बाँके कांग्रेसको जिल्ला सदस्यमा तीन जनाको उम्मेदवारी घोषणा

राजनीति

गृहपृष्ठ
राजनीति
बाँके कांग्रेसको जिल्ला सदस्यमा तीन जनाको उम्मेदवारी घोषणा

बाँके कांग्रेसको जिल्ला सदस्यमा तीन जनाको उम्मेदवारी घोषणा

आइतबार, फागुन १, २०७८ बागेश्वरी पोस्ट

बायाँबाट क्रमशः शालिक सुवेदी, अमृता नेपाल र अमृत आचार्य

नेपालगन्ज । बाँके कांग्रेस फेरि तातेको छ । विभिन्न कारणले अधिवेशन सर्दै जाँदा सेलाउँदै-तात्दै आएको बाँके कांग्रेस अधिवेशनको नयाँ मिति तोकिएसंगै फेरि गर्माएको हो ।

बाँकेसहित जिल्ला अधिवेशन गर्न बाँकी रहेका १६ जिल्लाको अधिवेशन यही फागुन १३ गते तोकिएपछि चुनावी सरगर्मी फेरि बढेको हो । सभापति पदमा संस्थापन इतरबाट नारायण प्रसाद गौडेलको नेतृत्वमा पदाधिकारीहरुको उम्मेदवारी घोषणा भइसकेको छ । सदस्यहरु पनि भोट माग्न लागिसकेका छन् । तर, संस्थापन समूहबाट अझै कसैको नाम सार्बजनिक भइसकेको छैन । ब्यक्तिगत रुपमा उम्मेदवारी घोषणा गर्ने क्रम भने चलिरहेको छ ।

त्यस्तै सदस्य पदमा तीन जनाले उम्मेदवारी दिने घोषणा गरेका छन् । नेपालगन्ज उपमहानगरपालिकाको भूगोलतर्फबाट शालिक सुवेदीले उम्मेदवारी दिने घोषणा गरेका छन् । सुवेदी वडा नम्बर १० बाट क्षेत्रीय प्रतिनिधिमा निर्वाचित भएका थिए । २०४८ सालदेखि नेबिसंघबाट राजनीति सुरु गरेका सुवेदीले संगठन मजबुत बनाउन आफूले सदस्य पदमा उम्मेदवारी दिने बताएका हुन् ।

नेपालगन्ज उपमहानगरपालिकाबाट अमृत आचार्यले पनि सदस्य पदमा उम्मेदवारी दिने घोषणा गरेका छन् । वडा नम्बर १२ बाट क्षेत्रीय प्रतिनिधि निर्वाचित भएका आचार्यले अपांगता कोटा तर्फबाट उम्मेदवारी दिने घोषणा गरेका हुन् । आचार्य लामो समयदेखि नेबिसंघ हुँदै पार्टी राजनीतिमा सक्रिय छन् ।

त्यस्तै खजुरा गाउँपालिकाबाट जिल्ला सदस्य पदमा अमृता नेपालले पनि उम्मेदवारी दिने घोषणा गरेकी छिन् । खजुरा गाउँपालिका वडा नम्बर २ बाट क्षेत्रीय प्रतिनिधि निर्वाचित भएकी नेतृ नेपालले भूगोल तर्फबाट सदस्यमा उम्मेदवारी दिन लागेकी हुन् । उनी लामो समयदेखि नेपाल कांग्रेसको सक्रिय राजनीतिमा होमिएकी छिन् ।

जिल्ला सदस्यमा उम्मेदवारी घोषणा गरेका तीनै जना युवा नेताहरूले संगठन मजबुत बनाउन युवाहरुको खाँचो रहेकाले जिताउन सबै क्षेत्रीय प्रतिनिधिहरुलाई अनुरोध गरेका छन् ।