बाँके कांग्रेसको सभापतिका तीन प्रतिष्पर्धी-को कस्ता ?

राजनीति

गृहपृष्ठ
राजनीति
बाँके कांग्रेसको सभापतिका तीन प्रतिष्पर्धी-को कस्ता ?

बाँके कांग्रेसको सभापतिका तीन प्रतिष्पर्धी-को कस्ता ?

आइतबार, फागुन १५, २०७८ बागेश्वरी पोस्ट

नेपालगञ्ज । नेपाली कांग्रेस बाँकेको फागुन १९ गते हुने जिल्ला अधिवेशनमा सभापति पदका लागि तीन जनाबीच प्रतिष्पर्धा छ । संस्थापनबाट दुई जना र इतर समूहबाट एक जना चुनावी प्रतिष्पर्धामा छन् ।

संस्थापन पक्ष (शेरबहादुर देउबा) ले सभापति बाहेक अन्य पदमा प्यानल खडा गरेपनि सभापतिमा भने सहमति जुट्न नसक्दा दुई जना उम्मेदवार मैदानमा उत्रिएका छन् । संस्थापन इतर (डा.शेखर कोइराला) बाट भने नारायणप्रसाद गौडेल मात्रै उम्मेदवार छन् । संस्थापनबाट सुरेन्द्र बहादुर हमाल र बादशाह कुर्मी उम्मेदवार बनेका छन् ।

तीन जनाबीच हुने प्रतिष्पर्धालाई निकै रुचीका साथ हेरिएको छ । कांग्रेस विधान अनुसार सभापति निर्वाचित हुन कुल खसेको मतको ५० प्रतिशत बढी मत ल्याउनुपर्ने भएका कारण तीन जना उम्मेदवार हुँदा कसैको पनि ५० प्रतिशत बढी मत नआउने आंकलन गरिएको छ । त्यसो हुँदा निर्वाचन दोस्रो चरणमा जानेछ । दोस्रो चरणमा बढी मत ल्याउने दुई जनाबीच प्रतिपष्र्धा हुनेछ ।

त्यसो त संस्थापनबाट दुई जना उम्मेदवार भएकाले संस्थापन इतर पक्षले पहिलो चरणमै नतिजा निकाल्ने कोशिस भने गर्नेछ । तर, संस्थापन पक्षले पहिलो चरणमा गौडेललाई रोक्दै दोस्रो चरणमा आफ्नो समूहबाट पहिलो हुने उम्मेदवारलाई जिताउन एकुजट भएर प्रतिष्पर्धा गर्ने रणनीति अख्तियार गर्नेछ । उसो त सभापतिका लागि तीब्र धु्रबीकरण देखिएकाले दोस्रो चरणमा पनि संस्थापन समूहलाई चुनौती हुने विश्लेषण समेत गरिएको छ ।

बाँके कांग्रेसको सभापति हुने दौडमा रहेका नेताहरु कस्ता छन् त ? कस्तो छ उनीहरुको राजनीतिक बायाग्रोफी ? एक चर्चा-

को हुन् नारायण प्रसाद गौडेल ?

No description available.

बाँके कांग्रेसका प्रभावशाली नेता नारायणप्रसाद गौडेल कुशल संगठक मानिन्छन् । पार्टीको संगठन बनाउन अहोरात्र खट्ने छबि बनाएका गौडेल इमान्दार र सामान्य जीवनशैली अपनाउने मेहनती नेताका रुपमा कार्यकर्तामाझ परिचित छन् ।

कोहलपुर निवासी गौडेल पार्टी राजनीतिमा अविछिन्न सक्रिय नेता हुन् । उनले तरुण दल हुँदै क्षेत्रीय सभापति, जिल्ला सदस्य, जिल्ला सह–सचिव, केन्द्रिय संगठन विभाग सदस्यदेखि महासमिति सदस्य पदमा रही कुशलतापूर्वक आफ्नो भूमिका र जिम्मेवारी निभाएका छन् ।

गौडेल अहिले पार्टीको महाधिवेशन प्रतिनिधि छन् । २०५९ सालमा जिल्ला सहसचिव भइसकेका उनी २०६१ सालमा क्षेत्र नम्बर १ को क्षेत्रीय सभापति भएका थिए । २०३६ सालदेखि साधारण सदस्यका रुपमा रहेका गौडेल २०४८ सालदेखि कांग्रेसको क्रियाशील सदस्य छन् । उनी कोहलपुर निवासी हुन् ।

नेपाल तरुण दल कोहलपुरका संस्थापक उनी १२औं महाधिवेशनबाट २०६७ सालमा केन्द्रिय संगठन विभाग सदस्य पनि बनेका थिए । जनआन्दोलन २०६२/६३ मा सक्रिय सहभागिता जनाएका गौडेल त्यतिवेला दुई पटक गरेर साढे तीन महिना जेलमा बन्दी बनाइएका थिए । उनले त्यसबेला तत्कालीन शाही नेपाली सेनाबाट मरणासन्न हुने गरी कुटाई खाएका थिए ।

१३औं महाविधेशनमा पनि सभापति पदका उम्मेदवार थिए । उनी त्यतिबेला सफल हुन सकेनन् । एकपटक सभापति बनेर बाँके कांग्रेसलाई सुदृढ र गतिशील बनाउने संकल्प बोकेका गौडेल दोस्रो संविधानसभा चुनावमा समानुपातिकतर्फका उम्मेदवार समेत थिए ।

को हुन् सुरेन्द्र बहादुर हमाल ?

No description available.

लुम्बिनी प्रदेश सरकारका वन, वातावरण तथा भूसंरक्षण मन्त्री हमाल २०७४ सालको निर्वाचनमा बाँकेको प्रदेशसभा निर्वाचन क्षेत्र नम्बर २ (ख) बाट लुम्बिनी प्रदेशसभामा निर्वाचित भएका हुन् ।

हमालले २०३५ सालदेखि राजनीतिक यात्रा प्रारम्भ गरेका हुन् । २०३६ सालको जनमत संग्रहका बेला उनी बहुदलको पक्षमा एजेन्ट समेत बसेका थिए । जनमत संग्रहपछि महेन्द्र बहुमुखी क्याम्पसमा उनी पहिलो स्ववियु सचिव बने । कांग्रेस बाँकेका कोषाध्यक्ष भइसकेका उनी पञ्चायतमै युवराज शर्मा सभापति हुँदा जिल्ला सदस्य भएका थिए । सनत रेग्मी पार्टी सभापति हुँदा उनी कोषाध्यक्ष भए ।

२०४४ सालमा उनी नेपालगञ्जको तत्कालीन १६ नम्बर वडा 'बेलासपुर'बाट वडा अध्यक्ष लडेका थिए । २०४४ सालमै उनी नेपालगञ्ज युवक संगठनको पहिलो अध्यक्ष बने । युवामाझ निकै लोकप्रिय उनी २०४६ सालको जनआन्दोलनमा पनि सक्रिय भूमिकामा थिए । पार्टी विभाजन हुँदा उनी सभापति गजेन्द्र हमालको जिल्ला कार्यसमितिमा नेपाली कांग्रेस प्रजातान्त्रिकको जिल्ला सदस्य पनि भए । २०५४ सालमा उनी मेयरमा लडेका थिए ।

भारत्तोलनका खेलाडी हमाल मिलनसार, अनुशासित र कर्तब्यनिष्ठ व्यक्तिका रुपमा चिनिन्छन् । सहयोगी भावनाका हमाल 'लो प्रोफाइल'मा बस्न रुचाउने नेता हुन् । नेपालगञ्ज घरबारीटोलका स्थायी बासिन्दा हमाल विद्यार्थी राजनीतिबाट स्थापित भएका नेता हुन् ।

महेन्द्र बहुमुखी क्याम्पस नेपालगञ्जको स्ववियु सभापति समेत भएका हमाल नेपालगञ्जको उपमेयर पनि भए । खेलकुद र राजनीतिलाई सँगसँगै अगाडि बढाएका हमाल २०३७ सालमा महेन्द्र बहुमुखी क्याम्पसको स्ववियु सचिव र २०४२ सालमा स्ववियु सभापति भए । उनी २०४९ मा नेपालगञ्जको उपमेयर भएका थिए ।

ओलम्पियन खेलाडी समेत रहेका मन्त्री हमाल आन्द्राको क्यान्सर रोगलाई पराजित गर्दै पुनः राजनीतिमा फर्किएका हुन् । उनका दुई जना दाई स्वर्गीय रणेन्द्र हमाल (भाईराजा) र गजेन्द्र हमाल बाँके कांग्रेसको सभापति भइसकेका छन् ।

को हुन् बादशाह कुर्मी ?

No description available.

कुर्मी बाँके क्षेत्र नम्बर ३ बाट सबैभन्दा बढी मत ल्याएर महाधिवेशन प्रतिनिधि (खुला) मा निर्वाचित भएका थिए । उनी कांग्रेस बाँकेका चिरपरिचित नेता हुन् । उनी २०४३ सालदेखि कांग्रेस राजनीतिमा सक्रिय छन् । कुर्मी २०४३ मा प्रधानपञ्च लडेका थिए । त्यतिबेला उनी २६ बर्षका थिए ।

नेपाली कांग्रेस बाँकेको उपसभापति र कार्यवहाक सभापति समेत भइसकेका कुर्मी दुई पटक संविधानसभा सदस्य बने । २०६४ र २०७० मा समानुपातिकतर्फ संविधानसभा सदस्यमा निर्वाचित कुर्मी नेपालगञ्ज १७ परस्पुरका स्थायी बासिन्दा हुन् । कुर्मी दुई पटक तत्कालीन परस्पुर गाविसको अध्यक्ष समेत भएका थिए । २०४९ र २०५४ मा उनी अध्यक्ष भए ।

मधेशी समुदायका कुर्मी प्रचारप्रसारबाट टाढा रहेर काम गर्न रुचाउने नेतामा पर्दछन् । सरल जीवनशैलीका उनी राजनीतिक संघर्षका क्रममा करिब एक महिना जेल समेत परेका थिए । राजाले कु गरेपछि काठमाण्डौमा बसेर आन्दोलन गरेका कुर्मी २०६० सालमा २० दिन हिरासतमा बसेका थिए । बाँके कांग्रेसको कार्यबहाक सभापति बनेर जिल्लामा २०६२/६३ को जनआन्दोलनमा सात दलको नेतृत्व गरेका कुर्मीको त्यस क्रममा हात समेत भाँचिएको थियो । हात भाँचिएकै अवस्थामा उनी आन्दोलनमा होमिएका थिए ।

पूर्व पार्टी केन्द्रिय सभापति एवम् पूर्व प्रधानमन्त्री सुशील कोइरालासंग अत्यन्त निकट रहेर काम गरेका कुर्मी २०७४ सालको प्रतिनिधिसभा निर्वाचनमा क्षेत्र नम्बर ३ बाट बाम गठबन्धनसंग चुनाव लडेका थिए । उनी ९औं महाधिवेशनबाट निरन्तर जिल्ला सदस्य छन् ।

प्रकाशित मिति: आइतबार, फागुन १५, २०७८ ११:३३

प्रतिक्रिया दिनुहोस्