गौडेल समूहले नेपालगञ्जका क्षेत्रीय प्रतिनिधिहरुलाई भेट्यो

राजनीति

गृहपृष्ठ
राजनीति
गौडेल समूहले नेपालगञ्जका क्षेत्रीय प्रतिनिधिहरुलाई भेट्यो

गौडेल समूहले नेपालगञ्जका क्षेत्रीय प्रतिनिधिहरुलाई भेट्यो

बुधबार, पुस २१, २०७८ बागेश्वरी पोस्ट

नेपालगञ्ज । नेपाली कांग्रेस बाँकेको सभापति पदका उम्मेदवार नारायण प्रसाद गौडेल समूहले प्रचारप्रसारलाई तीब्र पारेको छ । गौडेल समूहले जिल्ला अधिवेशनका मतदाताका रुपमा रहेका क्षेत्रीय प्रतिनिधिहरुलाई भेट्ने क्रम जारी नै राखेको छ ।

बुधबार नेपालगञ्ज उपमहानगरपालिकाका विभिन्न वडामा पुगेर गौडेल समूहका उम्मेदवारहरुले क्षेत्रीय प्रतिनिधिहरुसंग भेटघाट गरेका छन् । वडा नम्बर १, २, १२ र १८ मा पुगेर भेटघाट गरिएको गौडेल समूहको सचिवालय सहसंयोजक एबम् क्षेत्र नम्बर १ का निवर्तमान क्षेत्रीय सचिव डिल्ली गिरीले बताए । भेटघाटका क्रममा क्षेत्रीय प्रतिनिधिहरुले गौडेल समूहलाई सहयोग गर्ने बताएको गिरीले जानकारी दिए ।

सभापतिका उम्मेदवार गौडेल, उपसभापतिका उम्मेदवार गोपालप्रसाद अधिकारी र राजकुमार मौर्य, सचिवका उम्मेदवार सुधांशु कोइराला र टंक प्रसाद काफ्ले (आशिष) तथा सहसचिवका उम्मेदवार रेणु सिंह ठाकुर र विश्वराज लम्सालसहित जिल्ला सदस्य पदका उम्मेदवारहरुले क्षेत्रीय प्रतिनिधिहरुलाई भेटेका थिए । भेटघाटका क्रममा सभापतिका उम्मेदवार गौडेलले आफूहरुलाई कुनै लोभ-लालच नभएको भन्दै पार्टीलाई कसरी मजबुत बनाउने भन्ने ध्येय मात्रै रहेको बताए । उनले पार्टीलाई चलायमान बनाउन आफ्नो टिम अहोरात्र खटिने बताउँदै विवेकपूर्ण मतदान गरी बाँके कांग्रेस हाँक्न सक्ने आफ्नो जुझारु टिमलाई मतदान गर्न आग्रह गरे ।

No description available.
वडा नम्बर १ र १८ मा प्रमुख अतिथि रहेकी कांग्रेस नेतृ एवम् नेपालगञ्ज उपमहानगरपालिकाकी उपमेयर उमा थापा मगरले गौडेल नेतृत्वको टिमलाई विजयी बनाउन आग्रह गरिन् । उनले सक्षम र जुझारु टिम भएकाले बाँके कांग्रेसलाई सुदृढ र सबल बनाउन गौडेल समूहलाई मतदान गर्न जरुरी रहेको बताइन् । महाधिवेशन प्रतिनिधि एवम् नेपाल विद्यार्थी संघका अध्यक्ष पूर्ण आचार्यले बाँकेमा सशक्त कांग्रेस बनाउनका लागि गौडेल समूह सक्षम रहेको भन्दै मतदान गर्न आग्रह गरे । कोहलपुर नगरपालिका नगर सभापति विरेन्द्र शाहले कार्यकर्ताको भावना अनुसार काम गर्न सक्ने गौडेल समूह नेतृत्वका लागि सक्षम रहेको बताए । अन्य उम्मेदवारहरुले पनि आफूहरुलाई मतदान गरी विजयी बनाउन आग्रह गरेका थिए । भेटघाटका क्रममा लुम्बिनी प्रदेश कमिटी सदस्य कृष्णा सापकोटा चौधरी लगायत उपस्थित थिए ।

वडा नम्बर १ मा वडा सभापति सीता काफ्ले, २ मा प्रदिप श्रेष्ठ तथा १८ मा जगदिश कुर्मीको सभापतित्वमा भेटघाट कार्यक्रम भएका थिए । वडा नम्बर १२ मा गरिएको भेटघाटमा अग्रज नेताहरु अजित कुमार शर्मा, सुरेन्द्रनाथ सापकोटा, वडा सभापति रामु चिडिमार लगायत उपस्थित थिए । त्यस क्रममा शर्माले वडा नम्बर १२ का प्रतिनिधिले आफ्ना नेता छान्दा विवेक प्रयोग गर्ने बताउँदै सक्षम र जुझारु उम्मेदवारहरु आफूहरुको रोजाईमा पर्ने बताएका थिए ।

No description available.