खजुरा बन्यो बाँकेको तेस्रो बालविवाह मुक्त पालिका

समाचार

गृहपृष्ठ
समाचार
खजुरा बन्यो बाँकेको तेस्रो बालविवाह मुक्त पालिका

खजुरा बन्यो बाँकेको तेस्रो बालविवाह मुक्त पालिका

मंगलबार, फागुन ३, २०७८ बागेश्वरी पोस्ट

नेपालगञ्ज । बाँकेको खजुरा गाउँपालिकालाई बालविवाह मुक्त गाउँपालिका घोषणा गरिएको छ । बालविवाह मुक्त अभियान सञ्चालन निर्देशिका अनुसार गाउँपालिकाका सबै वडालाई बालविवाह मुक्त घोषणा गरे पश्चात् खजुरा गाउँपालिकालाई नै बालविवाह मुक्त घोषणा गरिएको हो ।

गाउँपालिकामा २० प्रतिशत भन्दा कम बालविवाह भए बालविवाह मुक्त घोषणा हुने प्रावधान अनुसार खजुरा गाउँपालिकालाई बालविबाह मुक्त पालिका घोषणा गरिएको खजुरा गाउँपालिकाका अध्यक्ष किष्मतकुमार कक्षपतिले जानकारी दिए । गाउँपालिकाका अध्यक्ष कक्षपतिले गाउँपालिकालाई बाँके जिल्लाकै तेस्रो बालविवाह मुक्त गाउँपालिका घोषणा गर्न सकेकोमा खुशी व्यक्त गर्दै आगामी दिनमा पनि निरन्तर रुपमा अभियानलाई अघि बढाउँदै बालविवाहलाई शून्य अवस्थामा झार्न सबै सरोकारवाला निकायलाई अनुरोध गरे । बालविवाह मुक्त गाउँपालिका घोषणासभामा जिल्ला समन्वय समिति बाँकेका संयोजक अजय कुमार श्रीवास्तवले खजुरा गाउँपालिका बालविवाह मुक्त घोषणा भएको प्रमाणपत्र अध्यक्ष कक्षपतिलाई प्रदान गरेका थिए ।

घोषणासभालाई सम्बोधन गर्दै जिल्ला समन्वय समितिका संयोजक श्रीवास्तवले बालविवाह मुक्त गाउँपालिका घोषणा हुन सफल भएकोमा गाउँपालिकाका जनप्रतिनिधि, कर्मचारी र साझेदार गैरसरकारी संघ संस्थाका प्रतिनिधिहरुप्रति आभार प्रकट गरे । उनले यही फागुन अन्त्यसम्ममा जिल्लालाई बालविवाह मुक्त जिल्ला घोषणा गर्ने तयारी भइरहेको बताउँदै यो अभियानलाई सफल बनाउन स्थानीय तह, सरोकारवाला निकाय र गैरसरकारी संघ-संस्थाहरुको पनि उत्तिकै भूमिका रहने उल्लेख गरे ।

बालविवाह मुक्त पालिका घोषणासभाका प्रमुख अतिथि लुम्विनी प्रदेशसभा सदस्य बाबुराम गौतम, बाँकेका प्रमुख जिल्ला अधिकारी सूर्यबहादुर खत्री लगायतले शुभकामना व्यक्त गरेका थिए । खजुरा गाउँपालिकालाई बालविवाह मुक्त घोषणा गर्न स्याक नेपाल बाँकेले बालविवाह रोकथाम परियोजना मार्फत् साझेदारी गर्दै आएको जानकारी गराउँदै बालविवाह मुक्त अभियान सञ्चालन निर्देशिका अनुसार वडामा २० प्रतिशत भन्दा कम बालविवाह भए बालविवाह मुक्त घोषणा हुने प्रावधान रहेको स्याकका अध्यक्ष शिवलाल पाण्डेले जानकारी दिए ।

बाँके जिल्लामा यसअघि जानकी र बैजनाथ गाउँपालिका बालविवाहमुक्त घोषणा भइसकेको बताउँदै नेपालगञ्ज उपमहानगरपालिका र कोहलपुर नगरपालिका पनि घोषणाको तयारीमा रहेको स्याकका अध्यक्ष पाण्डेले बताए । बाँकेका ८१ वडा मध्ये हालसम्म ४३ वडा बालविवाहमुक्त घोषणा भइसकेका छन् ।

प्रकाशित मिति: मंगलबार, फागुन ३, २०७८ २०:२३

प्रतिक्रिया दिनुहोस्