सेलाउँदै-तात्दै बाँके कांग्रेस, फेरि बढ्यो सरगर्मी

राजनीति

गृहपृष्ठ
राजनीति
सेलाउँदै-तात्दै बाँके कांग्रेस, फेरि बढ्यो सरगर्मी

सेलाउँदै-तात्दै बाँके कांग्रेस, फेरि बढ्यो सरगर्मी

शनिबार, माघ २९, २०७८ बागेश्वरी पोस्ट

नेपालगञ्ज । बाँके कांग्रेस फेरि तातेको छ । विभिन्न कारणले अधिवेशन सर्दै जाँदा सेलाउँदै-तात्दै आएको बाँके कांग्रेस अधिवेशनको नयाँ मिति तोकिएसंगै फेरि गर्माएको हो । बाँकेसहित जिल्ला अधिवेशन गर्न बाँकी रहेका १६ जिल्लाको अधिवेशन यही फागुन १३ गते तोकिएपछि चुनावी सरगर्मी फेरि बढेको हो ।

नयाँ नेतृत्व चुन्ने अधिवेशनको व्यग्र प्रतिक्षामा रहेका कांग्रेस नेता कार्यकर्ता उम्मेदवारहरुको चर्चा परिचर्चा र चुनावी अंकगणितको विश्लेषणमा घोत्लिन थालेका छन् । अब कस्तो नेतृत्व आउने हो, कुन पदमा को-को उम्मेदवार बन्ने सम्भावना छ, कसको अवस्था के छ अनि कसले बाजी मार्ला....? यस्तै गन्थन मन्थन आम नेता कार्यकर्ताका बीचमा अब बढ्दै गएका छन् । केन्द्रीय पार्टी राजनीतिको सीधा असर जिल्ला जिल्लामा पनि पर्छ । त्यसकै बाछिता बाँकेमा पर्ने निश्चित छ । त्यसै अनुरुप उम्मेदवारहरुको तय भइरहेको छ ।

केन्द्रीय सभापति शेरबहादुर देउबा (संस्थापन) पक्षधर एकातिर र डा.शेखर कोइराला (संस्थापन इतर) पक्षधर अर्कोतिर भएर चुनावी मोर्चामा जाने करिब निश्चित छ । तर, संस्थापन समूह भने सुरुदेखि नै उम्मेवार टुंगो लगाउन नसकेर सकसमा छ । सभापतिमा आकांक्षी धेरै हुँदा यसअघि अधिवेशन तोकिएर अन्तिम अवस्थासम्म पुग्दा (पछि अधिवेशन स्थगित भएको ) पनि उम्मेदवारको टुंगो लाग्न सकेको थिएन ।

तर, इतर समूह भने नेता नारायणप्रसाद गौडेलको नेतृत्वमा पदाधिकारी उम्मेदवारहरुको औपचारिक घोषणासहित मैदानमा उत्रिसकेको थियो । अहिले नयाँ मिति तोकिएसंगै गौडेल समूहले फेरि चुनावी प्रचारप्रसारको गति बढाइसकेको छ । अर्को समूह भने उम्मेदवार टुंगो लगाउने कसरतमै छ । सभापतिको उम्मेदवारको टुंगो नलाग्दा अन्य उम्मेदवारहरु पनि अन्यौलमै छन् ।

सभापतिमा बादशाह कुर्मी, सुरेन्द्र हमाल, सुनिल नरसिंह राणा, निरञ्जनसिंह सिजापति, राजकुमार बर्मा र लक्ष्मीनारायण शाहले दाबी गरेका छन् । आकांक्षी धेरै भएकाले सभापतिमा यो समूहबाट एक भन्दा धेरै उम्मेदवार हुने सम्भावना पनि देख्छन्, कांग्रेस नेता कार्यकर्ताहरु । सभापति नटुंगिदासम्म अन्य पदमा को-को उम्मेदवार बन्छन्, अझै टुंगो छैन ।

गौडेल समूहबाट उपसभापतिमा गोपाल प्रसाद अधिकारी र राजकुमार मौर्य, सचिवमा सुधांशु कोइराला र टंक प्रसाद काफ्ले (आशिष) तथा सहसचिवमा रेणु सिंह ठाकुर र विश्वराज लम्साल उम्मेदवार हुन् । उनीहरु प्रचारप्रसारमा जुटिरहेका छन् ।

संस्थापनबाट उपसभापतिमा रविन्द्र हमाल, सुरेन्द्रनाथ सापकोटा, सचिवमा निम बहादुर चलाउने (निरज), मेघराज ओली, रुद्र बहादुर वली तथा सहसचिवमा पुरनसिंह ठकुरी लगायतले उम्मेदवारी दिने बताउँदै आएका छन् । तर, को-को टिमको आधिकारिक उम्मेदवार बन्ने हुन् त्यो भने हेर्न बाँकी छ ।

प्रकाशित मिति: शनिबार, माघ २९, २०७८ २०:४५

प्रतिक्रिया दिनुहोस्