१४औं महाधिवेशनबाट निर्वाचित कांग्रेस केन्द्रिय समितिको पहिलो बैठक बस्यो

राजनीति

गृहपृष्ठ
राजनीति
१४औं महाधिवेशनबाट निर्वाचित कांग्रेस केन्द्रिय समितिको पहिलो बैठक बस्यो

१४औं महाधिवेशनबाट निर्वाचित कांग्रेस केन्द्रिय समितिको पहिलो बैठक बस्यो

पहिलो बैठकबाट भए पाँच निर्णय

शनिबार, पुस १०, २०७८ बागेश्वरी पोस्ट

नेपालगञ्ज । १४औं महाधिवेशनबाट निर्वाचित नेपाली कांग्रेस केन्द्रिय कार्यसमितिको पहिलो बैठक बसेको छ । नवनिर्वाचित पदाधिकारी र सदस्यहरूलाई प्रमाणपत्र वितरण गरिएपछि आजै बैठक बसेको थियो । पार्टी कार्यालयमा बसेको बैठकमा राष्ट्रिय सभा निर्वाचनसम्बन्धि र निर्वाचन आयोगमा दल दर्ता गर्ने प्रस्तावमाथि छलफल भएको थियो ।

यस्तै बैठकमा संकल्प प्रस्ताव, धन्यवाद प्रस्ताव पेश गरिएको थियो । बैठकले महाधिवेशनपछिको अवस्थामा पार्टीमा सुदृढ एकता कायम गरेर अगाडि बढ्ने संकल्प गरेको महामन्त्री गगन थापाले बताए । त्यस्तै पार्टीको महाधिवेशनलाई सम्पन्न गराउन भूमिका खेल्ने सबैलाई धन्यवाद दिने निर्णय पनि गरेको छ । बैठकले राष्ट्रिय सभा सदस्यको निर्वाचनमा पार्टीका उम्मेदवारका लागि सभापति शेरबहादुर देउवाको हस्ताक्षर प्रयोग गर्ने, निर्वाचन आयोगमा पार्टीको दर्ता अद्यावधिक गर्ने र राष्ट्रिय सभा निर्वाचनका लागि दल दर्ता गर्न मुख्यसचिव कृष्णप्रसाद पौडेललाई जिम्मेवारी दिने निर्णय गरेको थापाले बताए ।

यसैगरी नेपाली कांग्रेसका नेताहरूको वरियता क्रम तोकिएको छ । सभापति शेरबहादुर देउवाले नेताहरूको वरियता क्रम तोकेका हुन् । विधान अनुसार सभापतिलाई वरियता तोक्ने अधिकार हुन्छ। वरियतामा देउवा पहिलो, रामचन्द्र पौडेल दोस्रो र कृष्ण सिटौला तेस्रो स्थानमा छन् । त्यसपछिको वरियतामा पदाधिकारीहरू छन् । कांग्रेसमा सभापतिसहित १३ जना पदाधिकारी रहन्छन् ।

त्यसपछि अन्य दुई नेतापछि मात्रै २० नम्बरमा कोइरालालाई राखिएको छ । देउवासँग कोइराला सभापतिमा पराजित भएका थिए । सभापतिमा पराजित हुने तर धेरै मत ल्याउने उम्मेदवार स्वतः केन्द्रिय सदस्य हुने प्रावधान छ । आजको बैठकमा शेखर कोइराला भने उपस्थित थिएनन् ।

प्रकाशित मिति: शनिबार, पुस १०, २०७८ १४:५१

प्रतिक्रिया दिनुहोस्