भेरी अस्पताल घटनाः गम्भीर अवस्थाका तीन जनालाई आइसियुमा लगियो

समाचार

गृहपृष्ठ
समाचार
भेरी अस्पताल घटनाः गम्भीर अवस्थाका तीन जनालाई आइसियुमा लगियो

भेरी अस्पताल घटनाः गम्भीर अवस्थाका तीन जनालाई आइसियुमा लगियो

बिहीबार, पुस १५, २०७८ बागेश्वरी पोस्ट

नेपालगञ्ज । भेरी अस्पताल घटनामा गम्भीर अवस्थामा रहेका तीन जनालाई उपचारका लागि आइसियुमा भर्ना गरिएको छ । भेरी अस्पतालको क्वाटरमा बस्दै आएका चार जना आज विहान मृत अवस्थामा भेटिएका थिए ।

भेरी अस्पताल परिसरभित्र रहेको कर्णाली प्रदेशको क्षेत्रीय मेडिकल स्टोरमा कार्यरत कर्मचारी खाँडाचक्र नगरपालिका ६ कालीकोटका २३ बर्षीय धनप्रसाद भट्टराईसहित चार जनाको मृत्यु भएको थियो । अचेत अवस्थामा रहेका भट्टराईकी श्रीमती २२ बर्षीया शुशीला, ३ बर्षीय छोरा दिवस र १८ बर्षीय भाइ नरेशलाई उपचारका लागि आइसियुमा लगिएको छ ।

भट्टराईसहित उनको ३ महिनाको छोरा इप्सन भट्टराई, सासु अन्दाजी ५५ बर्षीया कोपिला भट्टराई र धनप्रसादकी दिदी अन्दाजी २६ बर्षीया कोली भट्टराईको मृत्यु भएको जिल्ला प्रहरी कार्यालय बाँकेका प्रमुख एसपी श्यामकृष्ण अधिकारीले जानकारी दिए । एउटै कोठामा सुतेका उनीहरुको निसासिएर मृत्यु भएको हुन सक्ने अनुमान गरिएको उनले बताए ।

स्टोरको कर्मचारीले काम परेपछि राती १ बजेतिर पटक पटक सम्पर्क गर्दा भट्टराई सम्पर्कमा आएका थिएनन् । विहान ६ बजेतिर कोठामा गएर हेर्दा उनीसहित चार जना मृत अवस्थामा भेटिएको एसपी अधिकारीले जानकारी दिए । संगै कोठामा रहेका अन्य तीन जना अचेत अवस्थामा थिए । सुत्ने बेला कोइला बालेर सुतेको बताइएकाले निसासिएर मृत्यु भएको हुन सक्ने अनुमान गरिएको छ । घटनाबारे थप अनुसन्धान भइरहेको छ ।

प्रकाशित मिति: बिहीबार, पुस १५, २०७८ ०९:४४

प्रतिक्रिया दिनुहोस्