नेपालगञ्जको ड्रिमल्याण्ड होटल र क्यासिनो बन्द गर्न सरकारको निर्देशन

समाचार

गृहपृष्ठ
समाचार
नेपालगञ्जको ड्रिमल्याण्ड होटल र क्यासिनो बन्द गर्न सरकारको निर्देशन

नेपालगञ्जको ड्रिमल्याण्ड होटल र क्यासिनो बन्द गर्न सरकारको निर्देशन

बिहीबार, माघ २७, २०७८ बागेश्वरी पोस्ट

नेपालगञ्ज । बक्यौता नतिरेको भन्दै सरकारले नेपालगञ्ज-१० आदर्शनगरस्थित ड्रिमल्याण्ड होटल बन्द गर्न निर्देशन दिएको छ । मिनी क्यासिनो समेत सञ्चालन गर्दै आएको ड्रिमल्याण्डले ३८ करोड १० लाख ४५ हजार ६ सय ६४ बक्यौता नबुझाएको भन्दै होटल बन्द गर्न सरकारले निर्देशन दिएको हो । संस्कृति, पर्यटन तथा नागरिक उड्डयनमन्त्री प्रेम आलेको प्रस्तावमा माघ २६ गते मन्त्रीस्तरीय निर्णयले होटेल बन्द गर्ने निर्णय गरेको हो ।

उक्त होटलले आर्थिक वर्ष २०७६/७७ सम्मको बक्यौता, आर्थिक वर्ष २०७७/७८ सम्मको इजाजतपत्र नवीकरण दस्तुर र चालू आर्थिक वर्षको रोयल्टी समेत गरी ३८ करोड १० लाख ४५ हजार ६ सय ६४ रूपैंया बुझाएको थिएन । बाराम्बार ताकेता गर्दा पनि बक्यौता रकम नबुझाएपछि सरकारले होटल बन्द गर्ने तथा मिनी क्यासिनोको लाइसेन्स रद्द गर्ने निर्णय गरेको हो ।

२०६७ भदौ २० गते ह्याप्पी आवर प्रा.लि. काठमाडौं ४ का नाममा भिडियो गेम, आधुनिक मेसिन उपकरणद्वारा कार्ड, चिप्स, क्वाइन, क्यास प्रयोग गरी आगन्तुकलाई मनोरञ्जन दिन ब्यवसायिक खेल खेलाउने अनुमति दिइएको थियो । ह्याप्पी आवरले ड्रिमल्याण्डमा मिनी क्यासिनो सञ्चालन गर्दै आएको भएपनि अटेरी गरी बक्यौता नतिर्नु तथा कर छली गर्नु जस्ता कारणलाई आधार मानेर क्यासिनोको लाइसेन्स रद्द गर्ने निर्णयमा सरकार पुगेको हो ।

No description available.