७

प्रतिक्रिया दिनुहोस्