बाँके कांग्रेसको अधिवेशन पौष अन्तिम साता !

राजनीति

गृहपृष्ठ
राजनीति
बाँके कांग्रेसको अधिवेशन पौष अन्तिम साता !

बाँके कांग्रेसको अधिवेशन पौष अन्तिम साता !

सभापतिमा ७ जनाको भिडन्त !

सोमबार, पुस १२, २०७८ बागेश्वरी पोस्ट

नेपालगञ्ज । नेपाली कांग्रेस बाँकेको जिल्ला अधिवेशन पौषको अन्तिम साता गर्ने तयारी गरिएको छ । यसअघि मंसिर १४ गतेका लागि तोकिएको जिल्ला अधिवेशन प्रदेश अधिवेशनसंग जुध्ने अवस्था आएपछि स्थगित गरिएको थियो । उम्मेदवारी मनोनयनपत्र वितरण भइसकेको अवस्थामा अन्तिम समयमा अधिवेशन रोकिएको थियो ।

बाँकेसहित जिल्ला अधिवेशन हुन बाँकी १६ जिल्लामा पौषको अन्तिम साता अधिवेशन गर्ने तयारी गरिएको केन्द्रिय निर्वाचन समितिले जनाएको छ । केन्द्रिय निर्वाचन समितिका संयोजक बरिष्ठ अधिवक्ता गोपालकृष्ण घिमिरेले पौषको अन्तिम साता अधिवेशन हुने बताए । बागेश्वरीपोष्टसंगको कुराकानीमा घिमिरेले भने-"पौषको अन्तिम साता हामी अब १६ जिल्लाको अधिवेशन गर्छौं, सम्भवतः २७/२८ गतेतिरको मिति तोक्ने तयारी छ ।" बाँके, कैलाली, प्रदेश २ का ८ जिल्ला लगायत १६ जिल्लाको अधिबेशन केन्द्रिय महाधिवेशनपछि गर्ने गरी रोकिएको थियो ।

बाँकेको कांग्रेसको नेतृत्वमा ७ जना नेताले उम्मेदवारी दिने घोषणा गरेका छन् । जिल्ला पार्टी सभापतिका लागि लुम्बिनी प्रदेश सरकारका वन वातावरण तथा भूसंरक्षण मन्त्री सुरेन्द्र हमाल, वर्तमान उपसभापति सुनिलनरसिंह राणा, संविधानसभा सदस्य बादशाह कुर्मी, नेताहरु राजकुमार बर्मा, निरन्जनसिंह सिजापति, नारायण गौडेल र लक्ष्मीनारायण शाहले उम्मेदवारी दिने घोषणा गरेका हुन् । बागेश्वरीपोष्टलाई सोमबार संक्षिप्त प्रतिक्रिया दिँदै सातै जना नेताले आफूहरु सभापतिको उम्मेदवार भएको बताए । उनीहरुको एउटै स्वर छ- "म कुनै पनि हालतमा ब्याक हुन्नँ ।"

यी मध्ये सिजापति, गौडेल र शाह १३औं महाधिवेशनमा पनि सभापतिमा चुनाव लडेका थिए । पहिलो चरणमा दोस्रो बनेका सिजापति दोस्रो चरणमा भने अहिलेकी पार्टी सभापति किरण कोइरालासंग पराजित भएका थिए । बर्मा १२औं अधिवेशनमा पूर्व सभापति स्वर्गीय डा.अरुण कोइरालासंग चुनाव लडेका थिए । हमाल, राणा र कुर्मी पहिलोपटक सभापतिमा भिड्न लागेका हुन् । यी सात आकांक्षी मध्ये गौडेल बाहेक सबै सभापति शेरबहादुर देउबा पक्षीय नेताहरु हुन् । गौडेल भने डा.शेखर कोइराला निकट हुन् । राणा केही समय अघि पार्टी सभापति कोइरालासंग निकट भएपनि महाधिवेशन प्रतिनिधि लड्दा देउबा समूहतिर खुलेका थिए । बर्मा देउबा निकट भएपनि जिल्लाका स्थानीय तथा क्षेत्रीय अधिवेशनहरुमा फरक समीकरणमा रहेर भूमिका निभाएका कारण उनको भूमिका अझै प्रष्ट छैन । तर, बागेश्वरीपोष्टसंग उनले आफू देउबा पक्षको पुरानो नेता भएको बताए ।

आफू सभापतिमा लड्ने निश्चित भएपनि उम्मेदवारहरुले प्यानल अझै बनाएका छैनन् । अब अधिवेशन हुने मिति तोकिनासाथ प्यानलको तयारीमा लाग्ने उनीहरु बताउँछन् । यद्यपी गौडेल समूहका अधिकांश पदाधिकारी उम्मेदवारहरुको भने करिब टुंगो लागेको बताइएको छ । उनको प्यानलबाट उपसभापति एक जना राजकुमार मौर्यको टुंगो लागिसकेको छ । अर्को एक जना उपसभापतिमा गोपाल अधिकारीको उम्मेदवारी रहने सम्भावना प्रबल भएको बताइन्छ । एक जना सचिवमा सुधांशु कोइरालाको कन्फर्म छ । अर्को एक जना सचिवको टुंगो भने लागेको छैन । दुई सहसचिवमध्ये एक जना रेणु सिंहको टुंगो लागेपनि अर्को उम्मेदवारको टुंगो नलागेको बताइएको छ । जिल्ला सदस्यका उम्मेदवारहरु टुंगिन भने बाँकी छ ।

प्रकाशित मिति: सोमबार, पुस १२, २०७८ १७:००

प्रतिक्रिया दिनुहोस्