गौडेल प्रचारमा जुटिसक्दा देउबा समूहमा भने अलमल, को हो सभापतिको उम्मेदवार ?

राजनीति

गृहपृष्ठ
राजनीति
गौडेल प्रचारमा जुटिसक्दा देउबा समूहमा भने अलमल, को हो सभापतिको उम्मेदवार ?

गौडेल प्रचारमा जुटिसक्दा देउबा समूहमा भने अलमल, को हो सभापतिको उम्मेदवार ?

बिहीबार, पुस १५, २०७८ बागेश्वरी पोस्ट

नेपालगञ्ज । नेपाली कांग्रेस बाँकेको पुस २७ गते हुने जिल्ला अधिवेशन नजिकिँदै गर्दा चुनावी सरगर्मी बढेको छ । निर्वाचन नजिकै आउँदा नेता कार्यकर्ता छलफल, परामर्श र भेटघाटमा जुटेका छन् । सभापतिदेखि जिल्ला सदस्यका उम्मेदवार टिमको आधिकारिक उम्मेदवार बन्न दौडधुपमा छन् । आफ्नो पक्षमा माहोल बनाउन लागिपरेका छन् ।

सबैभन्दा चासोका साथ हेरिएको सभापति पदको रस्साकस्सीमा नेता डा.शेखर कोइराला समूहका नारायणप्रसाद गौडेलले भोट माग्न थालिसक्दा सभापति शेरबहादुर देउबा समूहका सभापतिका आकांक्षी भने रणभुल्लमा छन् । ६ जनाले दाबेदारी प्रस्तुत गरिरहँदा पदाधिकारीमा आकांक्षा राखेका उम्मेदवारदेखि नेता कार्यकर्ता, क्षेत्रीय प्रतिनिधि अन्यौलमा छन् ।

देउबा समूहबाट सभापतिको छनौट पेचिलो बन्दा पदाधिकारीदेखि जिल्ला सदस्यसम्मका आकांक्षी प्रबल ढंगले मुखरित हुन सकेका छैनन् । यद्यपी आकांक्षा भने झिनो स्वरमा व्यक्त गरिरहेका छन् । गौडेल चुनावी मोर्चामा खटिइसक्दा देउबा समूहमा अन्यौल छ । एकले अर्कोलाई नस्विकार्ने र आफू नै आधिकारिक हुने दाबी सबैले गरिरहँदा यो समूहमा 'टिम स्पिरिट' कमजोर देखिएको छ ।

देउबा समूहबाट लुम्बिनी प्रदेशका वन वातावरण तथा भूसंरक्षण मन्त्री सुरेन्द्र हमाल र संविधानसभा सदस्य बादशाह कुर्मी मध्ये एक जनाले 'लाइन' पाउने चर्चा कांग्रेस बृत्तमा छ । "सुरेन्द्र दाईको सभापति शेरबहादुर देउबा दाईसंगै कुरा भइसकेको छ, अन्त्यमा उहाँ नै आधिकारिक उम्मेदवार हुनुहुन्छ," कांग्रेस पार्टी कार्यालयमा भेटिएका एक जना नेताले भने । उनले हमाल नै देउबा समूहको उम्मेदवार हुने दाबी गरे । उनले दाबी गरे अनुसार हमाल उम्मेदवार हुँदा उनको टिममा बस्न चाहने लोकप्रिय नेताहरुको ठूलो पंक्ति छ । हमाल सबैभन्दा बलियो उम्मेदवार भएको उनको जिकिर छ ।

तर, अर्का एक नेताले भने सहमहामन्त्री किशोरसिंह राठौरको रोजाईमा कुर्मी परेकाले उनी नै उम्मेदवार हुने दाबी गरे । "पहिले किशोर दाई केन्द्रिय सदस्य मात्रै हुनुहुन्थ्यो, त्यतिबेला पनि उहाँकै डिजाइनमा टिम अघि बढ्यो, अहिले त झन दाई सहमहामन्त्री बन्नुभएको छ, उहाँले जसलाई चाहनुहुन्छ, उ नै देउबा समूहको आधिकारिक उम्मेदवार हो," उनले भने । तर, कतिपय नेता कार्यकर्ताहरुले जिल्लामा राठौरको जबर्जस्ती उपस्थिति र हस्तक्षेप पार्टीका लागि प्रत्युत्पादक हुन सक्ने भएकाले उनले विवेकपूर्ण निर्णय लिनुपर्ने बताउने गरेका छन् । भित्रीरुपमा हमाल परिवार र राठौरबीचमा शक्ति संघर्ष रहेकाले सुरेन्द्रलाई राठौरले अघि सार्ने सम्भावना कम रहेको चर्चा पनि छ ।

कतिपयले हमालले आधिकारिक 'लाइन' नपाए अन्तिममा चुनाव नलड्ने अड्कल पनि काटिरहेका छन् । तर, सुरेन्द्रले आफ्ना निकटस्थहरुसंग आफू कुनै पनि हालतमा चुनाव लड्ने बताइरहेका छन् । धेरैले हमाल र कुर्मी मध्ये एक उम्मेदवार हुने लख काटिरहेका छन् । पहिलो चरणमा यी दुबै नै उम्मेदवार हुन सक्ने अनुमान पनि छ । यस बाहेक अघिल्लो अधिवेशनमा किरण कोइरालासंग सभापतिमा पराजय व्यहोरेका नेता निरन्जनसिंह सिजापति पनि देउबा समूहकै उम्मेदवार हुन् । उनले लाइन पाएनन् भने पनि चुनाव लड्ने अनुमान गरिएको छ । "सकेसम्म आधिकारिक हुने हरसम्भव कोशिस उनले गर्छन् तर पाएनन् भने पनि उनी चुनाव लड्छन्," एक नेताले दाबी गरे ।

क्षेत्रीय अधिवेशनमा कोइराला क्याम्प छाडेर देउबा समूहका छिरेका वर्तमान उपसभापति सुनिलनरसिंह राणाले पनि दाबी छाडेका छैनन् । अन्य उम्मेदवारहरुको अन्तरसंघर्षमा बाजी मार्ने दाउमा उनी रहेको एक नेता बताउँछन् । कसैले कसैलाई नस्विकारेको अवस्थामा राठौरले राणालाई अघि सार्ने चर्चा पनि सुनिन थालेको छ । नेता राजकुमार बर्मा पनि सभापतिका दाबेदार हुन् । उनले देउबा समूहको आधिकारिक लाइन पाउने सम्भावना कमजोर रहेपनि उनको भूमिका भने महत्वपूर्ण हुने विश्लेषण गरिएको छ । अघिल्लो अधिवेशनमा पनि सभापतिमा भिडेका नेता लक्ष्मीनारायण शाहले पनि दाबी छाडेका छैनन् । यद्यपी प्रदेश अधिवेशनमा उनी सहमहामन्त्रीमा भिडेकाले उनले दाबी गर्ने आधार कमजोर बनेको नेताहरु बताउँछन् । कतिपयले उनले उम्मेदवारी दिन नपाउने दाबी पनि गर्छन् । तर, बागेश्वरीपोष्टलाई उनले आफूले सभापतिमा उम्मेदवारी दिने बताएका छन् ।

अंकगणिमा जिल्लामा देउबा समूह बलियो देखिएपनि उम्मेदवार छनौटको सकसले अलमल छ । देउबा समूहको अन्तरविरोध र अन्तरसंघर्षको फाइदा उठाउँदै सभापतिमा दाउ मार्ने ध्याउन्नेमा गौडेल देखिन्छन् । गौडेल समूहले पदाधिकारी पनि करिब टुंग्याइसकेको छ । उपसभापतिमा गोपाल अधिकारी र राजकुमार मौर्य, सचिव सुधांशु कोइराला तथा सहसचिवमा रेणु सिंह र विश्व लम्सालको करिब टुंगो लागेको बताइएको छ । अर्को एक जना सचिवमा भने कृष्ण विके रसाइली, पूर्ण आचार्य, आशिष काफ्ले, चिन्तामणि धिताल लगायतको चर्चा छ । कोही एक जना थारु समुदायको नेता पनि सचिवको उम्मेदवार बन्न सक्ने चर्चा छ । तर, यी मध्ये क्षेत्र नम्बर ३ बाट प्रतिनिधित्व गर्ने रसाइली, काफ्ले वा अन्य कोही थारु समुदायको नेता सचिवको उम्मेदवार बन्ने सम्भावना बढी रहेको बताइएको छ । यो समूहले १९ गते पदाधिकारीका उम्मेदवार घोषणा गर्ने तयारी गरेको छ ।

देउबा समूहबाट भने उपसभापतिमा सुरेन्द्रनाथ सापकोटा, मेघराज ओली, रविन्द्र हमाल लगायतको चर्चा छ । यी मध्ये ओली सचिवको उम्मेदवार पनि हुन सक्ने विश्लेषण गरिँदैछ । हमालले पनि उपसभापति वा सचिव भनिरहेको बुझिएको छ । निरज चलाउनेले पनि सचिवको प्रचार थालिसकेका छन् । चलाउनेले आफू सचिवमै भिड्ने बागेश्वरीपोष्टसंग बताए । रुद्रबहादुर ओलीको नाम पनि सचिवका लागि सुनिएको छ । पुरनसिंह ठकुरीले पनि सहसचिवको प्रचार गरिरहेका छन् । सुदिपनरसिंह राणाले पनि पदाधिकारीमा आकांक्षा राखेका छन् । अन्य उम्मेदवार अझै खुलेका छैनन् ।

प्रकाशित मिति: बिहीबार, पुस १५, २०७८ २०:३८

प्रतिक्रिया दिनुहोस्