सभापतिले पार्टीभित्र न्यायको शुरुवात गर्नुभएको छः सहमहामन्त्री राठौर

राजनीति

गृहपृष्ठ
राजनीति
सभापतिले पार्टीभित्र न्यायको शुरुवात गर्नुभएको छः सहमहामन्त्री राठौर

सभापतिले पार्टीभित्र न्यायको शुरुवात गर्नुभएको छः सहमहामन्त्री राठौर

शनिबार, पुस २४, २०७८ बागेश्वरी पोस्ट

नेपालगञ्ज । नेपाली कांग्रेसका केन्द्रिय सहमहामन्त्री किशोरसिंह राठौरले सभापति शेरबहादुर देउबाले पार्टीभित्र न्यायको सुरुवात गरेको बताएका छन् । नेपाली कांग्रेस बाँके क्षेत्र नम्बर ३ ले १४औं महाधिवेशनबाट नवनिर्वाचित सहमहामन्त्री र केन्द्रिय सदस्यहरुको बधाई तथा सम्मानमा आज आयोजना गरेको कार्यक्रममा उनले सभापति देउबाले दोस्रो कार्यकाल शुरु गरे लगत्तै पुराना, इमान्दार र निष्ठावान नेताहरुको उचित मूल्यांकन गरिरहेको बताएका हुन् ।

No description available.

बाँकेका पुराना नेता युवराज शर्मालाई राष्ट्रियसभा निर्वाचनमा पार्टीको तर्फबाट उम्मेदवार बनाएर ठूलो न्याय दिएको उनले बताए । "पार्टी सभापति कृष्णप्रसाद भट्टराईदेखि सुशील कोइरालासम्मले मूल्यांकन गर्न नसकेको युवराज दाईलाई अहिलेको सभापतिजीले मूल्यांकन गर्नुभएको छ, न्यायको सुरुवात गर्नुभएको छ, मूल्यांकन गर्न शुरु गर्नुभएको छ," उनले भने । युवराज शर्मा राष्ट्रियसभामा उम्मेदवार बन्न पाउनु ३ नम्बर क्षेत्रका कांग्रेसजनका लागि गर्वको कुरा भएको सहमहामन्त्री राठौरले बताए ।

उनले हालै महाधिवेशनमा भएको आन्तरिक प्रतिष्पर्धालाई ठूलो रुपमा नलिएर महाधिवेशनबाट आएको परिणालाई सहजरुपमा लिँदै अघि बढ्नुपर्ने बताए । उनले मुलुकको उत्थानका लागि वडादेखि केन्द्रसम्म अब नेपाली कांग्रेसले जित्नुपर्ने बताए । क्षेत्रीय सभापति नक्की खाँको सभापतित्वमा भएको कार्यक्रममा नवनिर्वाचित सहमहामन्त्री राठौर, केन्द्रिय सदस्य मैकुलाल बाल्मिकी र जुवेदा खातुन जागालाई सम्मान गरिएको थियो ।

केन्द्रिय सदस्य बाल्मिकीले मुलुकको हरेक परिवर्तनमा कांग्रेसले नै अगुवाई गर्दै आएकाले अझै पनि मुलुकको नेतृत्व कांग्रेसले गर्न जरुरी रहेको बताए । अर्का केन्द्रिय सदस्य खातुनले पार्टीभित्र आन्तरिक प्रतिष्पर्धाको चरण सकिएको र अब विपक्षीसँग लड्नुपर्ने बेला आएको बताइन् ।

उक्त कार्यक्रममा कांग्रेस बाँकेका पूर्व सभापति एवम् राष्ट्रिय सभा सदस्यका उम्मेदवार युवराज शर्मा, पूर्व जिल्ला सभापति कृष्णमान श्रेष्ठ, लुम्बिनी प्रदेशका सांसद मोहम्मद याकुव अन्सारी, संविधानसभा सदस्य बादशाह कुर्मी र आशा बिक, जिल्ला सचिव कपिलदेव शर्मा, क्षेत्र नम्बर २ का सभापति रमेश गुप्ता, नेताहरु निरञ्जनसिंह सिजापति, मेघराज ओली, लक्ष्मीनारायण शाह, निर्मला रोकाय, दयाराम यादव लगायतले पनि बोलेका थिए ।

प्रकाशित मिति: शनिबार, पुस २४, २०७८ २०:१९

प्रतिक्रिया दिनुहोस्