एमाले बाँकेको अध्यक्ष बन्ने दौडमा छन् यी चार नेता !

राजनीति

गृहपृष्ठ
राजनीति
एमाले बाँकेको अध्यक्ष बन्ने दौडमा छन् यी चार नेता !

एमाले बाँकेको अध्यक्ष बन्ने दौडमा छन् यी चार नेता !

सोमबार, पुस १२, २०७८ बागेश्वरी पोस्ट

नेपालगञ्ज । नेकपा एमालेको आठौं जिल्ला अधिवेशन यही पुष २३ गते नेपालगञ्जमा हुँदैछ । जिल्ला अधिवेशनको मिति नजिकिएसंगै नेता कार्यकर्ताको व्यस्तता बढेको छ । जिल्लाको नयाँ नेतृत्व चयन हुने भएकाले पनि एमालेजनमा अधिवेशनको विशेष चासो छ । एमाले बाँकेको नेतृत्वमा पुग्न चार जना नेताले दाबेदारी प्रस्तुत गरेका छन् ।

अहिले नेतृत्वमा रहेकादेखि पत्रकारिताका पृष्ठभूमीबाट पार्टी राजनीतिमा होमिएका नेताहरु समेत नेतृत्वको दौडमा छन् । वर्तमान अध्यक्ष निरक गुरुङ, उपाध्यक्ष किष्मतकुमार कक्षपति, सचिव रत्न खत्री र जिल्ला कमिटी सदस्य डिल्ली बिसीले दाबेदारी प्रस्तुत गरिरहेका छन् ।

गुरुङ यसअघि सातौं अधिवेशनबाट जिल्ला उपाध्यक्षमा निर्वाचित भएका थिए । तर, नेकपा एमाले र नेकपा माओवादी केन्द्र मिलेर नेकपा बनेपछि जिल्ला कमिटी सदस्य मात्रै रहेका गुरुङ पार्टी एकता भंग भएर फेरि एमाले व्युँतिएपछि भने उपाध्यक्ष कायमै थिए । त्यतिबेलाका अध्यक्ष अशोक कोइराला माधवकुमार नेपाल नेतृत्वको नेकपा एकीकृत समाजवादीतिर लागेपछि १० बुँदे सहमति अनुसार गुरुङलाई कार्तिक २७ गते अध्यक्ष बनाइएको हो । दुई महिना मात्र जिल्लााको नेतृत्व गर्ने अवसर पाएका गुरुङ अर्को कार्यकाल अध्यक्ष बन्ने चाहनासहित तयारी गरिरहेका छन् । माधव नेपाल पनि एमालेमै रहँदा गुरुङ नेपाल निकट थिए । सातौं अधिवेशनमा पनि उनले त्यसै प्यानलबाट चुनाव जितेका हुन् ।

अहिलेका उपाध्यक्ष कक्षपति पनि अध्यक्षमा उक्लिने तयारीमा छन् । खजुरा गाउँपालिकाका अध्यक्ष समेत रहेका कक्षपति माधव नेपालले नयाँ दल खोलेपछि नवगठित जिल्ला कमिटीमा उपाध्यक्ष बनेका हुन् । सातौं अधिवेशनमा उनी गुरुङसंग उपाध्यक्षमा पराजित भएका थिए । त्यतिबेला उनी केपी ओली प्यानलबाट उपाध्यक्ष लडेका थिए । उनले पार्टीको प्रचार विभाग प्रमुख भएर पनि काम गरिसकेका छन् ।

वर्तमान सचिव खत्री पनि जिल्ला अध्यक्ष बन्ने दौडमा छन् । उनी सातौं जिल्ला अधिवेशनबाट सचिवमा निर्वाचित भएका थिए । तर, पार्टी एकीकरणपछि खत्रीको भूमिका खुम्चिएको थियो । तत्कालीन समयमा माधव नेपाल निकट उनी नेपालले नयाँ पार्टी खोलेपछि भने एमालेमै बसे । उनी विद्यार्थी राजनीतिबाट उदाएका नेता हुन् । उनी महेन्द्र बहुमुखी क्याम्पस नेपालगञ्जको स्ववियु सभापति पनि भए ।

अध्यक्षका अर्का दाबेदार विसी अहिलेको कार्यसमितिमा जिल्ला कमिटी सदस्य छन् । लामो समयदेखि पत्रकारिता गरिरहेका विसी प्रेस चौतारी नेपालको केन्द्रिय सल्लाहकार समेत हुन् । उनी पार्टीको केन्द्रिय प्रचार विभाग सदस्य पनि हुन् । पार्टी संगठनमा पनि उत्तिकै खटेर काम गरिरहेका विसीले यो पटक आफूलाई जिल्ला अध्यक्षको दौडमा उभ्याएका हुन् ।

जिल्ला अधिवेशनका लागि एमालेले यही १७ गते प्रतिनिधि चयन गर्दैछ । ८१ वटै वडाबाट करिब एक हजारको हाराहारीमा प्रतिनिधि चयन हुनेछन् । प्रतिनिधि चुनिनुअघि पुष १४, १५ र १६ गते तीन दिन केन्द्रिय कमिटी, प्रदेश कमिटी र जिल्ला कमिटी सदस्यहरु आ-आफ्नो वडा छोडेर जिल्लाभर परिचालन भई संगठन निर्माण, विस्तार र अधिवेशनको माहोल बनाउन लाग्ने निर्णय भएको अध्यक्ष गुरुङले जानकारी दिएका छन् ।

प्रकाशित मिति: सोमबार, पुस १२, २०७८ १४:४६

प्रतिक्रिया दिनुहोस्