पश्चिम नेपालका थारु गाउँमा माघीको रौनक

समाचार

गृहपृष्ठ
समाचार
पश्चिम नेपालका थारु गाउँमा माघीको रौनक

पश्चिम नेपालका थारु गाउँमा माघीको रौनक

शुक्रबार, पुस ३०, २०७८ बागेश्वरी पोस्ट

नेपालगञ्ज । पश्चिम नेपालका थारु गाउँमा माघीको रौनक छाएको छ । नयाँ बर्षका रुपमा माघ एक गते अर्थात् भोली माघी मनाउने परम्परा भए पनि त्यसको रौनकताले अहिल्यैदेखि गाउँघर ढाकेको हो ।

बाँके, बर्दिया, दाङ्ग,, कैलाली, कञ्चनपुर लगायतका थारु गाउँहरुमा गीत÷संगीतले माहोल फेरिएको छ । थारु गाउँहरुमा मादलुको धुनसँगै ‘सखिए’को मधुर स्वर गुञ्जिन थालेका छन् । परम्परागत भेषभूषामा सजिएका थारु युवतीहरु नाँचगानमा व्यस्त छन् । आज सँगुर काटेर रातभर रमाइलो गर्दै विभिन्न परिकार खाँदै थारुहरु रमाउने गर्दछन् ।

घरकै अन्न प्रयोग गरी जाँड, ढिक्री, अन्दी रोटी, अन्दी भात तयार गर्न थारु महिलाको व्यस्त भएका छन् । यसरी तयार पारिने खानाका परिकारको सामूहिकरुपमा खानपिन गरी टोलटोलमा रमाइलो गर्ने चलन थारु समुदायमा रहेको छ । थारुहरु माघको पहिलो हप्ताभरि नै माघी मनाउँछन् ।

माघीमा घरमूलीबाट बर्षभरीको आय–व्यय विवरण प्रस्तुत गर्ने र नयाँ योजना बनाउने गरिन्छ । गाउँ रेखदेख गर्ने चौकीदार, गाउँका अगुवा, चिराकिया, गुरुवा आदिको चयन पनि यसैबेला गरिन्छ । माघी थारु जातिमा मात्र होइन अन्य समुदायमा पनि विशेष महत्वका साथ मनाइन्छ । माघीमा तिलको लड्डु, भुजा, तरुल, गन्जी खाने चलन छ ।

तर, कोरोना संक्रमण बढ्दै गएका कारण माघीका अवसरमा आयोजना गरिने मेला, महोत्सब र भिडभाड भने यस बर्ष नहुने भएका छन् ।

प्रकाशित मिति: शुक्रबार, पुस ३०, २०७८ ०९:२१

प्रतिक्रिया दिनुहोस्