'युवराज दाईलाई उम्मेदवार बनाउन पाउँदा गर्ब लागेको छ'-अमरसिंह पुन

राजनीति

गृहपृष्ठ
राजनीति
'युवराज दाईलाई उम्मेदवार बनाउन पाउँदा गर्ब लागेको छ'-अमरसिंह पुन

'युवराज दाईलाई उम्मेदवार बनाउन पाउँदा गर्ब लागेको छ'-अमरसिंह पुन

बिहीबार, पुस २२, २०७८ बागेश्वरी पोस्ट

नेपालगन्ज । नेपाली कांग्रेसका केन्द्रिय सदस्य मैकुलाल बाल्मिकीले आसन्न राष्ट्रियसभा निर्वाचनमा सत्ता गठबन्धनका उम्मेदवारहरुलाई जिताउन सबै लाग्नुपर्ने बताएका छन् । नेपाली कांग्रेस बाँकेको पार्टी कार्यालयमा नवनिर्वाचित लुम्बिनी प्रदेश सभापति अमरसिंह पुनको स्वागत र सम्मान तथा आसन्न राष्ट्रियसभा निर्वाचनका विषयमा आज भएको छलफलमा उनले योग्य मान्छेको मूल्यांकन हुँदो रहेछ भन्ने कुरा युवराज शर्मालाई पार्टीले उम्मेदवार बनाएपछि पुष्टि भएको बताए ।

लुम्बिनी प्रदेश सभापति पुनले राष्ट्रियसभामा कांग्रेसले गर्व गर्न लायक उम्मेदवार पाएको बताएका छन् । पार्टीभित्र निरन्तर लागेको व्यक्तिको उचित मूल्यांकन गर्न सकिएकाले आफू औधि खुसी भएको पुनले बताए । "युवराज दाईलाई जसरी पनि एक नम्बरमै सिफारिस गर्छु भन्ने अठोट लिएँ, नेताहरुलाई कुनै पनि हालतमा कन्भिन्स गर्छु भनेर लागें, दाईको नाम एक नम्बरमै सिफारिस गर्यौं र उहाँ जस्तो मान्छेलाई उम्मेदवारका रुपमा पाएका छौं," उनले भने-"गर्व लागेको छ, यति लामो समय पार्टीमा काम गरेको नेतालाई उम्मेदवार बनाउन सकेका छौं ।"

उनले सत्ता गठबन्धनका उम्मेदवारलाई जिताउन लुम्बिनी प्रदेश कमिटी लागिपर्ने बताए । उनले आफू एउटा समूहबाट जितेर आएपनि अब सबैको सभापति बनेर पार्टी संगठन मजबुत बनाउन लाग्ने बताए । "अब संगठन राम्रो बनाउनतिर लाग्ने हो, स्थानीय निर्वाचन आउँदैछ, लोकप्रिय मान्छेलाई पार्टीको उम्मेदवार बनाएर जिताउने हो, तेरो मेरो होइन, योग्य, सक्षम र लोकप्रिय मान्छेमाथि अन्याय हुँदैन," पुनले भने । "लुम्बिनीका १०९ वटै स्थानीय तहमा कांग्रेस पुग्छ, अब कार्यतालिका सहित काम गर्छौं, कांग्रेसलाई मजबुत बनाउनतिर लाग्छौ, उनले भने । उनले आफूलाई जिताउन भूमिका खेलेकोमा धन्यवाद समेत दिए ।

लुम्बिनी प्रदेशका वन, वातावरण तथा भूसंरक्षण मन्त्री सुरेन्द्र हमालले सबै लागेर आफ्ना उम्मेदवारहरुलाई जिताउनुपर्नेमा जोड दिए । राष्ट्रियसभाका उम्मेदवार युवराज शर्माले निरन्तरता र धैर्यताले अवसर पाइँदो रहेछ भन्ने सन्देश आफूले पाएको उम्मेदवारीबाट प्रवाह भएको बताए । उनले भने-"पदले मात्र हुँदैन, व्यक्तित्वको विकास गर्दै योग्यता बढाउन सके जुन बेला पनि अवसर मिल्न सक्छ भन्ने मलाई ढिलै भएपनि पार्टीले गरेको न्यायबाट देखिएको छ ।"

बाँके कांग्रेसकी सभापति किरण कोइरालाको सभापतित्वमा भएको छलफल कार्यक्रममा उपसभापति सुनिलनरसिंह राणाले स्वागत मन्तब्य व्यक्त गरेका थिए । पार्टी सचिव कपिल शर्माले सञ्चालन गरेको कार्यक्रममा प्रदेश सांसद मो.याकुब अन्सारी, संविधानसभा सदस्य बादशाह कुर्मी ,लुम्बिनी प्रदेश सदस्यहरु टेक नारायण भुषाल, प्रेम केसी, अन्जना पाण्डे लगायत नेता कार्यकर्ताको उपस्थिति थियो ।

No description available.