गौडेल समूहको पदाधिकारी उम्मेदवार घोषणा

राजनीति

गृहपृष्ठ
राजनीति
गौडेल समूहको पदाधिकारी उम्मेदवार घोषणा

गौडेल समूहको पदाधिकारी उम्मेदवार घोषणा

सोमबार, पुस १९, २०७८ बागेश्वरी पोस्ट

नेपालगञ्ज । नेपाली कांग्रेस बाँकेको सभापति पदका उम्मेदवार नारायण प्रसाद गौडेल समूहले पदाधिकारी उम्मेदवारहरुको घोषणा गरेको छ ।

पार्टी कार्यालय नेपालगञ्जमा आज एक कार्यक्रमको आयोजना गरेर पदाधिकारीमा लड्ने उम्मेदवारहरुको घोषणा गरिएको हो । गौडेल समूहको सचिवालय संयोजक तथा लुम्बिनी प्रदेश कमिटी सदस्य टेकनारायण भुषालले उम्मेदवार घोषणा गरेका थिए ।

गौडेल समूहबाट उपसभापति गोपाल प्रसाद अधिकारी र राजकुमार मौर्य, सचिवमा सुधांशु कोइराला र टंकप्रसाद काफ्ले (आशिष) तथा सहसचिवमा रेणु सिंह र विश्वराज लम्साल उम्मेदवार रहने घोषणा गरिएको हो ।

गौडेल समूहको सचिवालय संयोजक तथा लुम्बिनी प्रदेश कमिटी सदस्य भुषालको सभापतित्व तथा नेपाली कांग्रेस लुम्बिनी प्रदेश कमिटीका महामन्त्री सुरेन्द्रराज आचार्यको प्रमुख आतिथ्यता एवम् कांग्रेस बाँकेकी सभापति किरण कोइरालाको विशिष्ट आतिथ्यतामा उम्मेदवार घोषणा गरिएको हो । जिल्ला सदस्यका उम्मेदवारहरुको घोषणा भने केही दिनपछि चियापान कार्यक्रम राखेर गरिने भुषाले बताए ।

घोषणा कार्यक्रममा बोल्दै लुम्बिनी प्रदेश कमिटीका महामन्त्री आचार्य, बाँके जिल्ला सभापति कोइराला, जिल्ला सचिव तप्त पौडेल, क्षेत्र नम्बर १ का क्षेत्रीय सभापति पोषण केसी, संविधानसभा सदस्य अब्दुल हमिद सिद्दिकी (भोला), नेताहरु हुर्मत न्यौपाने, कृष्ण विक रसाइली, लुम्बिनी प्रदेश कमिटी सदस्य अन्जना पाण्डे, नेविसंघ अध्यक्ष पूर्ण आचार्य लगायतले बाँके कांग्रेसलाई चलायमान र सशक्त बनाउँदै कार्यकर्ताको मनोबल उकास्न गौडेल समूहलाई विजयी बनाउन आग्रह गरेका थिए । घोषणासभामा सभापतिका उम्मेदवार गौडेल र उपसभापतिका उम्मेदवार अधिकारीले आफ्नो समूहलाई अमूल्य मत दिन आग्रह गरेका थिए । सशक्त कांग्रेस बनाउन आफूहरुलाई मतदान गरी विजयी बनाउन उनीहरुले आग्रह गरे । सभापतिका उम्मेदवार गौडेलले आफ्नो मन्तब्य राख्नुअघि पार्टी कार्यालय परिसरमा रहेको विपीको मूर्तिमा माल्यार्पण गरेका थिए । कार्यक्रमको सञ्चालन क्षेत्र नम्बर १ का निवर्तमान क्षेत्रीय सचिव डिल्ली गिरीले गरेका थिए ।

नेपाली कांग्रेस बाँकेको जिल्ला अधिवेशन पुष २७ गते हुँदैछ ।
घोषणासभाको फोटो फिचर