अन्ततः एमाले बाँकेको अध्यक्षमा किष्मत नै निर्विरोध

राजनीति

गृहपृष्ठ
राजनीति
अन्ततः एमाले बाँकेको अध्यक्षमा किष्मत नै निर्विरोध

अन्ततः एमाले बाँकेको अध्यक्षमा किष्मत नै निर्विरोध

अध्यक्ष मण्डलको प्रस्ताब अनुसारकै जिल्ला कमिटी

आइतबार, पुस २५, २०७८ बागेश्वरी पोस्ट

नेपालगञ्ज । नेकपा एमाले बाँकेको जिल्ला कमिटी अन्ततः अध्यक्ष मण्डलले प्रस्ताव गरे अनुसार नै चयन भएको छ । लामो कसरतपछि सर्वसम्मत नेतृत्व चयन भएको हो । अध्यक्ष मण्डलले हिजो नै अध्यक्षमा किष्मतकुमार कक्षपति, उपाध्यक्षमा डिल्ली विसी, सचिवमा रत्न खत्री र उपसचिवमा भूमीसरा धिताल र दिपक बर्माको नाम प्रस्ताब गरेको थियो ।

तर, प्रस्तावित बाहेकका आकांक्षीले पनि उम्मेदवारी दर्ता गराएपछि सहमति जुट्न सकेको थिएन । आज दिनभरको प्रयासबाट अध्यक्ष मण्डलकै प्रस्ताबले मूर्तरुप पाएको हो । अध्यक्षमा उम्मेदवारी दर्ता गराएका निरक गुरुङ र अशोक कर्माचार्यले उम्मेदवारी फिर्ता लिएपछि कक्षपति अध्यक्ष चुनिएका हुन् ।

उपाध्यक्षमा विसी हिजै निर्विरोध भइसकेका थिए । सचिवमा उम्मेदवारी दिएका बलराम भट्टराई र भिम वलीले उम्मेदवारी फिर्ता लिएपछि खत्री सर्वसम्मत सचिव चयन भएका छन् । यस्तै उपसचिवमा उम्मेदवारी दिएका अछरी पोखरेल, तुलसीराम थारु र मनोज कुमार बर्माले उम्मेदवारी फिर्ता लिएपछि धिताल र बर्मा उपसचिव चयन भएका हुन् । "सदस्यहरु पनि करिब करिब मिलेको छ, पदाधिकारी मिलिसकेकाले अब सबै मिल्छ," उपाध्यक्षमा निविरोध भएका विसीले भने ।

१२० सदस्यीय जिल्ला कमिटी अध्यक्ष मण्डलले हिजै प्रस्ताब गरेको थियो । सदस्यमा पनि प्रस्तावित बाहेकका उम्मेदवारहरुले आफ्नो उम्मेदवारी फिर्ता लिइरहेका छन् । बाँके जिल्ला इन्चार्ज केन्द्रिय सदस्य सूर्य ढकाल अध्यक्ष रहेको अध्यक्ष मण्डलमा बाँकेबाट प्रतिनिधित्व गर्ने पाँच केन्द्रिय सदस्य छन् । ढकालसहित मोहम्मद हारुन, पशुपतिदयाल मिश्र, शान्ति ढकाल र दिपा शर्मा छन् ।

प्रकाशित मिति: आइतबार, पुस २५, २०७८ १७:१७

प्रतिक्रिया दिनुहोस्